Sejdiu nderohet për lidership

Sejdiu nderohet për lidership




Presidenti Sejdiu udhëtoi të premten drejt shtetit të Arizonës, ku do të marrë çmimin prestigjioz për Lidership Global. Me datën 26, ai do t’u bashkohet kryeministrit dhe ministrit të Jashtëm në takimin me sekretaren amerikane të Shtetit, Hillary Clinton. Këtë vizitë, lidershipi i Prishtinës do ta shfrytëzojë edhe për të lobuar te vendet që nuk e kanë njohur ende Deklaratën e Pavarësisë

Nga Sh. Limoni më 21.02.2009 në ora 10:27

Presidenti Fatmir Sejdiu udhëtoi të premten drejt Shteteve të Bashkuara, ku do të mbajë një ligjëratë në Universitetin Shtetëror

të Arizonës dhe do të marrë çmimin prestigjioz të këtij universiteti për Lidership Global.

Më pas, më datën 26, ai pritet t’i bashkohet kryeministrit Hashim Thaçi dhe ministrit të Jashtëm, Skënder Hyseni, në takimin me sekretaren amerikane të Shtetit, zonjën Hillary Clinton.

Në Aeroportin e Prishtinës, presidenti Sejdiu dha disa detaje të kësaj vizite. “Së pari do të shkoj në shtetin e Arizonës, ku do të mbaj një ligjëratë me rastin e një çmimi prestigjioz që më jep Universitetit i Arizonës. Pastaj do të kthehem në Washington, ku bashkë me kryeministrin dhe ministrin e Jashtëm do takojmë sekretaren e Shtetit”, tha presidenti i cili do të marrë çmim nga Universiteti i Arizonës, ku para disa vitesh kishte qëndruar për studime të thelluara.

Këtë vizitë, presidenti, kryeministri dhe ministri i Jashtëm do ta shfrytëzojnë edhe për të lobuar te përfaqësuesit e shteteve që nuk e kanë njohur deri më tash pavarësinë e Kosovës.

“Do të kemi takime me kongresmenë dhe personalitete tjerë të rëndësishme të shtetit amerikan. Dhe besoj se pjesët tjetër të takimit do të shkoj në New York, ku do të kem po ashtu takime me ambasadorë të vendeve të ndryshme që nuk e kanë njohur pavarësinë e Kosovës deri më tash”, tha presidenti.

Më parë është menduar që gjatë kësaj vizite, presidenti dhe kryeministri do të priten edhe nga zëvendëspresidentin amerikan, Joseph Bidden. Mirëpo, aktualisht ky takim nuk është në agjendë.

“Mbase mund të ketë edhe takime tjera të rëndësishme”, tha presidenti Sejdiu. Presidenti i Kosovës ka folur edhe rreth planit gjashtëpikësh të sekretarit të përgjithshëm të OKB’së, të cilin po e shtyn drejt implementimit shefi i UNMIK’ut, Lamberto Zannier.

“Ne e kemi dhënë qëndrimin tonë dhe mund të them asnjë bisedë për gjashtëpikëshin nuk është e pranueshme për Kosovën”, tha Sejdiu.

“Mund të ketë qasje separate, anashkaluese, por nuk do të kenë efekt”, tha presidenti, duke komentuar takimin e së enjtes mes shefit të UNMIK’ut dhe përfaqësuesve të Qeverisë së Beogradit.

Presidenti përsëriti qëndrimin e Prishtinës që me Beogradin mund të bisedohet, por vetëm si dy shtete sovrane. “Ne e kemi thënë se do të kemi dialog me Beogradin për çështje që janë në interes të dy vendeve sovrane dhe e thërrasim edhe tash që të jetë në një qasje racionale në raportet mes dy shteteve”, tha Sejdiu. “Nëse Beogradi do të vazhdojë me përpjekjet për mbajtjen e tensioneve në një pjesë të Kosovës, flasë për qytetarët serbë dhe t’i instrumentalizojë ata për veprime të këqija, sigurisht se nuk do t’ia dalë”.

Presidenti, kryeministri dhe ministri i Jashtëm i Kosovës do të qëndrojnë në Shtetet e Bashkuara të Amerikës deri më 2 mars.