Ndryshim kufijsh vetëm për bashkim të shqiptarëve

Ndryshim kufijsh vetëm për bashkim të shqiptarëve

Lirie Hajdari
A është mbyllur çështja e kufijve?




Ndryshimi i kufinjëve mund të vie në shprehje vetëm në funksion të zgjidhjes së drejtë të çështjes së shqiptarëve, bashkimit të tyre në një shtet, ku do të ishte pjesë e saj edhe Kosova Lindore edhe Plava e Gucia e Ulqini, dhe tërë Maqedonia Perëndimore, territore këto të falura nga Evropa dhe Rusia, Serbisë dhe Malit të Zi, e tash edhe nën Maqedoninë, si dhe një pjese jo të vogël të Greqis, në fund të shekullit të 19-të dhe fillim të atij të ‘20-të.
Derisa për çështjen e Kosovës gjithçka ka përfunduar më 17 shkurt të vitit të kaluar, madje duke iu referuar edhe qëndrimit të Grupit të Kontaktit se nuk ka kthim para viteve ’99, nuk ka ndarje të Kosovës dhe nuk ka bashkim me asnjë vend tjetër, ideja e anëtarit të Dhomës së Përfaqësuesve të Kongresit amerikan, Dana Rohrabaker, se e vetmja zgjidhje funksionale për stabilizimin e rajonit do të ishte një shkëmbim territoresh mes Kosovës dhe Serbisë, ka ngjallur reagime edhe në politikën e Kosovës. Ndonëse deklarata vije nga një kongresist amerikan, vendi i të cilit dhe vetë ai personalisht e ka ndihmuar më së shumti Kosovën në zgjidhjen e statusit të saj, përfaqësues të pozitës dhe opozitës idenë e tij për shkëmbim territoresh e konsiderojnë më tepër si ide personale, dhe jo deklaratë zyrtare e Uashingtonit. Madje sipas tyre, një ide e tillë mund të jetë me shumë rreziqe, dhe se çdo lëvizje në këtë drejtim krijon probleme dhe hap Kutinë e Pandorës edhe për vendet tjera.
Kongresisti amerikan citohet të ketë thënë se është e nevojshme të arrihet një mirëkuptim i përgjithshëm, një marrëveshje mes Serbisë dhe Kosovës që të përfshijë një shkëmbim territoresh. “Ato rajone që janë pranë kufirit dhe mbizotërohen nga një popullsi shqiptare, të bëhen pjesë e Kosovës. Ndërkohë, ato zona në Kosovë që ndodhen në veri të lumit Ibër dhe pranë kufirit me Serbinë e që banohen kryesisht nga serbë të bëhen pjesë e Serbisë”, ka thënë Rohrabaker për “Zërin e Amerikës”.