Sejdiu falënderoi Obamën për përkrahjen e SHBA-ve dhënë Kosovës

Sejdiu falënderoi Obamën për përkrahjen e SHBA-ve dhënë Kosovës

Bota sot, Nju-Jork



Presidenti Sejdiu gjatë takimeve me zyrtarë të lartë amerikan

Presidenti Sejdiu e ka falënderuar Presidentin Obama për mbështetjen e deritashme që SHBA i kanë dhënë dhe po i japin Kosovës, si dhe shprehu besimin se marrëdhëniet e veçanta mes Republikës së Kosovës dhe SHBA-ve do të forcohen edhe më tutje.


Nju Jork, Prishtinë - Presidenti i Republikës së Kosovës, dr. Fatmir Sejdiu ka zhvilluar një takim të shkurtër me Presidentin e Shteteve të Bashkuara të Amerikës, Barak Obama, në një pritje të organizuar nga Presidenti i SHBA ve. Presidenti Sejdiu e ka falënderuar Presidentin Obama për mbështetjen e deritashme që SHBA i kanë dhënë dhe po i japin Kosovës, si dhe shprehu besimin se marrëdhëniet e veçanta mes Republikës së Kosovës dhe SHBA-ve do të forcohen edhe më tutje. Presidenti Sejdiu dhe zonja e parë në një pritje të organizuar nga Presidenti i SHBA-ve
Presidenti Sejdiu gjithashtu u takua edhe me Xhems Xhons (James Jones), Këshilltar i Presidentit Obama për Siguri Kombëtare, si dhe me përfaqësues të lartë të Departamentit të Shtetit, ndër të cilët edhe Ndihmëssekretari i Shtetit për Evropë, Fillip Gordon. Gjatë kësaj pritjeje, Presidenti Sejdiu pati biseda të frytshme edhe me shumë burrështetas të tjerë, ndër të cilët edhe me Kryeministrin e Spanjës, Presidentin e Qipros, Kryeministrin e Nepalit, Kryeministrin e Grenadës, zëvendëskryeministrin e Xhamajkës, Ministrin e Jashtëm të Portugalisë, Kryeministrin e Malit të Zi, Presidentin e Maqedonisë dhe Kryeministrin e Turqisë. Në vijim të vizitës në SHBA, Presidenti Sejdiu do të vazhdojë takimet bilaterale me burrështetas të tjerë të cilët marrin pjesë në Asamblesë Përgjithshme të OKB-së.



Presidenti Sejdiu mbajti fjalë rasti në Pritjen Vjetore të Liderëve Ballkanikë
Presidenti i Republikës së Kosovës, dr. Fatmir Sejdiu, në kuadër të aktiviteteve gjatë vizitës së Shtetet e Bashkuara të Amerikës, ka mbajtur një fjalë rasti në Pritjen Vjetore të Liderëve Ballkanikë, të organizuar nga Rutgers Institute.Të pranishëm në takim ishin Ekmeleddin Ihsanoglu, Sekretar i Përgjithshëm i Organizatës së Konferencës Islamike, Ilir Meta, Ministër i Jashtëm i Shqipërisë, Stjepan Mesiq, President i Kroacisë, Haris Silajxhiq, anëtar i Presidencës së Bosnjës dhe Hercegovinës, Ahmet Davutoğlu, Minister i Jashtëm i Turqisë e liderë të tjerë.

Në takim ishte i pranishëm edhe Ministri Jashtëm i Republikës së Kosovës, Skender Hyseni, si dhe anëtarët tjerë të delegacionit të Kosovës.
Presidenti Sejdiu foli para liderëve ballkanikë në Rutgers Institute për zhvillimet dhe të arriturat e rëndësishme në vendin tonë pas pavarësimit të Republikës së Kosovës. Ai vuri theksin në përpjekjet e rëndësishme që po i bëjnë liderët dhe institucionet e Republikës së Kosovës për të siguruar sa më shumë njohje për shtetin e ri, anëtarësimin në shumë institucione të rëndësishme dhe synimin për anëtarësim në sa më shumë institucione të rëndësishme ndërkombëtare.
Presidenti Sejdiu gjithashtu theksoi rëndësinë e qasjes paqësore dhe integruese të të gjitha shteteve të Ballkanit. Në këtë kontekst ai përmendi edhe rëndësinë e madhe që ka bashkëpunimi rajonal, si një kusht shumë i rëndësishëm për stabilitet në rajon dhe për ecje të përbashkët drejt integrimeve në institucionet euroatlantike.
Gjithashtu, nisur nga shembulli i Republikës së Kosovës, Presidenti Sejdiu ka theksuar si një faktor shumë të rëndësishëm të stabilitetit dhe prosperimit të rajonit respektimin e komuniteteve pakicë në çdo shtet ballkanik.

Presidenti i Republikës së Kosovës, dr.Fatmir Sejdiu, u takua me emirin e Katarit, Sheikh Hamad Bin Khalifa Al Thani.

Presidenti Sejdiu e informoi atë për zhvillimet e dukshme pas pavarësisë së Kosovës, duke përfshirë edhe themelimin dhe funksionalizimin e institucioneve shtetërore të Republikës.
Ai gjithashtu e falënderoi emirin Al Thani për mbështetjen që shteti i Katarit i ka dhënë Republikës së Kosovës, sidomos në diskutimet në Këshillin e Sigurimit të OKB-së, si dhe kërkoi që shteti i Katarit ta njohë Kosovën si shtet të pavarur dhe sovran. Sejdiu e njoftoi emirin Al Thani edhe për vizionin e Kosovës për një të ardhme euroatlantike, duke mbajtur tragjeditë e kaluara vetëm si pjesë e memories.Emiri Al Thani premtoi që shteti i tij do të bëjë çdo gjë që është e mundur që njohja e Republikës së Kosovës të realizohet sa më parë. Dy burrështetasit diskutuan edhe çështje që i takojnë edhe sferave të tjera, siç janë arsimi dhe ekonomia.Në takim ishte i pranishëm edhe ministri i Jashtëm i Republikës së Kosovës, Skender Hyseni.