Policia institucioni më transparent

Policia institucioni më transparent

Policia e Kosovës institucioni me i hapur, prokuroria institucioni me i mbyllur

Prishtinë, Lëvizja FOL, Nisma e të Rinjve për të drejtat e njeriut, dhe Qendra për Politika dhe Avokim, në Ditën ndërkombëtare të së Drejtës për të Ditur, kanë shpallur Policinë e Kosovës si institucionin me të hapur, ndërsa Prokurorinë Publike të Kosovës si institucionin më të mbyllur. Në shënimin e kësaj ditë, këto OJQ kanë mbajtur një konferencë për media para Drejtorisë së përgjithshme të Policisë së Kosovës.
Ramadan Ilazani koordinator i Lëvizjes FOL, tha se pas një hulumtimi të bërë Policia e Kosovës rezulton së është institucioni më i hapur dhe me transparent në raport me mediat dhe publikun. “Zyra për informim e Policisë së Kosovës ka qenë një shembull i mirë në dhënien e informacioneve zyrtare për media dhe publikun. Kjo zyre ka qenë e gatshme në shumicën e rasteve i është përgjigjur kërkesave të gazetarëve dhe në këtë mënyrë ka arritur të krijojë praktika të mira të transparencës dhe të komunikimit me publikun duke ndërtuar kështu edhe raporte shumë të mira me mediat dhe në këtë mënyrë edhe me publikun”, tha ndër të tjera Ilzai. Më këtë rast këto OJQ i dhanë një mirënjohje zyrës për informim të Policisë së Kosovës.
Në emër të Policisë së Kosovës foli kapiten Baki Kelani, shef i zyrës për marrëdhënie me publikun dhe media, ai falënderoi këto OJQ për këtë vlerësim dhe shprehu përkushtimin që edhe më shumë të punohet në drejtim të transparencës.
Edhe Prokurorisë Publike të Kosovës ju nda një mirënjohje, për mos transparencë. “Prokuroria Publike e Kosovës është institucioni me i mbyllur dhe me jo transparent, ku informacioni nuk jepet në shumicën e rasteve nuk ka konfirmim zyrtar. Në prokurorinë Publike të Kosovës mungon zyra për informim dhe zëdhënësi i këtij institucioni”, theksoi Koordinatori Ilazi.
B. Boletini