Ahmadinexhad: Irani ditëve të ardhshme do të shqyrtojë njohjen e pavarësisë së Kosovës

Ahmadinexhad: Irani ditëve të ardhshme do të shqyrtojë njohjen e pavarësisë së Kosovës

Nefail MALIQI
Ekskluzive: Presidenti i Iranit, z. Mahmud Ahmadinexhad, flet për kombëtaren




Liria dhe progresi i arritur në rajon është meritë e popullit të Kosovës dhe gjithë atyre që i kontribuuan paqes dhe stabilitetit për t’u dhënë fund vuajtjeve të një populli i cili ishte me vite të tëra viktimë e një regjimi të egër.

Gjenevë/OKB, 21 prill
Gjatë qëndrimit në Gjenevë, për të prezantuar në konferencën e OKB-së kundër racizmit, presidenti i Iranit z. Mahmud Ahmadinexhad për gazetën tonë ka shprehur satisfaksion për progresin e arritur në Kosovë si dhe për marrëdhëniet e mira me Tiranën zyrtare.
Pyetjes sonë se kur do ta njohë Irani pavarësinë e Kosovës, presidenti Ahmadinexhad për "Bota sot" u përgjigj: Sa i përket çështjes së Kosovës, ne i kemi përcjellë me mjaft përkushtim zhvillimet në rajon dhe mendoj se liria dhe progresi i arritur në rajon është meritë e popullit të Kosovës dhe gjithë atyre që i kontribuuan paqes dhe stabilitetit për t’u dhënë fund vuajtjeve të një populli, i cili ishte me vite të tëra viktimë e një regjimi të egër. Sipas tij, qeveria iraniane përshëndet progresin e arritur viteve të fundit në Kosovë dhe dëshiron që në rajon të mbretërojë paqja dhe stabiliteti, mbi të gjitha, në rajon të funksionojë shteti juridik. “Çështjen e Kosovës ne e kemi parasysh edhe tash pas shpalljes së pavarësisë. Pra, Irani ditëve të ardhshme do të shqyrtojë njohjen e pavarësisë së Kosovës… » tha në vazhdim Ahmadinexhad.
Pyetjes vijuese mbi marrëdhëniet mes Teheranit dhe Tiranës, presidenti iranian z. Mahmud Ahmadinexhad për kombëtaren "Bota sot" është shprehur se "Irani ka marrëdhënie shumë të mira me Shqipërinë, sikur me shumë vende tjera botërore..."