Tërmeti 'rrafshoi fshatra'

Tërmeti 'rrafshoi fshatra'



Operacionet e kërkimit vazhdojnë
Ekipet e shpëtimit që kanë arritur në fshatrat e largët të goditur nga tërmeti në Indonezi po njoftojnë për qindra viktima të reja.
Zyrtarët thonë se tërmeti shkaktoi rrëshqitje toke dhe rrafshoi të paktën 3 fshatra në perëndim të Sumatrës.
Në qytetin kryesor të zonës, Padang, një i mbijetuar dërgoi nga poshtë rrënojave të një ndërtese një mesazh me telefon celular për të thënë se disa vetë ishin ende gjallë.
Autoritetet presin që numri i viktimave nga tërmeti të jetë me mijëra.
Si pjesë e operacionit të ndihmës, Australia ka dërguar një luftanije me ekip të plotë mjekësor në bord.
Operacione shpëtimi
Korrespondentja e BBC-së në Padang, Rachel Harvey, thotë se
rezidenca e guvernatorit të qytetit është konvertuar në qendër të operacionit humanitar.
Në oborrin e saj kanë ngritur çadra ekipet e shpëtimit nga Japonia dhe Singapori.
Brenda ekspertë nga mbarë bota mblidhen në grupe për të shkëmbyer informata.
Korrespondentja jonë thotë se vetëm tani po mësohet ajo që ka ndodhur përtej qytetit.
Njoftohet se disa fshatra janë rrafshuar pjesërisht nga rrëshqitjet e dherave dhe në disa zona mund të shkohet vetëm me helikopter.
Lajmi i mirë, shton ajo, është se helikopterë të tjerë janë në rrugë e sipër.