Pulla e pavarsisë

Pulla e pavarësisë


Nga Express më 16.02.2009 në ora 15:13

Me rastin e shënimit të përvjetorit të parë të pavarësisë së Kosovës, Filatelia e Postës së Kosovës, ka promovuar të hënë, emisionin e pullës postare me titull “Përvjetori i pavarësisë”.

Posta e Kosovës, do ta lëshojë në qarkullim postar këtë pullë në ditën e pavarësisë, të martën më 17 shkurt.

“Përvjetori i Pavarësisë” është emision i cili në shenjë falënderimit i dedikohet të gjithë atyre që kontribuuan me punën e palodhshme, sakrificat dhe jetërat e tyre për çlirimin, sendërtimin dhe shpalljen e Pavarësisë së shtetit tonë”, ka thënë në fjalën e tij Rexhe Gjonbalaj, kryetar i Bordit të Drejtorëve të PTK-së.

Sipas tij, pulla postare si ambasador i promovimit të jetës shoqërore, kulturore, sportive dhe gjeografike bartë në vete historikun njëvjeçar të pavarësisë së shtetit më të ri në botë.

Ministri i Postës dhe Telekomunikacionit të Kosovës, Fatmir Limaj, në fjalën e tij të rastit, vlerësoi se PTK-ja që nga shpallja e pavarësisë me nxjerrjen e pullave postare ka lënë gjurmë të pashlyeshme të historisë.

“PTK-ja ka nxjerrë më herët pulla postare si ajo e Ditës së Pavarësisë, më pastaj ato të figurave të njohura të historisë së vendit, siç është ajo e Adem Jasharit, ndërkaq tani po nxjerrë pullën postare për Përvjetorin e Pavarësisë së Kosovës”, ka thënë ministri Limaj.

Në anë e tij, Drejtori i Postës së Kosovës, Rafet Jashari theksoi se ky emision është i veçantë, meqë shënon përvjetorin e shpalljes së pavarësisë dhe në vete ngërthen krenarinë, vuajtjet dhe sakrificën e popullit shqiptar.

“Ju ftoj që pullën postare “Përvjetori i Pavarësisë” ta shfrytëzoni në letrat e përditshme, me të cilat ju komunikoni me bashkëqytetarët tuaj dhe bashkëatdhetarët, në mënyrë që të jetë ambassador i vërtetë i Republikës së Kosovës, anë e kënd botës”, është shprehur Jashari para të pranishmëve.

Filatelia e Postës së Kosovës përmes dizajneve të pullave postare nga ky emision, shënon aktin historik – pëpilimin e Deklaratës së Pavarësisë dhe kurorëzimin e kësaj deklarate me valimin e flamurit shtetëror, ndërkohë vlera e këtyre pullave postare është 1 dhe 2 euro.