Të martën “rrëzohet” Qeveria e shpërndahet Parlamenti

nga **Agim Gashi** Sat Oct 30, 2010 6:31 pm

Të martën “rrëzohet” Qeveria e shpërndahet Parlamenti

Shqipe Osmani, BOTA SOT

Iniciativa e AKR-së për votëbesim ndaj Qeverisë do të lëkundë mbase për herë të fundit Qeverinë e Kosovës dhe do të shpejtojë mbajtjen e zgjedhjeve nacionale.

Një vendim të rëndësishëm për vendin do ta marrin ligjvënësit të martën. Ata do të shkurtojnë apo do të zgjasin jetën e Qeverisë aktuale, më saktësisht deputetët do të vendosin nëse vendi do të shkojë në zgjedhje të parakohshme, që janë caktuar me datën 13 shkurt, apo në zgjedhje të jashtëzakonshme. Para një vendimi të tillë deputetët i dërgoi mocioni për Qeverinë i iniciuar nga Aleanca Kosova e Re , mocion të cilën e mbështetën 40 deputetët e Kuvendit, e të cilën Kryesia e Kuvendit vendosi ta parashtrojë në Kuvend për votim të martën në një seancë të jashtëzakonshme. Mirëpo, pavarësisht vendimit të Kryesisë për seancë votëbesimi për Qeverinë, lista e nënshkruar nga 40 deputetët për mocion është kundërshtuar nga LDK-ja dhe AAK-ja, për shkak të dyshimeve se ka emra të falsifikuar. Lista prej 40 nënshkrimeve ka mbetur të verifikohet deri të martën , derisa iniciuesit e mocionit kanë dëshmuar se nuk ka falsifikim të emrave , por lista shumë shpejtë do të verifikohet, meqë bëhet fjalë për lëshime teknike, të cilat nuk janë problem të evitohen.

Mosvotimi i Qeverisë së pakicës
Kryetari i Kuvendit, Jakup Krasniqi, të premten pas mbledhjes së Kryesisë bëri të ditur se kryesia ka vendosur që mocioni i votëbesimit për Qeverinë, i ngritur nga AKR-ja, të parashtrohet në një seancë të veçantë të martën e javës së ardhshme.“Pas mocionin e AKR-së të nënshkruar nga 40 deputetë, si kryesi dhe si grupe parlamentare vendosëm që të thirret seanca për këtë mocion të martën, në orën 12.00”, tha Krasniqi duke shtuar më tej se arsyeja e këtij mocioni është verifikimi nëse kjo Qeveri e pakicës e ka besimin e deputetëve apo jo. Krasniqi, ndërkaq nuk është deklaruar nëse Qeveria e tanishme është joefikase nëse ajo nuk ka mbajtur asnjë mbledhje pas prishjes së koalicionit. Ai tha se Qeveria nuk funksionon vetëm me mbledhje, sepse motori i qeverisjes është administrata, e cila tha Krasniqi, i ka kryer detyrat e veta . Ai ka vënë në pah se nëse ligjvënësit votojnë për mosbesim ndaj kësaj Qeverie, atëherë vendi do të shkojë në zgjedhje të jashtëzakonshme. “Natyrisht se Qeveria nuk po punon me kapacitet të plotë, sepse tashmë nuk është e qeveri koalicionit, por e pakicës. Megjithatë, kjo është arsyeja e mocionit për të verifikuar se kjo Qeveri e pakicës a e ka mbështetjen apo jo. Nëse seanca e së martës voton për mocionin e mosbesimit për Qeverinë, atëherë procedurat tjera janë zgjedhjet e jashtëzakonshme”, është shprehur Krasniqi. Krasniqi, ka theksuar gjithashtu se në rast kalimi të mocionit për mosbesim të Qeverisë, do të respektohen të gjitha procedurat ligjore dhe ato që shkruhen edhe në Kushtetutë.
LDK dhe AAK dyshojnë në manipulime të nënshkrimeve
Përfaqësuesit e LDK-së, derisa kundërshtuan dhe hodhën dyshime për falsifikime të nënshkrimeve, apo manipulime me emrat e deputetëve, duken se janë shenja të cilat tregojnë se kjo parti , deri dje partnere e kësaj qeverisje, mbase nuk do ta hedhë votën për mosbesim ndaj qeverisjes minore. Ismet Beqiri, shef i GK të LDK-së derisa ka kundërshtuar legjitimitetin e listës së mocionit për votëbesim të Qeverisë, ai nuk e ka mohuar, por as nuk e ka pohuar, nëse LDK-ja do të votojë për mosbesimin ndaj qeverisjes aktuale. Sipas tij për votimin apo jo të mocionit do të vendos partia.
“Mocioni i votëbesimit ndaj Qeverisë me arsyetimin e dhënë në tekst edhe për LDK-në është i paqëndrueshëm, sepse është e qartë pse është i paqëndrueshëm, nuk është ndonjë arsyetim për ne i mjaftueshëm për diçka të tillë. Dhe çështja që po ashtu u ngrit, që duhet ta verifikojmë, sepse është shumë mundshme një njëri t’i ketë shkruar pesë emra pa u nënshkruar”, ka thënë Beqiri.
Shefi i Grupit Kuvendar të AAK-së, Ardian Gjini përsëriti qëndrimin e AAK-së lidhur me mosnënshkrimin e mocionit të votëbesimit duke theksuar kështu se arsyetimi për mocionin e ngritur është jo i denjë për një parti opozitare, derisa thekson ai se arsyetimet si keq qeverisje do të ishte më e denjë për opozitarët të cilët gjithmonë kanë kërkuar rënien e kësaj Qeverie, e cila ka dëmtuar shumë vendin. Gjini, ka bërë të ditur se asnjë nga deputetët e AAK-së nuk e kanë nënshkruar mocionin, por nuk ka mohuar se të martën nuk do të votojnë për mosbesim ndaj Qeverisë.
“Asnjë nga deputetët e GP të AAK-së nuk e kanë nënshkruar mocionin nuk është e vërtetë ajo që ka dalë në media. Arsyeja për mosnënshkrimin e këtij mocioni, është arsyetimi që ka dhënë AKR-ja në këtë mocion. Pjesa e arsyetimit për AAK-në, është e padenjë për një parti opozitare. Ne kemi kërkuar për më shumë se dy vjet që kjo Qeveri duhet të shkojë në shtëpi, që kjo i ka sjellë dëme të mëdha Kosovës, në shumë raste të pariparueshme, na ka sjellë në pozitë inferiore ndaj vendeve të rajonit dhe me këtë qeverisje është krijuar hapësirë që investitorët të largohen ”, është shprehur Gjini.
Mocioni në të mirë të vendit
Akuzave të përfaqësuesve të LDK-së dhe AAK-së se lista e nënshkrimeve është e manipuluar i është kundërvënë , nënkryetari, gjegjësisht anëtari i Kryesisë së Kuvendit nga AKR-ja Ibrahim Gashi, duke qartësuar se lista nuk është e manipuluar , porse bëhet fjalë për disa lëshime teknike, të cilat siç tha ai do të evitohen pa ndonjë problem. Gashi, po ashtu nuk pajtohet më qëndrimet e partive të lartëpërmendura se arsyetimet në tekstin e mocionit janë të qëndrueshme dhe adekuate.“Do të mbahet seanca të martën dhe sigurisht edhe aty do të ketë rast secili të shprehë qëndrimet e veta. Unë mendoj që arsyetimi për mocionin është shumë i qartë dhe është i mbështetur në Kushtetutë. Vërejtjet që u dhanë lidhur me vërtetësinë e nënshkrime, mbeti që të vërtetohen plotësisht dhe unë mendoj që deri në seancë, ata deputetë që kanë shkruar me dorën e tyre emrin, por që nuk e kanë vënë edhe nënshkrimin, do ta vënë, dhe kjo është një çështje krejt teknike që nuk ka asnjë dyshim se do të zgjidhet deri të martën”, është shprehur Gashi, duke shtuar se AKR-ja ka ngritur këtë mocion vetëm për të mirën e shtetit dhe kjo, sipas tij, do të dëshmohet në të ardhmen. Arsyetimi i AKR-së për mocion ndaj Qeverisë është tejkalimi i krizës aktuale politike e instititucionale,dhe shmangie nga rreziku i thellimit të krizës institucionale në vend pas dorëheqjes së Sejdiut nga posti i presidentit dhe pas largimit të LDK-së nga koalicioni qeverisës. Nëse Kuvendi i Kosovës do të miratonte mocionin e votëbesimit për Qeverinë, atëherë Kuvendi do të shpërbëhet.

Mon	Tue	Wed	Thu	Fri	Sat	Sun
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30