Enertin Dheskali:Cikel poetik

Enertin Dheskali

Marre nga vellimi i dyte poetik, "Pertej endrrave dhe perjetesise", 170 faqe, 140 poezi, globusr, Enertin Dh.
Mëngjes Shkurti

Sa shpejt fluturon ora në mëngjes,
Nëpër rrugët që buzëqeshin nën shi,
Kur vrapin tënd e shoqëron me gaz,
Një rreze naive që shpon qiellin – çati.

Mbi degët e pemëve që pikojnë kristale,
Një harabel përqesh hapat e mi,
Turma njerëzish ecin nëpër trotuare,
Kryqëzohen burra, gra, pleq e fëmijë.

Unë nxitoj drejt ndërtesës së dijes,
Ku deti i të rinjve ardhjen time pret,
Pas meje vrapon koha çdo mëngjes,
E ardhmja në gotën e ëndrrrave më tret.
* * *
Nga degët e pemëve pikojnë kristale,
Një harabel përqesh hapat e mi,
Nëpër rrugët që buzëqeshin nën mendime,
Rrezet, me pikat e shiut bëjnë dashuri…

10. 01. 2008


-Dimër në dhomë-



Nëpër ajrin e kësaj dhome të ftohtë,
Lundrojnë miliona grimca dhimbjeje,
Që vrapojnë e më futen në shpirt
Dhe sjellin tek unë mijëra zgjime.

Pse vallë u tret heshtja jote,
Në ajrin – aisberg të kësaj dhome,
Ku buzët i puth një ëndërr – klithmë
Që fërgëllon si një refren?!

Përtej braktisjes ndjeva një varg
Që nxorri lot për këtë ndjenjë,
I ulur sot përmbi prag,
Trokas, por asnjë s’më dëgjon.

Dhe dhoma hesht porsi një varr,
Unë fle dhe zgjohem brenda saj,
Që atë çast që jemi ndarë,
Dhoma është kthyer në akullnajë…

27. 12. 2007



-Me ty nën ullinj-

I poqëm yjet sonte
Dhe i hëngrëm për darkë
Nën hijen e ullinjve.
Hëna mistrece kërkon të na prekë
Me duar drite,
Që ngatërrohen nëpër degët e ngarkuara
Me gjelbërim.
Një qen kuis që larg,
Prish heshtjen e qiellit të kaltër
Dhe më kujton oshëtimën e viteve
Në shpirtin e vrarë.

I poqëm yjet sonte
Dhe i hëngrëm për darkë…

10. 08. 2008
-Shqiptarishte-

Tallaze pikëllimi ranë në brigjet tona,
Shpata jeniçerësh, gjymtyrët na i prenë,
Nëpër shekuj,
Të huajt
Na shkulën si bar i egër mbi gërmadha,
E ne, sërish nga rrënjët mbimë.
Me gjirin e saj na mëkoi hëna…

08. 03. 2009

-Largësia-

Unë iki çdo javë
Nëpër rrugët e ndarjes,
Që vesojnë mbi kujtimet e mia
Mallin e pritjes.
Pas më ndjekin vështrimet e tua
Dhe zëri i endjes
Që numëron orët e logaritmeve mbi mua.
Fytyrën tënde mbaj në xhepin e zemrës
E t’i puth sytë
Sa herë që malli më shtrëngon,
Në qafë kam varur dashurinë e ëndrrës
Si më të vyerin medalion…

Unë iki çdo javë
E mezi pres kthimin
Në gjoksin tënd e dashur.
Nëpër telefona, largësitë ëndrra piketojnë,
Flasin nëpër orbitale ndjenjat tona,
Ndërsa në pritje, zemrat vizatojnë
Fytyrat – ikona…

18. 05. 1999

-Burgosje-

Një ujk i bardhë e kapërceu natën
Dhe zbriti në qytet,
Bashkë me hënën e plotë
Dhe me pellgaçët e pistë
Që lajnë imazhet e kalimtarëve.

Ujku skërmitet i uritur, jetim,
Dhe qan për dhimbjen e lirisë
Që ia vranë
Brenda shpirtit tim…

09. 08. 2008


-Anije nën det-

Klithin direkët e mbuluar nga myshku,
Kur ndiejnë erën që dallgët ngre,
Kujtimet përkëdhelin bashin e krisur,
Që dikur ngatërrohej nëpër re.

Madhështia dremit në shtratin e baltosur,
Legjendat e së shkuarës, peshqve u tregon,
Klithmat shoqërojnë rrugën e pasosur,
Kur u ndeshën me Zotin Poseidon.

Shpirti i anijes i burgosur mbeti,
Në kaltërsinë pa anë dhe pa fund,
Shtëpizë e përjetshme u bë për të deti,
Djep që ëndrrat e vdekjes përkund…

22. 01. 2009