Hetimet për rastin e Nazim Bllacës

Hetimet për rastin e Nazim Bllacës

Bllaca u intervistua nga Prokuroria Speciale.- KMDLNJ:




Nazim Bllaca është intervistuar sot sërish nga prokurorët e prokurorisë speciale në lidhje me deklarimin e tij se ka kryer vrasje dhe vepra të tjera kriminale sipas tij, të gjitha me urdhër të SHIK-ut. Ndërkohë, mësohet se avokati i tij Haxhi Millaku është tërhequr nga cilësia e mbrojtësit të Nazim Bllacës, mirëpo nuk janë bërë të ditura arsyet e tërheqjes së tij.
Edhe sot kanë vazhduar reagimet e liderëve institucional dhe të organizatave tjera institucionale dhe jo qeveritare.
Për disa orë rresht, nën masa të rrepta sigurie në zyrat e prokurorisë speciale është intervistuar i shumëpërfoluri, Nazim Bllaca, të cilit i është caktuar masa e arrestit shtëpiak, pas deklaratës se ka kryer vrasje dhe vepra të tjera kriminale, sipas tij, me urdhëra të SHIK-ut.
Ndërkohë, mësohet se avokati i tij Haxhi Millaku është tërhequr nga cilësia e mbrojtësit të Nazim Bllacës, mirëpo nuk janë bërë të ditura arsyet e tërheqjes së tij.
Ka reaguar sërish Këshilli për Mbrojtjen e të Drejtave të Njeriut. Ky asociacion shpreh habinë që gjykatësi i EULEX-it, Françesko Florin ka caktuar masën e arrestit shtëpiak Nazim Bllacës, prej një muaji, gjë që, sipas KMDLNJ-së , është në kundërshtim të plotë me natyrën e veprës për çka dyshohet i arrestuari Bllaca.
"Masa e arrestit shtëpiak zakonisht shqiptohet për raste më të lehta apo kur i arrestuari nuk bën pjesë në grup me rrezikshmëri të lartë. Rasti i Nazmi Bllacës është krejtësisht i kundërt, kemi të bëjmë për dyshim të kryerjes së krimeve shumë serioze ", thuhet në reagimin e Këshilli për Mbrojtjen e të Drejtave të Njeriut.
Lidhur me zhvillimet pas deklaratës së Nazim Bllacës, reagoi edhe Lëvizja “Vetëvendosje”. Kjo Lëvizje konsideron se kryeministri i vendit, Hashim Thaçi, ka dhënë deklarata shumë dramatike, duke thënë se Bllaca e ka kërcënuar "sigurinë nacionale". Sipas vetëvendosjes Thaçi nuk i ka konsideruar kaq të rrezikshme as strukturat paralele të Serbisë, të cilat ditë e natë punojnë kundër sigurisë sonë nacionale dhe pavarësisë së Kosovës.
"Kurrë më parë Hashim Thaçi nuk është shërbyer me një fjalor kaq dramatik të rrezikshmërisë, madje as kur Kosovës iu kallën kufijtë më 19 shkurt 2008, dy ditë pas shpalljes së pavarësisë", thekson Lëvizja Vetëvendosje. Sipas kësaj “Vetëvendosjes”, SHIK-u asnjëherë nuk është shuar ai vetëm ka ndërruar formë: tash e disa vite SHIK-u ka kolonizuar pothuajse të gjitha ndërmarrjet e rëndësishme publike e shoqërore - Postë - Telekomin e Kosovës, Aeroportin Publik Ndërkombëtar të Prishtinës, Trepçën, KEK-un, pra të gjitha këto ndërmarrje të rëndësishme të cilat do t'i privatizojë kreu i privatizimit të pasurive të Kosovës, ministri Ahmet Shala, thuhet në kumtesën e Lëvizjes “Vetëvendosje”.

EULEX: Rasti Bllaca, prokuroria po punon



Lidhur me rastin të cilin e ka hapur Prokuroria Speciale (PSRK) mbi pohimet e bëra nga Nazim Bllaca, EULEX-i, nëpërmjet një komunikate për media, ka bërë të ditur se do ta mbrojë konfidencialitetin e hetimeve që janë duke u zhvilluar, për t’ju mundësuar prokurorëve të PSRK-së dhe policëve të punojnë pa asnjë pengesë.
“Parimi i konfidencialitetit është bazë për sundimin e ligjit që ka për qëllim sigurimin e efektshmërisë së hetimeve, si dhe të drejtat e të gjithë personave në fjalë, qofshin ata dëshmitarë ose të dyshuar”, thuhet në komunikatë.
“Në çdo hetim penal, dëshmitë duhet të mblidhen dhe të shqyrtohen nga hetuesit dhe prokurorët me një saktësi shumë të madhe. Vetëm pas përfundimit të këtyre hetimeve mund të konkludohet nëse personat do të sillen para gjykatës për një gjykim të drejtë dhe publik”, theksohet më tej.
Si mision për sundimin e ligjit, EULEX-i thekson se ky mision e respekton plotësisht parimin e konfidencialitetit në deklaratat e veta publike dhe pret që këtë shembull ta ndjekin të gjithë, ashtu që drejtësia të ndahet në mënyrë të barabartë për të gjithë.

Bllaca sërish në intervistë nga EULEX-i

Bllaca sërish në intervistë nga EULEX-i.- Krasniqi: Kemi kërkuar të bëhen të gjitha hetimet e mundshme

Prokuroria speciale e EULEX-it ka vazhduar hetimet për rastin e Nazim Bllacën, ndërsa prej dje atij i është ndaluar komunikimi me media. Lidhur me këtë rast kanë vazhduar reagimet e zyrtarëve institucionalë dhe politikë. Ndërsa Qeveria ka kërkuar ndriçmin e këtij rasti, lideri opozitar, Ramush Haradinaj, ka kërkuar nga pjesëtarët e SHIK-ut që të distancohen nga deklarimet se kjo organizatë ka qenë patriotike. EULEX-i ka vazhduar hetimet në lidhje me rrëfime e Nazim Bllacës, i cili publikisht ka pranauar se ka kryer vrasje dhe vepra të tjera kriminale në periudhën e pas luftës në Kosovë.
Zyrtarët e EULEX-it nuk kanë dashur të thonë asgjë më tepër për këtë rast përveç deklarimit se hetimet po vazhdojnë.
Ndërkohë, mësohet se EULEX-i ia ka ndaluar Nazim Bllacës të flasë për media derisa po zhvillohen hetime ndaj tij.
Lidhur me këtë rast as sot nuk kanë munguar reagimet e ndryshme të zyrtarëve institucionalë dhe partiakë në lidhje me zhvillimet e fundit.
Zyrtarët e Qeverisë së Kosovës theksuan se gjykimet dhe vlerësimet duhet të nxirren nga faktet që prezantojnë institucionet përgjegjëse dhe jo nga shpifjet, të cilat e dëmtojnë imazhin e Kosovës, ndërsa kërkuan edhe një herë nga drejtësia që rasti të ndriçohet deri në fund.
"Ne kemi kërkuar që të bëhen të gjitha hetimet e mundshme, që të bëhet një zbardhje e plotë e të gjitha fakteve dhe unë besoj se kryeministri ka qenë i qartë në deklarimet e tij për sa i përket këtij rasti. Ajo që dua të them dhe të ritheksoj është se ne vendimet tona nuk i marrim duke u bazuar në shpifje politike, por i marrim duke u bazuar në të vërtetat e nxjerra nga proceset hetuese, proceset e sistemit të drejtësisë të cilat janë të bazuara në Kushtetutën e vendit", tha Memli Krasniqi,zëdhënës i Qeverisë.
Krasniqi tha se Qeveria e Kosovës ka qenë shumë e qartë në deklarimet e veta që rastet nuk duhet të politizohen, duke shtuar se publikimi para medieve ka qenë politik dhe e ka dëmtuar procesin e Kosovës në Gjykatën Ndërkombëtare të Drejtësisë.
Edhe Kryetari i AAK-së, Ramush Haradinaj, ka kërkuar nga organet e drejtësisë, që të fillojnë me ndriçimin e të gjitha veprimtarive të SHIK-ut.

Qeveria: Rasti Bllaca të hetohet deri në fund

L. Hajdari
Haradinaj kërkon hetimin e SHIK-ut

Prishtinë, 4 dhjetor - Qeveria e Kosovë kërkoi nga organet e drejtësisë që të kryejnë detyrat e veta karshi përgjegjësive ligjore dhe institucional që i kanë, në mënyrë që rasti i shumëpërfolur i Nazim Bllacës të zbardhet deri në fund. Zëdhënësi i qeverisë, Memli Krasniqi nuk ka dashur të përdor termin “dështim” të institucioneve të vendit në rastin Bllaca, ndërsa ka pranuar se ka pasur hapësirë që disa hapa të ndërmerren në një formë më të shpejtë. “Unë besoj se ka pasur hapësirë që disa hapa të ndërmerren në një formë më të shpejtë, dhe të ketë një menaxhim më efikas të disa aspekteve të kësaj gjendje, por ne presim që institucionet e rendit të kryejnë detyrat e veta karshi përgjegjësive ligjore dhe institucional që i kanë në mënyrë që rasti të zbardhet deri në fund”, tha zëdhënësi Krasniqi. Sipas tij çdo implikim që ka të bëjë me këtë rast duhet të hetohet në mënyrë të thuktë dhe të sillen përfundimet e nevojshme për të sqaruar gjithçka që ka të bëjë me këtë rast. Këto deklarata zëdhënësi i qeverisë i bëri pas mbledhjes së rregull të ekzekutivit, duke thënë se kjo e fundit ka pasur paqartësi sa i përket aspekteve procedural lidhur me administrimin e këtij rasti, paqartësi këto që ia ka adresuar edhe EULEX-it....Në kontekst të këtyre zhvillimeve ka reaguar edhe kryetari i Aleancës për Ardhmërinë e Kosovës Ramush Haradinaj kërkoi të premten që drejtësia të hetojë aktivitetet e dyshimta të Shërbimit Informativ të Kosovës, përderisa siç tha ai, kjo organizatë kishte vepruar në mënyrë ilegale. (Tekstin e plotë mund ta lexoni në numrin e nesërm të gazetës, “Bota sot”)