Tri ministri pa portofol

Tri ministri pa portofol

Besnik Boletini
Ndarja e fundit e pushtetit!





Prishtinë, prill
Koalicioni qeveritar nuk ka ide se si do të ndajë hiset e ardhshme të pushtetit, të cilat do të krijohen me miratimin e ligjit për qeverinë. Projektligji për Qeverinë e Republikës së Kosovës, që pritet të miratohet së shpejti i mundëson kryeministrit, që në përputhje me këtë ligj, të emërojë tre ministra pa portofol, por për këtë duhet paraprakisht të vendosë koalicioni se cila parti do të qeverisë me dy nga ministritë e ardhshme.
Sipas nenit 19 i këtij Projektligji ku thuhet: “Ministrat pa portofol janë anëtarët e Qeverisë, të cilët udhëheqin fusha të caktuara të politikës qeveritare, të identifikuara si prioritete, pa qenë në krye të një portofoli klasik ministror. Ata vendosen pranë kryeministrit dhe asistohen nga struktura, të cilat i takojnë Qeverisë”.
Po ashtu nuk dihet ende se çfarë sektorësh do të përfaqësojnë këto ministri, sepse sipas zëdhënësit të qeverisë Memli Krasniqi, ky është vetëm një draft, por pritet që të aprovohet në qeveri dhe të procedohet në Kuvend. “Projektligji është në proces, tashmë ka përfunduar puna, kanë mbetur konsultimet e fundit për t’u diskutuar në një nga mbledhjet e kabinetit qeveritar, dhe nëse aprovohet atëherë procedohet për në parlament, vetëm pas miratimit final do të ketë kapacitete implementimi, mirëpo tash për tash ky është vetëm një projektligj, pra është vetëm tekst”, thotë Krasniqi, duke shtuar se nuk mund të flitet për proceset të tjera, si për rëndësinë, apo cilit subjekt politik do t’i takojnë këta ministra pa portofol. Ndërsa, Ramë Manaj, zëvendëskryeministër dhe sekretar i përgjithshëm i LDK-së, thotë se është shumë herët të flitet për çështjet se me çka do të merren këta ministra, dhe cilit subjekt politik mund t’i takojnë, sepse duhet pritur që projektligji të miratohet, pra të bëhet i aplikueshëm. “Ende nuk dihet se cili do të jetë drafti përfundimtar, që do të aprovohet në qeveri, pra nuk mund të flasim për fushat që do angazhoheshin këta ministra pa miratimin e këtij Projektligji. Ndërsa, sa i përket ndarjes së këtyre ministrave pa portofol, Manaj thotë se është herët të flitet për një gjë të tillë. “Është shumë herët të flitet se si do të ndahen këta ministra pa portofol, njëherë duhet të presim miratimin final të këtij Projektligji, dhe pas miratimit final, do të diskutohet me partnerin në koalicion”, thotë ai, duke mos dashur të jap asnjë lloj premise për ndarjen e pushtetit.
Ky projektligj, është i rëndësishëm për faktin që mundëson të ketë institucione efikase dhe të qëndrueshme, vlerëson zëdhënësi i LDK-së, Vehbi Miftari. “Plotësimi i kuadrit ligjor dhe funksionimi i institucioneve, mbështetur në këtë kornizë ligjore është shumë i rëndësishëm, është pjesë e ndërtimit të demokracisë, po ashtu edhe të institucioneve të qëndrueshme dhe efektive”, thotë zëdhënësi i LDK-së Vehbi Miftari, duke shtuar se ky projektligj është një mundësi shtesë për kabinetin qeveritar që të bëjë politika që nuk janë të mbuluara nga resorët ekzistuese. Ndërsa, sa i përket ndarjes dhe angazhimit eventual të tyre për çështjet përkatëse, zëdhënësi Miftari thotë se pasi që të miratohet ligji, do të bisedohet me parterin e koalicionit për fushat ku ka nevojë të angazhohen këta ministra, dhe se cilit subjekt politik do t’i takojnë. “Ky është vetëm një projektligj, dhe duhet që të kalojë nëpër proceduara të miratimit, duhet që të presim deri te miratimi final, pastaj me partnerin në koalicion do të ulemi dhe të bisedojmë për mënyrat e ndarjes së këtyre ministrave pa portofol”, gjithashtu, Miftari, konsideron se nuk pritet që të ketë ndonjë mosmarrëveshje, apo ngecje të procesit gjatë ndarjes së këtyre ministrave.
Qëndrim të përafërt ka edhe Blerand Stavileci zëdhënës i PDK-së, krijimin e ministrave pa portofol e konsideron të një rëndësie të veçantë për funksionimin sa më të mirë të institucioneve. “Ne besojmë në punën e eksperteve, por nuk dihet akoma se çka do të përmbajë ky projektligj krejtësisht, por edhe këta ministra pa portofol do ta kenë rëndësinë e tyre, për t’i kontribuar zhvillimit të vendit”, thotë Stavileci.
Gjithashtu, edhe PDK-ja, nuk pret që të këtë ndonjë mosmarrëveshje, me partnerin në koalicion LDK-në, për çështjen se si do të ndahen ministrat pa portofol, por edhe PDK-ja, mban qëndrimin se duhet të pritet deri në miratimin e plotë të projektligjit për Qeverinë e Kosovës. “Qëndrimi jonë si parti politike është se duhet pritur miratimin përfundimtar të këtij projektligji, dhe pastaj do të diskutohet me partinë në koalicion, së si do të ndahen këta ministra. Në këtë proces nuk presim që të ketë ndonjë mosmarrëveshje”, u shpreh Stavileci
Aktualisht Qeveria e Kosovës ka 17 ministri, prej të cilëve tetë janë nga radhët e PDK-së, gjashtë nga radhët e LDK-së dhe tre nga komunitetet pakicë.