Rama po stukon PS-në nga tërmeti post-zgjedhor

Rama po stukon PS-në nga tërmeti post-zgjedhor

Lavdrim Lita


Sa për fillim, duhet thënë se dje, katër persona përfunduan në prangat e Antikrimit Ekonomik në Tiranë, pasi u kapën gjatë operacionit të koduar “Stuko”. Ata dyshohej se merreshin me falsifikim materialesh ndërtimi.
Por pasi keni parë titullin, ndokush mund të pyesë se ç’lidhje ka Edi Rama me stukon e sekuestruar? Kjo pyetje do përgjigje. Ne nuk e dimë se ku dhe kujt ia shisnin stukon këta të katërt, por gjithsesi dimë se Edvini po kërkon stuko për të mbyllur të çarat, plasat, gollat, gropat e kallamat e tavanit, si dhe shkallët, nga tërmeti elektoral. Rama shkon në Gjoricë - dhe mirë bën, por në shtëpinë e tij politike është bërë nami. PS po krijon një krater që do pak kohë të bëhet një grand canyon nga një meteorit në politikë, siç është Blushi. Ai kërkon ta fshehë këtë realitet me mjeshtëri fasadash e bojkotesh, por a fshihet dielli me shoshë?
Mirëpo kjo lojë fasadash, siç u pa edhe gjatë kongresit të jashtëzakonshëm të socialistëve, ku Egoarku zgjodhi bunkerizimin e debatit demokratik, nuk funksionoi. Kjo edhe falë zotësisë së kategorisë sonë mediatike, që u infiltruan e nxorën shoqërinë nga terri informativ. Rama po tregon se është i vetmi politikan që nuk mëson nga gabimet e tij. Edhe në këto momente që po konsumohet turi elektoral përpara zgjedhjeve brenda partisë kërkon ta stukojë mirë e mirë fasadën e demokracisë së PS nga të çarat fiziologjike. Ai nuk ulet të analizojë dështimin me arkitekturën bashkë me anëtarë e shtëpisë politike, por bën sikur ka gjithçka në kontroll, është Ai njëshi, edhe pse çatia po pikon.
Këto plasaritjet që po pëson figura e tij po i vijnë kryesisht nga kazma e “mendimit ndryshe” me diarkinë Ben Malaj dhe fjalët hithra të Ben Blushit, të cilët çdo ditë dalin e kundërshtojnë me sukses Ramën, me qëllimin e pafshehur për ta shembur egoarkun nga froni. Merret me mend se ata, çdo ditë, me një tufë fjalësh plot gjembaçë gërvishtin figurën e Ramës në publik. Ndërsa këta fishkëllejnë me tam-tame, Rama - dinak për nga natyra - po i fut kolona të tjera ceparakthi, d.m.th më të forta, fronit të tij në PS. Pa leje KRT-je, kuptohet. Usta i kësaj argjinature është vetë ai, por në procesin e punës së meremetimit, ai ka marrë një punëtor, një hyzmeqar krahu që t’i bëjë llaçin. Materialet e ndërtimit ua siguron vëllai nga Fieri. Besoj e keni kuptuar se kë ka zgjedhur për të bërë gati stukon? Po! Padyshim, është Maqo Lakori, ky personazh grotesk që shëtit në prehrin e Ramës cep më cep të Shqipërisë, pa iu prishur makiazhi i cergosur. Në të vërtetë, nuk di të bëjë kalkulime politike përfituese, por Maqo Lakrori, më shumë se po fiton, po humb. Ai po humb dinjitetin përballë një garë që përditë e më shumë po i ngjan një festivali humori në salla të mbyllura. Aty natyrisht nuk flitet për platformë brenda PS, por njëri i bie patkoit e tjetri gozhdës, duke luajtur cicmic në publik. Sa bajate janë ato mbledhjet elektorale që ngjajnë më një cirque du soleil, ku njeri është i shkurtri dhe tjetri i gjati. Kontrast është gjatësia.
Sa për platformë politike, Lakrori thotë se do të bjerë qeveria Berisha, në vend që të predikojë rënien e “qeverisë Rama” brenda PS, pasi aty duhet ta ketë mendjen... Por jo. Nga ana e vet, Rama është më bombastik në fjalimet e degdisura prej rreperi, i cili nuk këndon më këngën “Çohu”, as “Ulu”, por “Bojkot”. Përveç bojkotit qorr, ai deklaron se do të bëjë edhe protesta. Mirëserdhe në shesh Skënderbej! Ah, po, më falni, ka një problem... Ai nuk e mbush dot sheshin me militantë. Duke mos pasur tension politik, sepse perceptimi që e majta me kryqtar Ramën nuk ka fituar, edhe vetë elektorati nuk do ta ndjekë. Ai nuk është Jezu Krishti, paçka se bën përditë liturgjinë vox clamantis in deserto (Një njeri që bërtet në shkretëtirë).
Po kërkon të krijohen kushte artificiale për të krijuar një tension politik artificial, me qëllim forcimin sa më shumë të polarizimit mes krerëve Rama-Berisha. Egoarku nuk lexon, ndaj sillet me atë ç’i ka ngelur; një gjuhë dhune, pa takat real.
Përsa u përket protestave, kam qejf të shikoj se sa veta do t’i shkojnë në mitingje Edvinit, kur ky nuk na jep as përshtypjen se i beson “kauzës” se vet personale. Kam qejf të shikoj Egoarkun teksa bën politikë aktive dhe të mos fshihet mbas fustanellave të zëdhënëseve të Bashkisë (apo të selisë ylberiste). Rama duhet të bëjë politikë në parlament me të deleguarit e qytetarëve, me komisione hetimore, me iniciativa popullore etj. Deputetët nuk janë pasuri personale e Edvinit, nuk janë robotë që lëvizin me komandim. Edhe pse këta të PS po duken të tillë, kam besim se ata do ushtrojnë presionin e duhur që e majta t’u rikthehet tryezave të politikës parlamentare. Edi Rama kujtoi se me këtë zgjedhje po bën diversitet në politikë, por në të vërtetë kjo stratagjemë po kthehet në një diversion okult. Tashmë shumëkush po e kupton se ai nuk di të bëjë politikë të mirëfilltë - meqë ka karakter emocional - në një mejdan ku kërkohet të jetë racional.