Greqia reagon kundër paraqitjes së Ivanovit në OKB

Greqia reagon kundër paraqitjes së Ivanovit në OKB






Gjorge Ivanov


Greqia përmes ambasadorit të saj në Kombet e Bashkuara, Anastasios Micijalis edhe zyrtarisht ka dorëzuar reagimin me shkrim lidhur me paraqitjen e Presidentit Gjorge Ivanov para Asamblesë së Përgjithshme të Organizatës Botërore. Në dokumentin me shkrim që iu dorëzua kryesuesit të Asamblesë së 64-të të Përgjithshme, Greqia reagon ndaj Ivanovit, e cili në fjalimin e vet e ka përdorur emrin kushtetues Republika e Maqedonisë, në vend të referencës së parashikuar me rezolutat 817 dhe 845 të Këshillit të Sigurimit të Kombeve të Bashkuara. “Autoritetet e IRJM gjatë viteve të kaluara treguan se nuk i respektojnë rezolutat e Këshillit të Sigurimit dhe marrin një qëndrim kundër arritjes së kompromisit në bisedimet bilaterale nën mbikëqyrjen e Kombeve të Bashkuara. Me këtë pengojnë gjetjen e zgjidhjes për dallimet lidhur me emrin midis dy shteteve”, thuhet në reagimin e Athinës. Si mosrespektim të Marrëveshjes së Përkohshme të vitit 1995 dhe pengim i bisedimeve për arritjen e zgjidhjes për emrin, Athina e vlerëson edhe padinë e ngritur nga Maqedonia kundër Greqisë para Gjykatës Ndërkombëtare të Drejtësisë në Hagë, për bllokimin e anëtarësimit të Maqedonisë në NATO në Samitin e Bukureshtit. Presidenti Ivanov të premten në fjalimin e tij para Asamblesë së Përgjithshme të Kombeve të bashkuara theksoi se Maqedonia është e gatshme për zgjidhje lidhur me emrin gjë që paraqet një kompromis të kuptueshëm dhe korrekt, që nuk do ta shkel identitetin nacional, kulturor dhe gjuhësor.