Firmoset pakti, Meta zv/kryeministër e ministër i Jashtëm

Firmoset pakti, Meta zv/kryeministër e ministër i Jashtëm

Kryeministri dhe Kryetari i Partisë Demokratike të Shqipërisë, zoti Sali Berisha nënshkruan me Kryetarin e Lëvizjes Socialiste për Integrim, zotin Ilir Meta marrëveshjen e koalicionit të ri qeverisës




Në qeverinë e ardhshme të Shqipërisë, ministër i jashtëm e zëvendës kryeminsitër, do të jetë Ilir Meta, lider i LSI-së. Kjo u bë e ditur nga kryeministri Sali Berisha, pas nënshkrimit të marrëveshjes për qeverisje ndërmjet tij e zotit Meta.


TIRANË (Bota sot) - Sot, Kryeministri dhe Kryetari i Partisë Demokratike të Shqipërisë, zoti Sali Berisha së bashku me Kryetarin e Lëvizjes Socialiste për Integrim, zotin Ilir Meta dhe përfaqësues të dy forcave politike PD dhe LSI nënshkruan në prani të mediave, marrëveshjen e koalicionit të qeverisjes për 4 vitet në vijim.
Pas nënshkrimit të marrëveshjes Kryeministri Berisha u shpreh:
“Sot, në praninë tuaj dhe ekraneve të mbarë shqiptarëve, Partia Demokratike dhe Lëvizja Socialiste për Integrim firmosin marrëveshjen e koalicionit të qeverisjes së 4 viteve që vijnë dhe në vazhdim, marrëveshje kjo, që ka si qëllim kryesor krijimin e një qeverie të integrimit evropian të Shqipërisë, pasi siç e dini projekti më kryesor, më kardinal, i mbarë shqiptarëve është shndërrimi në realitet i ëndrrës së tyre, integrimi në BE.

Kryeministri dhe Kryetari i Partisë Demokratike të Shqipërisë, zoti Sali Berisha nënshkruan me Kryetarin e Lëvizjes Socialiste për Integrim, zotin Ilir Meta marrëveshjen e koalicionit të ri qeverisës.
Marrëveshja ka dhe një kuptim politik të madh, pasi është një marrëveshje me spektër të gjerë, në të cilën gjejnë veten të përfaqësuar qytetarët që votuan djathtas dhe qendrën e djathtë, por dhe qytetarët që votuan majtas gjejnë në qeverinë ardhshme një shkrirje të premtimeve dhe zotimeve elektorale, të parimeve të dy programeve, çka bën që qeveria të ketë një program shumë më të pasur dhe të përfaqësojë një spektër më të gjerë interesash të zgjedhësve shqiptarë.
Angazhimi ynë, në sfondin politik është një koalicion i suksesshëm në qeverisjen e vendit, eficent, është një koalicion, i cili do tu japë shqiptarëve brenda vitit të parë, të mandatit të tij, në përputhje me premtimet, vendimin për heqjen e vizave dhe lëvizjen e tyre të lirë. Do tu japë shqiptarëve nëpërmjet reformave të thella statusin e vendit kandidat për anëtarësim në Bashkimin Evropian. Do tu japë shqiptarëve një seri reformash të thella, me te cilat Shqipëria në krye të 4 viteve do të ketë shënuar ndryshimet më të mëdha.
Koalicioni është i angazhuar për një seri reformash institucionale dhe reformën zgjedhore, në të cilën nuk do të ketë persekutim me ligj apo diskriminim me ligj të faktorëve të rëndësishëm, të jetës politike shqiptare, siç ndodhi në këto zgjedhje. Me Lëvizjen Socialiste për Integrim ne angazhohemi për të bërë të gjitha përpjekjet për ndryshimin në tërësi të kodit elektoral dhe rregullave në mënyrë që përfaqësimi të jetë më i drejtë , më i ndershëm dhe jo persekutues e përjashtues siç ishte rasti i këtyre zgjedhjeve. Theksova se domethënia e koalicionit është jo vetëm tek qeverisja, domethënia e koalicionit është tek suksesi në zgjedhjet e ardhshme. Ne angazhohemi që në zgjedhjet e ardhshme të vitit 2011 të dalim dhe të fitojmë së bashku, sikundër hedhim bazat për një koalicion afatgjatë të 2013-s dhe në vazhdim.

KM Berisha gjatë drekës me kabinetin qeveritar 02/09/2009
Ne kemi rënë dakord me kryetarin e LSI dhe përfaqësues të kësaj partie që në përputhje me marrëveshjen të cilën unë i citova disa nga nenet e saj, që LSI si një forcë politike esenciale për qeverisjen dhe koalicionin do të ketë në qeverinë e ardhshme kryetarin e saj, zotin Ilir Meta Zëvendëskryeministër të vendit dhe Ministër të Punëve të jashtme. Në autoritetin e kësaj partie është emërimi në postin e Ministrit të Ekonomisë, Energjetikës dhe Minierave dhe Ministrisë së Shëndetësisë, të drejtuesve të saj që ajo i gjykon më të arsyeshëm, gjithashtu një nga deputetët e kësaj partie do të jetë në postin e nënkryetarit të parlamentit të vendit.

Në të gjitha nivelet e tjera të qeverisjes, LSI do të ketë 20 % të saj. Me zotin Meta kemi rënë dakord me mirëkuptim të plotë, se nuk bëhet fjalë për asnjë lloj ndarje, për sa i përket shërbimit civil. Interesi ynë i përbashkët është që ky shërbim të konsolidohet gjithnjë e më shumë, si një shërbim në interesin më të mirë të qytetarëve shqiptarë, të shtetit shqiptar. Unë dua ta falënderoj zotin Meta për seriozitetin e madh me të cilin trajtoi ftesën e PD-së, frymën e hapur në të gjithë procesin e negocimit, shkallën e lartë të përgjegjësisë që karakterizoi këtë proces, i cili kurorëzohet me sukses të plotë me firmën e vendosur së bashku para jush, në një marrëveshje historike, për sa i përket spektrit politik shqiptar.
Edhe një herë faleminderit”