LDD e akuzon Qeverinë për improvizime

LDD e akuzon Qeverinë për improvizime







Nga Express më 11.04.2009 në ora 14:53

Zyrtarët e Lidhjes Demokratike të Dardanisë (LDD) thonë se një vit pas hyrjes në fuqi, Kushtetuta nuk po zbatohet në tërë territorin e Kosovës, në veçanti në veri, i cili është shndërruar në një oazë të kontrabandës dhe të kriminalitetit.

Lulzim Zeneli, sekretar i Përgjithshëm i LDD-së, njëherit shef i Grupit Parlamentar të kësaj partie, në një konferencë për gazetarë akuzoi Qeverinë e Kosovës dhe partnerët e koalicionit qeverisës se po udhëhiqen nga logjika e improvizimit, me logjiken e të kaluarës, të protektoratit të UNMIK-ut, e cila nuk përkon me realitetin e krijuar në Kosovë, dhe nuk përkon me logjikë të veprimit shtetëror.

“Fatkeqësisht 1 vit pas hyrjes në fuqi të Kushtetutës së Republikës së Kosovës, duke pas parasysh se përfunduam festën zyrtare të shënimit të përvjetorit të parë të miratimit të kushtetutës, mund të konstatojmë se jemi shumë larg implementimit të kushtetutës në tërë territorin e Kosovës, në veçanti në veri, atje ku vendi është shndërruar në një oazë e kontrabandës dhe e kriminalitetit, të cilën po e rrezikon ky kriminalitet dhe kjo kontrabandë jo vetëm perspektiven e Kosovës, por edhe stabilitetin politik dhe të sigurisë”, tha Zeneli.

Kjo gjendje për LDD-në është antikushtetuese dhe antiligjore dhe po u kushton qytetarëve të Kosovës çdo ditë.

“Në rekapitullimin 1 vjeçar të miratimit të Kushtetutës së Republikës së Kosovës, në vend se të kemi një balancë pozitiv dhe të japim porosi të qarta dhe të vendosura, për të implementuar kushtetutën, sot koalicioni vazhdon me shkallën e improvizimit të implemetimit dhe lakorja e besueshmërisë në kushtetutën e Republikës së Kosovës, ka vërejtje negative”, u shpreh Zeneli.