Rezervistët ojëqëistë në misionet e huaja

Rezervistët ojëqëistë në misionet e huaja

Editoriali

Është e njohur thënia se “burgu nuk do të ishte i mundimshëm pa të burgosur”. Pushteti nuk do të pësonte defekte pa prishjen e veglave të motorit të tij, në këtë rast aparatit. Aparatçikët janë “vegla” që mundësojnë sistemin e veprimit të aparatit dhe funksionimit të makinës. Diminutivi “aparatçikë” nuk nënkupton vetëm funksionimin e një strukture të organizuar politike brenda aparatit pushtetar ose shtetëror, por ai është emërues i grumbullit të akorduar për të vepruar në zbatimin e qëllimeve të parashtruara që dalin jashtë rregullave dhe ligjeve të veprimi normal, “kriterit të veprimit sipas standardeve ligjore”. Janë ata krimbat e vegjël që e hanë zemrën e motorit të pushtetit dhe e bllokojnë atë duke e penguar funksionin e tij ekzekutiv, veprues, zbatues. Aparatçikët për nga natyra dhe karakteri janë individë inferiorë, nënshtrohen lehtë, janë të dëgjueshëm kështu që nuk mund të pengojnë vendime destruktive që mund të paraqitën në qeverisje. Nuk thuhet “nuk mund të pengojnë”, por nuk duan të pengojnë, sepse ajo edhe do t’i përjashtonte nga natyra e karakterit të tyre servil. Jo më parë, sepse nuk kemi pasur shtet e pushtet ekzekutiv, për që dhjetë vjet, pra, qëkur improvizohet de facto një inxhiniering teknokratik i “konsolidimit” të institucioneve, praktikantët e administratës janë imponuar në zënien e vendeve të rëndësishme të punës në administratë, duke mos pasur (normalisht) asnjë fije tradite ose dije teorike mbi funksionimin e aparatit të pushtetit dhe shtetit. Prandaj situata anomalie që mbretëron sot në administratën e shtetit (tri shtyllave kryesore të tij) është imponuar pikërisht nga mungesa e traditës dhe kuadrit, por më së shumti është imponuar me kriterin e vlerësimeve “moralo-politike” që i ka kërkuar administrata e UNMIK-ut dhe OSBE-së. Nëse lexoni “konkurse” që botonte dikur pushteti serb për administratorë shqiptarë, do të shihni se kërkoheshin vlerat “moralo-politike” e jo ato shkollore-profesioniste. Nëse merrni fletaplikacionet për zënie punë në administratën shtetërore dhe pushtetare, e mos hyni në “organizata” të tjera ndërkombëtare ojqiste, atëherë bindesh se kërkesën për oferitimin e “vlerave” e ka përpiluar një udbash tipik që ka bërë stazh të gjatë në inkriminimin e shqiptarëve duke i ndarë në “shqiptarë të ndershëm” dhe të atillë “të pandershëm”! Por sidoqoftë, është një fakt i dhembshëm që dita-ditës po zbulon mikrobet që brejnë projektin e shteformimit, mikrobet aparatçikë që tashmë janë pozicionuar fuqishëm, sepse janë tipare të grumbullit, dhe vetëm aty funksionojnë, në mënyrë të akorduar. Këta detyrojnë pushtetin dhe shtetin të merret me vetveten, në çastet kur shteti duhet të koncentrohet në shtetbërje përballë atyre që e sfidojnë këtë shtetbërje, duke vënë interesat e tyre private mbi çështjen shtetërore.