Në Auckland (Zelandë e Re) u festua dita e pavarësisë së Kosovës

Në Auckland (Zelandë e Re) u festua dita e pavarësisë së Kosovës






Shqiptaro-zelandezët me kohë ishin përgatitur për këtë ditë gëzimi e feste të madhe. Ditëlindja e parë e shtetit më të ri në botë manifestuesëve u dhuroi momente e emocione të forta krenarie e malli. Krenarie për luftën e fituar, mall e dhembje për ata që ia falen jetën Kosovës. Ulur pranë e pranë manifestuesit e të gjitha grupmoshave, me prejardhje nga gjitha tokat shqiptare, të veshur solemnisht, të tubuar në sallën që gumzhinte vetëm shqip, me dashuri uronin, përgëzonin njëri-tjetrin me fjalët që aq lirshëm u dilnin nga zemra e shpirti për Kosovën, popullin e saj të lashtë. Shprehen shpresën se edhe Zelanda e Re do ta njohë pavarësinë e Kosovës, ashtu siç e kanë njohur edhe shtete tjera nga katër anët e botës. Në fillim u ekzekutua himni i Kosovës pastaj kryetari i komunitetit, Ali Hoxha uroi pjesëmarrësit për këtë ditë të shënuar. Programi vazhdoi me recitalin “Rri drejt shqiptari im” të interpertuar mrekullueshëm nga Erdon Salihu. Të tubuarit i kënaqi edhe En Asllani, 4 vjeç, i cili simbolikisht duke mbajtur abetarën në dorë recitoi bukur në gjuhën shqipe. Në këtë mbrëmje të paharrueshme u thirr me zë: ”Edhe ne kemi shtet! Urime Kosovë!”
Sabit Abdyli