Nga shkelja e Kushtetutës deri te psikanaliza

Nga shkelja e Kushtetutës deri te psikanaliza







Nga Express

Grupi Këshillues i Shoqërisë Civile për Avokim në Kuvendin e Kosovës, i cili përbëhet nga 21 OJQ lokale, të premten ka publikuar një varg parregullsish, që kanë dalë nga raportet e monitorimit të punës së Kuvendit të Kosovës për periudhën janar-prill 2009.

Shqetësimi kryesor i shoqërisë civile, është shkelja e Kushtetutës nga ana e Kryesisë se Kuvendit, ku u mohohet e drejta e qytetarëve për nismë legjislative. Më 19 shkurt të këtij viti, pesë OJQ-të vendore, të përkrahura nga më shumë se 10.000 nënshkrime të qytetarëve, kanë kërkuar ndryshimin dhe plotësimin e Ligjit për Vetëqeverisjen Lokale.

Driton Selmanaj nga Instituti Demokratik i Kosovës (KDI), ka vlerësuar se mosmarrja parasysh e kësaj nisme legjislative të qytetarëve, nga ana e Kuvendit, konsiderohet shkelje e Kushtetutës. “Kjo e drejtë e qytetarëve për nismë legjislative është e garantuar me nenin 79 të Kushtetutës së Republikës së Kosovës”, ka thënë Selmanaj.

Ndërkohë, në raportin e monitorimit të punës së Kuvendit për periudhën janar-prill 2009, ku janë mbajtur 12 seanca plenare prej të cilave 9 seanca të rregullta dhe 3 solemne, janë evidentuar edhe disa parregullsi të tjera. Mosgatishmëria e Kuvendit për kompletimin e bordeve të agjencive të pavarura dhe mosfunksionalizimi i tyre, është njëra nga shumë parregullsitë. Rastet konkrete lidhen me funksionimin e RTK-së pa bord, moszgjedhja e Ombudspersonit, mbetja e ART-së pa mandat si dhe mos zgjedhja e një anëtari të KPM-së nga Kuvendi.

Fitore Zeneli nga KDI ka thënë se marrja parasysh e këtyre rekomandimeve nga ana e Kuvendit të Kosovës, do të ndikonte drejtpërdrejti në efikasitetin e punës së Kuvendit dhe njëherësh në përmbushjen e rolit të tij obligues para qytetarit. “Mospublikimi me kohë i procesverbaleve të mbledhjeve të Komisioneve Parlamentare, ka qenë një tjetër parregullsi. Rastet konkrete kanë të bëjnë me Komisionin e Shërbimeve Publike dhe Komisionin për Punë të Jashtme që nuk kanë publikuar asnjë procesverbal, ndërsa Komisioni për Integrime Evropiane vetëm një procesverbal e ka publikuar”, shtoi Zeneli

Mospublikimi i votimit elektronik dhe përdorimi i gjuhës joparlamentare, është një shqetësim tjetër që ka paraqitur Grupi Këshillues. “Në seancën e 29 janarit 2009, në debatin për Raportin e Punës së Qeverisë, deputeti Gani Buqinca nga radhët e PDK-së, i revoltuar ndaj kritikave të paraqitura, i ka etiketuar deputetët në forma të ndryshme, duke iu bërë psikoanalizë dhe duke i fyer në baza personale deputetët Melihate Tërmkolli, Ibrahim Makollin, Nexhat Dacin dhe Ardian Gjinin”, thuhet në raport.

Mosrespektimi i orarit të fillimit të seancave parlamentare dhe mbledhjeve të komisioneve parlamentare dhe mungesa e kuorumit gjatë votimit të projektligjeve dhe marrjes së vendimeve në seancën e datës 29 janar dhe 26 shkurtit, janë pikat tjera të parregullsive që kanë karakterizuar Kuvendin gjatë kësaj periudhe.

Në raport përmendet edhe mosgatishmëria e ministrave për të qenë prezent gjatë diskutimit të çështjeve me rëndësi, si: Projekt-strategjia Agjencisë Kundër Korrupsion, Raporti i Komisionit Rregullativ të Prokurimit Publik, etj.

Po ashtu, Grupi Këshillues, ka identifikuar edhe faktorët që ndikojnë në mosefikasitetin e punës së Kuvendit të Kosovës. Faktori i parë është mosrespektimi i afateve të procedimit të Projekt-ligjeve nga leximi i parë deri në leximin e dytë. Ndërsa i dyti ka të bëjë me vonesën e Qeverisë për t’i proceduar Projekt-ligjet në Kuvend sipas strategjisë legjislative të saj dhe planit të punës së Kuvendit.

Grupi Këshillues ka nxjerr një varg rekomandimesh:
Të sqarohet procedura për nisma legjislative nga ana e qytetarëve;
E drejta e vlerësimit të “çështjeve urgjente”, të mos ngelet e drejtë ekskluzive e Kryetarit të Kuvendit, por për këtë çështje të vendos Kuvendi me votim;
Të bëhet publikimi i Projekt-Ligjeve (dokumentet publike) në ueb-faqe të Kuvendit të Kosovës për inpute të qytetarëve
Zëvendësimin e deputetit Zef Morina nga pozita e Kryetarit të Grupit Punues për monitorimin e Ligjit mbi Rrugët;
Ministrat të jenë në gatishmëri të Kuvendit, kur ftohen në komisione parlamentare për raportim;
Publikimi me kohë i transkriptove dhe procesverbaleve të mbledhjeve të komisioneve parlamentare;
Qeveria të respektoj strategjinë e saj legjislative dhe Planin e Punës së Kuvendit për procedim të Projekt-Ligjeve në Kuvend;
Kuvendi të respektojë afatet e procedimit të Projekt-Ligjeve nga leximi i parë deri në leximin e dytë;
Deputetët të jenë prezent në kohën e votimit dhe të marrin pjesë në votim gjatë seancave plenare, në mënyrë që të kryejnë obligimin ndaj zgjedhësve të tyre.