PDK dështon ta kthejë në rivotim mocionin

nga **Agim Gashi** Fri May 11, 2012 5:36 pm

PDK dështon ta kthejë në rivotim mocionin

Deputetët e opozitës kanë lëshuar seancën e sotme plenare duke pamundësuar kështu vazhdimin e punimeve të Kuvendit, për shkak të mungesës së kuorumit.

Opozita lëshoi sallën pas propozimit të partisë më të madhe në pushtet, PDK-së, që Kuvendi edhe njëherë të rishqyrtojë mocionin e miratuar një ditë më herët, për kushtëzimin e vazhdimit të bisedimeve me Serbinë me zbardhjen e fatit të personave të pagjetur të luftës.

Në arsyetimin e dhënë nga PDK-ja, shefi i Grupit Parlamentar të kësaj partie, Adem Grabovci, tha se Kuvendi kishte votuar dy dokumente dhe jo një mocion të vetëm.

Andaj, sipas tij, nevojitej një harmonizim i tekstit dhe miratim i një dokumenti të vetëm.

“I propozojmë seancës që të bëjë harmonizimin e këtyre dy dokumenteve që i kemi, pra dy palë rekomandimeve, që njëra ka dalë në emër të komisionit, e tjera në emër të deputetes Hikmete Bajraktari. I kisha lutur të gjithë deputetët që ta bëjmë harmonizimin dhe të dalim me një dokument unik”, u është drejtuar deputetëve Grabovci.

Mirëpo, për opozitën, votimi për mocionin në seancën e të enjtes ka qenë konform procedurave dhe shumë i qartë.

Ata thanë se dy rekomandimet burojnë nga dy diskutime të ndryshme parlamentare, dhe si të tilla, ato nuk mund të harmonizohen në një dokument, siç kërkonte PDK-ja.

Shefi i Grupit Parlamentar të LDK-së, Ismet Beqiri tha se propozimi i PDK-së ishte përpjekje për shkeljen e procedurave, pasi që mocioni është votuar dhe nuk mund të ketë rivotim për të.

“Rekomandimet kanë qenë këtu në Kuvend për dy javë dhe i kanë parë e lexuar të gjithë. Kështu që nuk është problem i deputetëve të LDK-së nëse të tjerët s’e kanë marrë vesh se çka po votojnë”.

“Ne nuk dëshirojmë të bëhemi pjesë e shkeljes së procedurave nga institucioni më i lartë i vendit, andaj ne nuk do të qëndrojmë në sallë dhe nuk do ta përkrahim këtë mocion”, ka thënë Beqiri.

Kundër kthimit të mocionit në votim ishin edhe dy partitë tjera opozitare, Vetëvendosje dhe AAK.

Shefi i Grupit Parlamentar të Vetëvendosjes, Visar Ymeri, tha se mocioni i ka katër fjali dhe aty nuk ka asgjë të paqartë.

“Unë nuk dua të besoj që në Kuvendin e Republikës së Kosovës ka asi deputet idiot të cilët kur i lexojnë katër pika nuk e marrin vesh se çfarë kanë lexuar. Pra kanë kaluar edhe në Komision një pjesë e tyre dhe ato që janë diskutuar dje në interpelancë, në fakt nëse dëgjohen diskutimet e shumicës së deputetëve janë pikërisht në përputhje me pikat të cilat i kemi votuar në fund”.

“Asnjëherë nuk ka qenë ideja që këto dy dokumente të harmonizohen meqenëse janë dy dokumente që dalin nga dy pjesë të ndryshme të diskutimeve në Kuvend”, është shprehur Ymeri.

Më pas, PDK kërkoi votimin për futjen në rend të ditës të harmonizimin e dy rekomandimeve dhe rivotimit të mocionit.

Por, me atë rast opozita lëshoi sallën.

Largimi i tyre solli si pasojë mungesën e kuorumit, kështu që kryesuesi i seancës, deputeti Xhavit Haliti shpalli pauzë.

Megjithatë, as pas pauzës, nuk u arrit marrëveshja, kështu që në mungesë të kuorumit, Kuvendi shtyu seancën për javën tjetër.

Ndryshe, në seancën e të enjtes, pas interpelancës së kryenegociatores Edita Tahiri në lidhje me bisedimet me Serbinë, Kuvendi kishte votuar mocionin, i cili në një pikë kërkonte kushtëzimin e vazhdimit të bisedimeve me Beogradin me zbardhjen e fatit të pagjeturve të luftës.

Mocioni ishte përkrahë fillimisht edhe nga PDK-ja, por pas seancës deputetët e kësaj partie kishin thënë se nuk e kishin të qartë se për çfarë kanë votuar, andaj edhe kishin kërkuar rivotimin.

* * * * *

Kuvendi i Kosovës, do të vazhdojë edhe sot punimet e saja, duke shqyrtuar disa raporte.

Në rend dite do të jetë shqyrtimi i Raportit të punës të Agjencisë Kosovare Kundër Korrupsionit, për vitin 2011, shqyrtimi i Raportit të punës të Radio Televizionit të Kosovës, për vitin 2011, si dhe shqyrtimi i kërkesës së Komisionit ad hok për amendamentimin e Ligjit për zgjedhjet e përgjithshme, për afat shtesë.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30