Berisha: Kosova e pavarur, faqja më e ndritur në historinë e kombit

Berisha: Kosova e pavarur, faqja më e ndritur në historinë e kombit





Kosova, në 130 vitet e fundit, ka qenë gjithnjë djepi i lëvizjeve të mëdha kombëtare emancipuese të kombit shqiptar, i Lidhjes së Prizrenit dhe kryengritjeve të mëdha që sollën Pavarësinë e Shqipërisë. Por, Kosova e lirë dhe e pavarur, është faqja më e ndritur në historinë e kombit është kryevepra e tij politike më madhështore që nga koha e Skënderbeut, gjer ne ditët e sotme, ka thënë të martën kryeministri i Shqipërisë, Sali Berisha, në fjalën e tij para deputetëve të Kuvendit të Kosovë.
Berisha nga platforma e Kuvendit të Kosovës, ka shprehur një nderim të veçantë të shpreh për – siç u shpreh ai - burrin e madh të Kosovës dhe kombit shqiptar, arkitektin e pavarësisë së Kosovës, presidentin Ibrahim Rugova.

Rugova, sipas Berishës, me përfaqësimin e civilizuar, guximin, urtësinë dhe mençurinë e tij bëri që Kosovën ta donin dhe ata që s’e deshnin, ta njihnin edhe ata që nuk e kishin njohur. “Ky burrë vigan i kombit tonë, ndërtoi në kushtet e okupacionit të egër në Kosovë pushtetin paralel dhe çështjen e drejtë të shqiptarëve të Kosovës e ngriti nga një barakë e vogël në qendër të Prishtinës, deri në zyrën ovale të presidentit të SHBA dhe Kancelaritë e mëdha të Evropës, si dhe udhëhoqi me guxim dhe sukses Kosovën gjer në prag-shpalljen e pavarësisë së saj”, tha Berisha.

Berisha gjithashtu u shpreh se, ai dhe çdo shqiptar përulet me nderimin më të madh për komandantin legjendar, tribunin e lirisë, Adem Jashari, që me sakrificën e tij të madhe ndezi dritën e lirisë dhe pavarësisë së Kosovës, si dhe para të gjithë luftëtarëve të lirisë, djemve dhe vajzave të Kosovës që luftuan në fundin e viteve ’90 në fushat, malet, kodrat, fshatrat dhe qytete e këtij vendi, dhe fituan luftën e fundit çlirimtare në Evropë, duke vendosur sakrificën e tyre sublime në themelet e Kosovës së lirë dhe të pavarur. “Ata mbrojtën nderin dhe dinjitetin kombëtar të çdo shqiptari, kombi do t’ju jetë mirënjohës për jetë”, tha Berisha.
Pavarësia e Kosovës, vijoi ai më tëj, shënoi fundin e njërës prej padrejtësive më të mëdha jo vetëm të Ballkanit por të gjithë Evropës ndaj dhe pas rënies së Murit të Berlinit, shpallja e pavarësisë së Kosovës, është ngjarja më e madhe në historinë e lirisë, jo vetëm të kombit shqiptar dhe rajonit, por dhe të mbarë Evropës, pas Luftës së Dytë Botërore.

Po në këtë seancë solemne, presidenti Fatmir Sejdiu i ndau kryeministrit Berisha “Medaljen e Artë të Lirisë”, për kontributin e dhënë për Kosovën dhe shqiptarët në përgjithësi. Në fjalën e rastit, Sejdiu ka thënë se, Berisha me sukses punoi për Shqipërinë e integruar në institucionet euroatlantike dhe pati një rol vendimtar në transformimin e madh të Shqipërisë gjatë këtyre dy dekadave të fundit. /Telegrafi/