ZONJA KANCELARE, JU PENALIZONI SHQIPTARËT E BËHENI BODYGUARD I POLITIKANËVE TË KORRUPTUAR ! – Nga Elida BUÇPAPAJ

nga **Agim Gashi** Wed Aug 12, 2015 1:45 pm

ZONJA KANCELARE, JU PENALIZONI SHQIPTARËT E BËHENI BODYGUARD I POLITIKANËVE TË KORRUPTUAR ! – Nga Elida BUÇPAPAJ

Një lajm i fundit na thotë se refugjatët shqiptarë nga Shqipëria e Kosova, të cilëve nuk u jepet e drejta e qendrimit në Gjermani, do të penalizohen edhe me heqjen e të drejtës së vizës Shengen për 5 vjet!
Sikur të mos mjaftojë kalvari që ata vuajnë në vendin e origjinës, ku nuk gëzojnë të drejtën e nevojshme dhe të domosdoshme për të jetuar,siç është e drejta e punës; sikur të mos mjaftohen nga kalvari i ardhjes deri në Gjermani që u kushtoi gjithë kursimet e tyre, disa thonë se kanë shitur edhe shtëpitë e banimit; sikur të mos u mjaftonte kalvari i refugjatit në çadra, në kushte aspak dinjitoze, tani refugjatët shihen nga Europianët, dmth Perëndimi, sikur të jenë asgjë; sikur të mos mjaftonte zhgënjimi prej mosmikpritjes; sikur të mos mjaftonin rrenat e sekserëve që i mashtruan; sikur të mos mjaftonte eksodusi i lejuar nën hundët e shtetit shqiptar apo atij kosovar; sikur të mos mjaftonte papunësia, në Kosovë 70% edhe në Shqipëri e njëjta shifër; sikur të mos maftonte tregu i zi i punës që u jep shans vetëm shkelësave të ligjit dhe nuk ofron kurrgjë për qytetarët e thjeshtë; sikur të mos mjaftonte informaliteti, që e ka degraduar deri në asht sistemin; sikur të mos mjaftonte Toka e Djegur për shqiptarët në vendet e tyre; sikur të mos mjaftonte korrupsioni i klasës politike, pasuruar e majmur e kthyer në oligarki e Ballkanit; sikur të mos mjaftonin hallet e prindërve që nuk kanë asnjë shpresë për të ardhmen e fëmijëve të tyre – dhe sikur të mos mjaftonin të gjitha këto, tani Perëndimi i penalizon refugjatët shqiptarë si “shkelësa ligji” dhe u heq të drejtën e lëvizjes, çka ka mbetur shpresa e fundit për ata.
Tani që u hiqet e drejta e vizës Shengen për 5 vjet, çfarë u mbetet të bëjnë shqiptarëve?
T’i rrëzojnë qeveritë e korruptuara?
Nuk i lejoni ju, dmth Perëndimi,se kinse iu prishet stabiliteti i rajonit, se kështu me papunësi, treg të zi, korrupsion e mafie, rajoni ju ngjan i stabilizuar?
T’i rrëzojnë politikanët e korruptuar?
Nuk i lejoni ju, dmth Perëndimi, sepse me këta politikanë që nëpër kuluaret tuaja i quani mafiozë, ju mbani stabilitetin e rajonit, pra ata de jure janë bashkëpunëtorët tuaj më të ngushtë!
Ju lutem Zonja Kancelare, më thoni se në këto kushte, çfarë duhet të bëjnë Shqiptarët në Kosovë e Shqipëri, ju që jeni Gruaja më e fuqishme e Planetit Tokë, jepiani një leksion këtij populli të vogël, por të lashtë sa Europa dhe pjesë e pandashme e kontinentit plak.
Ju nuk i lejoni gjermanët të vijnë as si turistë as në Shqipëri e as në Kosovë, sepse mendoni sa bukur do të qe sikur ju gjermanët me miliona e miliona të zbarkonit në brigjet e mrekullshme të bregdetit, liqeneve dhe Alpeve shqiptare, por jo, ju nuk e bëni. Kjo do të ndikonte në fuqizimin e turizmit dhe do të zbuste ndjeshëm papunësinë, sikur miliona gjermanë të zbarkonin në brigjet shqiptare si pushues. Mendoni sikur nga turizmi Shqipëria të përfitonte të paktën 10 miliardë Euro, sa mirë do të qe. Do të ishte pare e pastër e fituar me djersë dhe e shpërblyer me kënaqësi nga Deutsche Touristen !
Kaq zor qenka që Shqipëria dhe Kosova me as 40 mijë kilometra katrorë të transformohen në një rajon dhe desitiancion i sigurt Europian ?
Nga ana tjetër Ju zonja Kancelare, dmth Perëndimi, i mikprisni politikanët e korruptuar shqiptarë, u jepni atyre receta se si ata të ndryshojnë, nga ujq të kthehen në dele, dhe ata pasi bëjnë me ju foto dhe pasi i shpërndajnë në Facebook e Twitter, u thonë ju „Tschüss Zonja Merkel“ ose shqipçe „ku të kena pa“, dmth që as që e çojnë në mendje që t’i plotësojnë kërkesat apo t’i ndjekin këshillat tuaja për shtet ligjor, për shtet të së drejtës, për liri tregu, për drejtësi të pakorruptuar etj.etj. Ata bëjnë Spass, qejf, ndërsa populli vuan, kthehet në popull refugjat.
Politikanët e korruptuar shqiptarë bëjnë Spass sepse ju nuk i penalizoni, sepse ju u jepni veç këshilla e receta, që tashmë janë kthyer në një refren monoton, sepse ata këshillat tuaja i hedhin në koshin e plehrave, ndërsa populli mbetet me gisht në gojë. Ju Zonja Merkel nuk zemëroheni nga paturpësia e politikanëve shqiptarë në Shqipëri e Kosovë, por zemëroheni me ata refugjatë të mjerë. Politikanët shqiptarë janë të pabesë, ata nuk e mbajnë fjalën, ata s’kanë asgjë të përbashkët me thelbin e shqiptarëve që karakterizohen nga fjala e dhënë, nga besa, e atyre shqiptarëve që kur Gjermania naziste i çoi në Auschwitz hebrejtë, shqiptarët i morën hebrejtë në shtëpitë e tyre, u dhanë strehë dhe i mbrojtën!
Ju nuk zemëroheni nga paturpësia e politikanëve shqiptarë. Ju vetëm ua ricikloni këshillat e ata me këshillat tuaja krijojnë kullën që i bën të paprekshëm. Ju Zonja Kancelare dmth kur them ju, e kam fjalën gjithmonë për Perëndimin, jeni bërë Bodyguard i sistemit të korruptuar në Shqipëri e Kosovë!
Ju nuk i penalizoni politikanët shqiptarë as në Shqipëri dhe as në Kosovë dhe askund, ju penalizoni ata refugjatë të mjerë, të cilëve në vendin e tyre nuk u ofrohet asgjë, dhe, sikur të mos mjaftojë kjo, ju i penalizoni ata prapë e prapë dhe ua hiqni të drejtën e lëvizjes pikërisht njerëzve më vulnerabël të planetit që janë refugjatët, ndërsa klasa politike shqiptare e kosovare, me paratë e vjedhura popullit dhe me paratë e vjedhura prej ndihmave tuaja, ata me pasaporta diplomatike e me viza Shengen lëvizin e i shpenzojë paratë e tyre të zeza në gjithë botën!
Kjo matematikë nuk shkon Zonja Kancelare!
Dhe duheta ta ndreqni Ju! Dmth Perëndimi !

Mon	Tue	Wed	Thu	Fri	Sat	Sun
		1	2	3	4	5
6	7	8	9	10	11	12
13	14	15	16	17	18	19
20	21	22	23	24	25	26
27	28	29	30	31