LDK ndihet e nënçmuar në koalicion

LDK ndihet e nënçmuar në koalicion







Melihate Tërmkolli (Foto: Ermal Meta)

Nga Express më 17.03.2009 në ora 15:23

LDK ka humbur shumë duke hyrë në koalicion me PDK-në. Ministrat e Lidhjes Demokratike janë të përbuzur dhe të nënçmuar, ndërsa Kryesia e partisë është e përçarë për shkak të interesave të ngushta.

Këto ankesa janë dëgjuar nga zyrtarë të lartë të Lidhjes Demokratike të Kosovës (LDK) gjatë një takimi të Kryesisë Qendrore me Degën në Fushë-Kosovë. Në takim janë dëgjuar kërkesa për reforma në partinë, e cila për shumë vjet e dominoi skenën politike të Kosovës.

“Ne po sillemi në rreth. Ne nuk ishim as për koalicionin por ai u bë dhe po shihet si po shkon. Ne jemi të përbuzur dhe të nënçmuar . Ministrat tanë kanë buxhet me nga 5 milion kurse ata të PDK nga 100 milionë. Dhe kështu si jemi duke punuar dyshoj se mund të arrijmë diçka më shumë”, ka thënë Melihate Tërmkolli, anëtare e Kryesisë.

Sikur bëhet e ditur në një komunikatë shtypi të lëshuar nga Dega e LDK-së në Fushë-Kosovë, Tërmkolli ka theksuar se qytetarët e kanë humbur besimin dhe problemi nuk është te komunat, por në vetë Kryesinë Qendrore. “Kryesia është e përçarë për shkak të interesave të ngushta. Po flasim për reforma, një mundësi e pat edhe Kuçi por çka u bë! Nuk ka reforma në LDK pa zgjedhje! Reformat vijnë nga brenda, e jo nga jashtë”, ka theksuar ajo.

Edhe Abdullah Prebreza, kryetar i Degës së LDK-së në Fushë-Kosovë, ka shprehur pakënaqësinë me ngecjen e reformave të paralajmëruara në LDK. “Reformat duhet të bëhen dhe sa më parë aq më mirë”, ka theksuar ai.

Sadri Ferati, nga Kryesia Qendrore, ka bërë të ditur se në Kryesi është marrë qëndrim që të zhvillohen takime me të gjitha degët e LDK-së, në mënyrë që të sqarohen të gjitha dilemat dhe problemet, duke respektuar Statutin dhe rregulloret në fuqi. “LDK duhet të reformohet. Ne duhet t’i forcojmë radhët tona...Duhet të kemi qëndrime të qarta nga Kryesia dhe me këto qëndrime duhet të dalim unikë, duhet të mobilizohemi”.

“Ne duhet të luftojmë për një unitet real dhe jo për një unitet fals. Me idetë dhe veprimet tona duhet t’i bindim qytetarët për të na votuar”, ka shtuar ai.

Fadil Krasniqi, anëtar i Kryesisë së Degës, gjithashtu konsideron se LDK është duke u sjellë në rreth vicioz. “Filluam me Kuçin dhe Kryesia e tërhoqi. I humbëm zgjedhjet dhe mu ata që i humbën zgjedhjet në komuna të tyre, janë më të zëshmit”.

Sipas tij, disa anëtarë të Kryesisë janë shpenzuar dhe duhet të ndërrohen. “Secili duhet të thirret në punën e vet, e jo të thirren vetëm në Ibrahim Rugovën”. Edhe Krasniqi ka theksuar se në Kryesinë Qendrore të LDK-së s’ka unitet dhe ajo patjetër duhet të reformohet.

Haki Gojnovci, anëtar i Kryesisë së Degës, ka thënë troç se LDK-ja ka humbur shumë duke hyrë në koalicion me PDK-në. Ai e ka pranuar se Kryesia është në krizë, por sipas tij, LDK-ja ka forcë dhe njerëz që mund ta nxjerrin nga kjo situatë e rëndë.

Rikonstruimin e Kryesisë e ka përkrahur edhe Burim Berisha, Kryetar i Komunës së Fushë-Kosovës dhe folës të tjerë në këtë tubim partiak.