KMDLNJ: EULEX, vepron në bazë të Planit Ahtisari

KMDLNJ: EULEX, vepron në bazë të Planit Ahtisari

Reagim i KMDLNJ-së përkitazi me Protokollin për Bashkëpunim Policor EULEX - Serbi.




Më 17 shkurt 2008, Kuvendi i Kosovës votoi Deklaratën e Pavarësisë, sipas të cilës Kosova u shpall shtet i pavarur në pajtueshmëri të plotë me Propozimin Gjithëpërfshirës për Zgjidhjen e Statusit të Kosovës, të hartuar nga i Dërguari Special i Kombeve të Bashkuara, Martti Ahtisaari

Përkitazi me mundësinë e nënshkrimit të protokollit të bashkëpunimit mes EULEX-it dhe MPB-së të Serbisë, KMDLNJ thotë se ky protokoll bashkëpunimi nuk është befasues sepse, siç thuhet, është në kuadër të kompetencave që ka EULEX-i sipas Planit të Veprimit të Përbashkët, të miratuar nga Këshilli i BE-së, që është baza e këtij misioni, si dhe Rezolutës 1244, të cilës i referohet ky plan.
Teksti i plotë i KMDLNJ-së.
Më 17 shkurt 2008, Kuvendi i Kosovës votoi Deklaratën e Pavarësisë, sipas të cilës Kosova u shpall shtet i pavarur në pajtueshmëri të plotë me Propozimin Gjithëpërfshirës për Zgjidhjen e Statusit të Kosovës, të hartuar nga i Dërguari Special i Kombeve të Bashkuara, Martti Ahtisaari. Deklarata e Pavarësisë mirëpret mbështetjen e vazhdueshme të bashkësisë ndërkombëtare, por "nëpërmjet të pranive ndërkombëtare të themeluara në Kosovë në bazë të Rezolutës 1244 për të zbatuar përgjegjësitë që i janë dhënë sipas Rezolutës 1244 dhe Planit të Martti Ahtisaarit".
Deklarata për Pavarësinë e Kosovës afirmon në mënyrë të qartë se Kosova do të veprojë në pajtueshmëri me parimet e së drejtës ndërkombëtare dhe rezolutat e Këshillit të Sigurimit të Kombeve të Bashkuara, përfshirë Rezolutën 1244 (1999). Sikundër dihet, Rezoluta 1244 e garanton sovranitetin dhe integritetin territorial të RFJ-së, e cila nuk ekziston më, por ekziston Serbia. E, neni 60 i Kartës për krijimin e Unionit Serbi-Mali i Zi thotë se në rast të shpërbërjes së këtij unioni, Serbia do të jetë trashëgimtare e Rezolutës 1244 dhe të gjitha dokumenteve ndërkombëtare që kanë të bëjnë me Kosovën.
Trembëdhjetë ditë para shpalljes së pavarësisë së Kosovës, pra më 4 shkurt 2008, Këshilli i Bashkimit Evropian ka miratuar Veprimin e Përbashkët për vendosjen e Misionit të Bashkimit Evropian për Sundim të Ligjit në Kosovë (EULEX) në përputhje me Rezolutën 1244. Sipas Veprimit të Përbashkët, EULEX-i duhet të plotësojë mandatin e tij përmes monitorimit, mentorimit dhe këshillimit, por duke ruajtur për vete edhe disa përgjegjësi të caktuara ekzekutive.
Protokolli për Bashkëpunim Policor, që pritet të nënshkruhet mes EULEX-it dhe MPB-së së Serbisë, thotë shprehimisht se palët dakordohen të bashkëpunojnë në pajtim me Rezolutën 1244, Veprimin e Përbashkët të Këshillit të BE-së dhe Raportin e Sekretarit të Përgjithshëm të Misionit të Kombeve të Bashkuara në Kosovë të 24 nëntorit 2008.
Ky protokoll thotë se palët do të ndihmojnë njëra-tjetrën rreth aktiviteteve të palejuara, kriminale apo aktiviteteve tjera të paligjshme në vijën kufitare/kufirin administrativ. Pra, për Serbinë dhe Misionin e BE-së në Kosovë (EULEX) kufiri mes Kosovës dhe Serbisë është kufi administrativ, sepse i tillë është edhe për Rezolutën 1244.
Për KMDLNJ-në Protokolli për Bashkëpunim Policor mes EULEX-it dhe MPB-së së Serbisë, është në kuadër të kompetencave që ka EULEX-i sipas Planit të Veprimit të Përbashkët, që është baza e këtij misioni dhe Rezolutës 1244, të cilës i referohet ky plan. Për KMDLNj-në ky protokoll për bashkëpunim policor nuk është aspak befasues, ashtu sikurse që nuk do të jetë befasuese kur në të ardhmen e afërt Forca e Sigurisë së Kosovës dhe Ministria e Mbrojtjes e Republikës së Serbisë do të themelojnë Komisionin e Përbashkët Implementues, apo kur do të fillojë bashkëpunimi mes komunave të caktuara të Republikës së Kosovës me komuna, institucione apo agjenci qeveritare të Republikës së Serbisë, ashtu siç parasheh Propozimi Gjithëpërfshirës për Zgjidhjen e Statusit të Kosovës, i hartuar nga i Dërguari Special i Kombeve të Bashkuara, Martti Ahtisaari.