Kërkohet zbardhja e fatit të ideatorit, Ukshin Hoti

Kërkohet zbardhja e fatit të ideatorit, Ukshin Hoti

Familjarët kërkojnë nga institucionet angazhim më të madh për zbardhjen e fatit të Ukshin Hotit.





Ukshin Hoti

Familja e Ukshin Hotit apelon tek institucionet e Kosovës që ta marrë më seriozisht kërkimin e fatit të veprimtarit të çështjes kombëtare Ukshin Hoti. Ai nuk e ka merituar që të figurojë i zhdukur për dhjetë vite rresht, thanë të afërmit e tij, gjatë vizitës që Albin Kurti i bëri sot kësaj familje.Lideri i Lëvizjes “Vetëvendosja”, Albin Kurti, i shoqëruar nga aktivistë të tjerë, vizitoi sot familjen e veprimtarit të çështjes kombëtare Ukshin Hoti, familjarët e të cilit tash e dhjetë vite vazhdojnë të jetë këmbëngulës në kërkesat e tyre për zbardhjen e fati të tij dhe procesi të mbyllet.Kjo është kërkesa që e motra e Ukshinit vazhdon ta potencojë pandërprerë duke nënvizuar se shumë pak është bërë nga institucionet e Kosovës për të ditur se ç’ndodhi me vëllain e tyre.Ndërkaq, lideri i Lëvizjes “Vetëvendosja”, Albin Kurti, gjatë bisedës me familjarët e patriotit Ukshin Hoti, theksoi se figura e tij ishte dhe do të mbetet burim frymëzimi për të gjithë brezat e kombit shqiptarë. Sipas tij, e gjithë elita e politikës përballë tij duken shumë të vegjël. Ai nuk ka nguruar të hedhë edhe kritika ndaj Qeverisë së Kosovës se nuk po i bën presionin e duhur Serbisë, për të zbardhur fatin e një njeriu që aq shumë bëri për kombin tonë.
Sipas Kurtit, Serbia është ajo e kohës së Millosheviqit dhe ka ndryshuar vetëm para syve të Brukselit, por jo edhe para syve të shqiptarëve. Gjatë kësaj vizite në familjen e Ukshin Hotit, lideri i Lëvizjes “Vetëvendosja” ka vizituar edhe Varrezat e dëshmorëve dhe viktimave të luftës në Krushë të Madhe.