Podrimja pati vdekje të natyrshme, trupi i tij të enjten në Prishtinë

nga **Agim Gashi** Wed Jul 25, 2012 12:35 am

Podrimja pati vdekje të natyrshme, trupi i tij të enjten në Prishtinë

Prishtinë, 24 korrik – (E plotësuar) Trupi i pajetë i poetit të njohur kosovar Ali Podrimjes kthehet në atdhe të enjten në mëngjes, më saktësisht në orën 8:55 minuta, kur në aeroportin e Prishtinës parashihet të aterojë aeroplani që vjen nga Franca.Këtë e ka konfirmuar për Koha.net djali i poetit, Petrit Podrimja, i cili kishte udhëtuar në Francë nga Holanda, dhe po asiston në koordinimin e procesit të kthimit të të atit në vendlindje dhe të cilit lajmin ia kanë kumtuar autoritetet zyrtare të Francës.
Podrimja të varroset në Prishtinë, një ditë pasi që trupi i tij të vijë nga qyteti Lodève i Francës ka deklaruar më herët djali tjetër, Dren Podrimja, i cili jeton në Prishtinë. Ai ka thënë se të atin po planifikojnë ta varrosin në varrezat e kryeqytetit, një ditë pasi që trupi i pajetë i tij të ketë mbërritur.
Podrimja ishte gjendur i vdekur në një pyll në anën perëndimore të qyteti të vogël e të qetë francez, Lodeve. Atje Podrimja kishte shkuar për të marrë pjesë në edicionin e 15-të të festivalit të poezisë “Voix de la Méditerranée” (Zërat e Mesdheut).
Ndërkohë, Muhamedin Kullashi, ambasador i Kosovës në Francë tha sot për Portalin KosovaTimes se nga autoritetet franceze e kanë marrë sot konstatimin e parë për rrethanat e vdekjes së poetit Ali Podrimja.
“Konstatimi është ky: Vdekja e Ali Podrimjes nuk ka asnjë shkak të jashtëm, asnjë gjurmë të dhunës të shkaktuar nga jashtë ose në mjedisin ku ai ka lëvizur ato ditë. Ai nuk është rrëzuar, nuk ka asnjë lëndim në trup. Është fjala për një vdekje të natyrshme. Vendi ku është gjetur është një vend i hapur. Nga aty e ka parë qytetin. Aty ku ka qenë i shtrirë, konsulli ynë e ka parë”, tha Kullashi për KosovaTimes.
“Një raport më i plotë do të jetë i gatshëm pas 15 ditësh, ku përfshihen analize më të hollësishme nga ana e ekipeve të mjekësisë ligjore.
Ambasadori Kullashi tha se trupi i poetit Podrimja do të kthehet në Kosovë të enjten. Nga Franca trupi i pajetë i shkrimtarit Ali Podrimja do të bartet me automjet në Gjenevë të Zvicrës. Prej aty, me avion në Prishtinë.
“Janë një varg procedurash të ndërlikuara që duhet të kryhen këtu. Orën e saktë të kthimit të trupit të poetit do ta dimë nesër”, tha ai.
Ambasada e Kosovës në Paris do të organizojë të premten një tubim komemorativ për poetin Podrimja.
“Kemi ftuar korin diplomatik në Paris, përfaqësues të Ministrisë së Jashtme Franceze, shoqërisë civile, intelektualë, poetë, artistë. Poezitë e Ali Podrimjes do të lexohen në gjuhën frënge dhe shqipe”, tha ambasadori Kullashi.

Mon	Tue	Wed	Thu	Fri	Sat	Sun
		1	2	3	4	5
6	7	8	9	10	11	12
13	14	15	16	17	18	19
20	21	22	23	24	25	26
27	28	29	30	31