Kuvend hedh poshtë mocionin e Vetëvendosjes

nga **Agim Gashi** Thu Jun 30, 2011 6:20 pm

Kuvend hedh poshtë mocionin e Vetëvendosjes

Kuvendi i Kosovës nuk ka mbështetur rekomandimet e mocionit të ngritur nga Lëvizja Vetëvendosje në fund të interpelancës së kryeministrit Hashim Thaçi, në seancën e së enjtes. Shefi i Grupit Parlamentar të Lëvizjes Vetëvendosje, Visar Ymeri si kërkues i interpelancës, në fund të debatit ka thënë se u pa edhe njëherë se Qeveria është absolutisht joserioze dhe e papërgjegjshme.

Në përmbyllje të debatit, Ymeri ka kërkuar nga ligjvënësit që t’i mbështesin katër rekomandimet që Qeveria të publikojë menjëherë gjithë dokumentacionin rreth autostradës, Kuvendi të angazhojë grup ekspertësh për vlerësimin dhe rishikimin e kontratës, Qeveria të bëjë rishikimin e kontratës në pjesët që dëmtojnë qytetarin e Kosovës dhe që Qeveria të raportojë çdo tre muaj për shpenzimet dhe pagesat për autostradën.

Megjithëse ka insistuar që të votohen një nga një, shumica parlamentare ka vendosur që këto rekomandime të votohen në pako, ndërkohë që si të tilla këto rekomandime janë hedhur poshtë me 35 vota për, 1 abstenim kurse 19 ishin për.

Kryeministri Thaçi ka falënderuar deputetët për debatin konstruktiv dhe frytdhënës, megjithëse, sipas tij, në shumë fjalime të ligjvënësve është krijuar huti dhe paqartësi për qytetarët.

“Unë dëshiroj edhe njëherë të sqaroj dhe ritheksoj fuqishëm se kjo është një kontratë ndërkombëtare sipas standardeve ndërkombëtare dhe jo e nivelit lokal. Është projekti më i rëndësishëm në historinë e Kosovës dhe projekti më i madh. Është projekti i meritës dhe vlerës së gjithë qytetarëve të Republikës së Kosovës. Është projekti i munguar, është projekti që distancon të kaluarën e Kosovës dhe hap perspektivën për të ardhmen zhvillimore dhe integruese”, është shprehur Thaçi.

Nga ana tjetër, shefi i GP të Vetëvendosjes Visar Ymeri ka thënë se ky debat tregoi qartë mungesën e transparencës së Qeverisë dhe mungesën e madhe të përgjegjësisë nga ana e qeveritarëve.

“Vetë kontrata dhe mospublikimi i saj, tregon se kjo qeveri është jashtëzakonisht jo transparente. Ju bëj thirrje që këtë mocion ta votoni për shkak se ky është i rëndësishëm në shumë aspekte për qytetarët dhe për Kuvendin e Kosovës. Ne po e shohim te përdorimi i parasë publike këta janë jashtëzakonisht të papërgjegjshëm ndaj qytetarëve”, ka thënë Ymeri.

Kryeministri Thaçi gjatë seancës së sotme është përballur me replika të shumta me deputetët opozitarë, sidomos me ata të LDK-së dhe Vetëvendosjes, jo vetëm për çështjen e autostradës, por edhe për çështje të tjera jashtë asaj për të cilën ishte thirrur interpelanca.

Nga ana tjetër, nga deputetët e pozitës ai ka marrë mbështetje për vazhdimin e ndërtimit të autostradës Vërmicë-Merdare, sikur edhe për autostradën tjetër të paralajmëruar nga kreu i Qeverisë, që lidh Prishtinën me Shkupin, për të cilën, Thaçi ka thënë se shumë shpejt do të bëhet shprehja e interesit.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30