"Eurostat": Ne shtetet e BE-se jetojne 1 milion shqiptare

"Eurostat": Ne shtetet e BE-se jetojne 1 milion shqiptare
18.12.2009
Instituti evropian i statistikave “Eurostat” bëri të ditur të mërkurën se rreth 1 milion shqiptarë nga Shqipëria jetojnë në një nga 27 vendet anëtare të Bashkimit Evropian.
Në një raport mbi të huajt që jetojnë në BE, “Eurostati” vëren se shqiptarët përbëjnë 5 për qind të numrit të përgjithshëm të të huajve në këto vende. Shqiptarët përbëjnë 64 për qind të qytetarëve të huaj që jetojnë në Greqi (rreth 640 mijë vetë), ndërkohë që pjesa tjetër jeton në Itali e në Evropën Veriore. Këto të dhëna janë të vlefshme për vitin 2008 dhe bazohen në vlerësime të instituteve të statistikave të vendeve anëtare.

Shifra prej 1 milion vetash rezulton më e lartë nga sa vlerësohej më parë numri i shqiptarëve emigrantë. Kjo shifër tregon se ndoshta numri i popullatës shqiptare që jeton ende në atdhe është më i ulët nga sa vlerësohet zyrtarisht.

Në vitin 2001, kur u krye regjistrimi i përgjithshëm i popullatës (REPOBA) dhe banesave në Shqipëri, rezultoi se në vend kishte 3 milionë banorë, ndërsa nga krahasimi i regjistrimit të pranisë faktike me regjistrin e popullatës ku shënohen lindjet dhe vdekjet, në atë kohë mungonin në "apel" rreth 600-800 mijë vetë.

Sot, bazuar në të dhënat e REPOBA-s dhe të dhënat e lindjeve dhe vdekjeve, Shqipëria ka 3.2 milionë banorë dhe popullata po rritet me mesatarisht 1 për qind në vit. Por kjo statistikë nuk e merr parasysh numrin e shqiptarëve që mund të jenë larguar nga vendi pas vitit 2001. Të dhënat e hyrje-daljeve në pikat kufitare tregojnë se më shumë shqiptarë largohen nga vendi sesa kthehen në atdhe. Të dhënat e fundit të “Eurostatit” tregojnë se popullata e pranishme në Shqipëri mund të jetë 200-400 mijë vetë më e vogël se sa flasin statistikat zyrtare të Shqipërisë.

Regjistrimi i ardhshëm i popullatës faktike pritet të kryhet në vitin 2011. Në rast se popullata del më e vogël, të gjitha statistikat kombëtare mund të ndryshojnë. Sot, prodhimi i brendshëm bruto për frymë i Shqipërisë është sa 26 për qind e mesatares së Bashkimit Evropian, gjë që e rendit këtë vend në fund të listës. Por, pas regjistrimit të popullatës në vitin 2011, shqiptarët ndoshta do të kapërcejnë me statistikë statusin e vendit më të varfër të kontinentit.