Bashkimi është mrekullia që do të ndodhë

Bashkimi është mrekullia që do të ndodhë

Lirie Hajdari, BOTA SOT
“Ne kemi disa probleme në Shqipëri, por me kohë shpresoj se do të kalojnë. Ju ato probleme nuk i keni, vetëm mos lejoni të ndaheni. Le të mos kthehemi në ditën e kallashit”, porosit Lartmadhnia e Tij Mbreti Leka I





Lartmadhnia e Tij - Mbreti i shqiptarëve Leka I i ka porositur udhëheqësit institucionalë e politikë të Kosovës të mos lejojnë ndasi ndërmjet vete, duke thënë se bashkëpunimi dhe bashkimi ndërmjet tyre është forca më e madhe që ka Kosova.
Ai ka përkujtuar problemet në Shqipëri, ndërkaq është lutur të mos ketë kthim, siç u shpreh ai ‘në ditët e kallashit’. “Ne kemi disa probleme në Shqipëri, por me kohë shpresoj se do të kalojnë. Ju ato probleme nuk i keni, vetëm mos lejoni të ndaheni. Politika ka rrugët e veta, njerëzit kanë besimet e ndryshme dhe kjo kuptohet. Le të mos kthehemi në ditën e kallashit”, tha ai gjatë takimit me kryeministrin Hashim Thaçi. Mbreti Leka I, i cili po qëndron në Kosovë për të tretën ditë me radhë, bashkë me të birin Princin Leka II dhe një delegacion nga Oborri Mbretëror, shfaqi dëshirën për një integrim edhe më të madh të kombit shqiptarë, ndërsa ndihej i lumtur që Kosovën e sheh të pavarur. “Kur të vijë momenti dhe shpresoj të jem gjallë për ta parë, do të jetë një integrim ndërmjet Shqipërisë dhe Kosovës, i cili do të jetë i mrekullueshëm për kombin shqiptar”, tha ai.
Kryeministri Hashim Thaçi, pavarësinë e Kosovës dhe hyrjen e Shqipërisë në NATO, i quajti momente historike jo vetëm për qytetarët e dy të vendeve, por edhe për rajonin, për të ardhmen integruese, për zhvillimin dhe mirëqenien sociale të qytetarëve, për çka falënderoj edhe Lartmadhërinë Mbretin Leka I për rolin aktiv që ka luajtur në këtë drejtim. Mbreti Leka I është njoftuar nga kreu i ekzekutivit për suksesin e arritur në Kosovë që nga shpallja e pavarësisë, për njohjet e fuqishme, për progresin e arritur edhe në zhvillimin ekonomik, si dhe për hapat e rëndësishëm që janë bërë në reforma për t’u integruar sa më shpejt në strukturat euroatlantike. “Kosova është shtet funksional, një shtet efektiv me mbështetje të gjithanshme ndërkombëtare, me perspektivë të sigurt për integrime. Pavarësia ka sjellë paqe, stabilitet dhe bashkëpunim rajonal”, tha Kryeministri, duke mos harruar të përmendë edhe mbështetjen që Shqipëria i ka dhënë këtij procesi të rëndësishëm në vazhdimësi. I pari i Qeverisë nuk ka dashur të komentojë më shumë deklarimet në media të Oborrit Mbretëror se Mbreti Leka I ka ndihmuar luftën e UÇK-së, por theksoi se pa mbështetjen e plotë të Shqipërisë nuk do të ndodhte as liria e Kosovës. “Edhe Lartmadhëria ka menduar mirë vazhdimisht për Kosovën, për lirin dhe pavarësinë e Kosovës dhe çmoj kontributin e tij. Pavarësia e Kosovës është kontribut i gjithë shqiptarëve dhe çdo shqiptar duhet të ndihet mirë dhe krenar për kontributin e vet”, tha Thaçi, sipas të cilit pa mbështetjen e plotë të Shqipërisë nuk do të ndodhte as liria e Kosovës, një mbështetje politike, humanitare dhe diplomatike, kundër ushtrisë, policisë dhe administratës serbe në Kosovë.
Mbreti Leka Zogu I përmbyll sot vizitën e tij në Kosovë, duke marrë titullin “Qytetar Nderi” i komunës së Vitisë.

Leka I shpallet qytetar nderi i Vitisë







Nga Express më 14.04.2009 në ora 15:58

Me motivacion “Kontribut për çështjen kombëtare” nën moton “Atdheu mbi të Gjitha” dhe për një Shqipëri të lirë, etnike e demokratike”, Pretendenti i fronit mbretëror, Leka Zogu i Parë, të martën u shpall qytetar nderi i Vitisë.

Për t’i uruar atij mirëseardhje, kishin dalë shumë vitias. Sipas agjencisë KosovaLive, Leka I, fillimisht ka qëndruar në fshatin Tërpezë, ku ka vizituar familjet e Ahmet dhe Hajrullah-Tërpezës, ish-luftëtarë të Luftës Nacional Çlirimtare Shqiptare.

Ndonëse ishte paraparë që Leka I të marrë pjesë në seancën solemne të Kuvendit Komunal, ku do të shpallej qytetar nderi i Vitisë, ai nuk ishte i pranishëm në seancë për shkaqe shëndetësore.

Kryesuesi i KK të Vitisë, Jakup Jahiri, bëri të ditur se në një seancë të jashtëzakonshme para tri ditësh, është marrë vendimi që të shpallet qytetar nderi Lartmadhëria e tij, me motivacion “Kontribut për çështjen kombëtare” me moton “Atdheu mbi të gjitha dhe për një Shqipëri të lirë, etnike e demokratike”.

“Ky nderim është një simbol që tregon të vërtetën, se shqiptarët edhe pse të ndarë në shtete të ndryshme, jemi një komb”, tha pas pranimit të çmimit, Princi Leka.

Kjo është hera e parë që Komuna së Vitisë shpall një qytetar nderi.