Kristaq Shabani:RRUGETIM PROFIL PEGASI INTERNACIONAL-I fokusuar POETI Tahir Bezhani

nga **Agim Gashi** Sat Mar 19, 2011 12:01 pm

Kristaq Shabani:RRUGETIM PROFIL PEGASI INTERNACIONAL-I fokusuar POETI Tahir Bezhani

Kur imagjinoj puthjen
Sytë mbyllen në pllajë...
*
Jam strukur
Në veten time
Shprushi zjarrin
E një dashurie të fikur....

RRUGETIM PROFIL PEGASI INTERNACIONAL
LNPSHA “PEGASI” ALBANIA
I fokusuar POETI Tahir Bezhani W.P.S , LNPSHA “PEGASI” ALBANIA

POEZI NGA TAHIR BEZHANI W.P.S

POETI S’HESHT

Mos hesht poet
Kur fryjnë stuhitë
Brenda lëkurës sate

Mos hesht
Kur zjarri të shkrumbon
Gjithçka rreth teje

Mos hesht
Edhe nëse bjeshkët
Rrënohen mbi ty

Mos hesht
Edhe nëse të vënë
Në trekëndësh
Mos hesht
Ti je poet
Sy i dritës.

A N I J A

Arrin nga larg anija
Si një fëmijë bonjak i lodhur
Valëve me furtunë
Oqeaneve e deteve pa fund

Ngarkuar me shpresa
Premtime
Luftëra e gjakime
Mbushur me politikë e trillime
Ujërave të botës

Anija e lodhur
Pushon
Në skelën shekullore
Konopët e lidhur për trupin tim.

BRENDA VETES

Brenda vetEs
Në heshtje
Fërkohet gëzimi i nximë
Nëpër eshtrat
E shekujve tè ngrirë.

LENDINA E TMERRIT

Ti je dhimbja ime e madhe
Lëndinë e tmerrit
Më kafshon thellë
E unë dënesën e mbaj
Ndër dhëmbë
Në shpirt e mbaj
Përjetësisht

Meje moj lëndina
Lemeritëse e gjakut
Në kujtesën e tmerruar
Të njerëzimit
Do të mbetesh nëpër shekuj
Meje lëndinë e dhimbjes.

Maj, 2004

MEDITIM

Jam strukur
Në veten time
Shprushi zjarrin
E një dashurie të fikur

Vetëm kujtesa lodron
Ëndrrave të mia
Të mbështjella me mallin tim
Që digjet si qiri në mua

Para meje shtrihet qielli
I pafund por i futuar
Dhe asnjë rrugë nuk të çon
Te urat e bardha
Te urat e shpresës së madhe....

Nëntor,2004

OFSHAMË

Një ofshamë
Damarëve rrugëton
Si zjarr shprush

Si e çmendur shëtit
Në botën time
Rrëmujë krijon

Nga larg shikoj
I tmerruar.

P L A G Ë T

Kur era përplaset
E portat gjëmojnë
Plagët e hapura
Në truallin kullojnë
Vrimave të pambyllura.

Gusht,2006
Gjakovë

BREDHJE NATEN

Kur më shqetëson dhimbja
Shëtis natën
Rrugëve të qytetit tim
I tretur në mendime

Shëtis i hutuar
E zë pisk dhimbjen
Kthesave mashtruese
Të rrugëve

Rreth meje dritat e neonit
Dhe zukama e mushkonjave
Që kafshojnë kudo.

Maj, 2 008
Gjakovë

NE TEATER

Mbrëmë në teatër
Shikova “Makbethin”

Në fund duartrokiten
Vetëm elita

Në thembër të Akilit
Fshihej jeta

Në sallë qante një fëmijë
Lotët i rigonin shi
Për jetën e pajetuar.

Gjakovë,
Janar,2008

ZJARR I MENDIMIT TIM

Netëve të gjata sa shekulli
Qëndroj si shkëmbi
Duke përkundur durimin

Heshtja tërbohet
Për unin tim
Dhe shpërthen
Drita e pranverës

Thellë në vatër
Gacat e mbuluara
Fshehin zjarrin
E mendimit tim.

PA KOMENT

Bukuria s’ka vlerë
Pa shëmtinë e saj

RREZE MASHTRUESE

Kot i ngulita sytë
Në hijen tënde
Në hijen që më ndjek pas.

E
Herë i tradhtuar
Herë i mashtruar
Nga futa e syve tu.

MË SHPËTO KËNGË

Ditë e ngarkuar plot halle
Natën mendimet shëtisin
Fluturon shpirti e mendja
Të gjitha ngushticave të botës
Asnjë vrimë për ikje....

Këngës thuaja malësorçe
Fyellit vrimat t’i pëlcasin
Kënga ime e bardhë.....

NGATËRRESA

E ndjeva fishkëllimën e plumbit
Kaloi përtej trupit tim i zjarrtë
Kujtim i kohës së ndryshkur mbeti
Anakronizëm i harruar....
Në mbamendje freski e tharë
Palë palë e paluar
Hedhur diku larg
Në plehun e kohës së shkuar
Kanuni në muzeume
Ka mbetur i ngujuar
Botën laike për ta mësuar.

P I S K A M Ë

Tërë ditën shikimi përvëlon
Natën,
Bukuria shëmton
Koha ndriçon dhimbshëmç

Natë e ditë,
Njësoi
Kallje brenda
Piskamë jashtë...

Kallje jashtë
E piskamë brenda....

STREHIM SHPIRTI

Ata nuk e dinë
Ku mëhifet shpirti
Në thembër t Akilit
Jo, se jo
Ka ndërruar vend vdekja

Jam strehuar buzë lumenjve
I tharë etje....

Erotikë:

VERSHIM MALLI

Kur imagjinoj puthjen
Sytë mbyllen në pllajë
Zemra ndal vrapin
Në bjeshkë dëbora shkrihet
Lumenjtë vërshojnë fushat
Shpirti është mbytur në valë
Rrezet kanë ngjyrë argjendi
Ti më dukesh si Kleoparta
Fillim në mbarim të zjarrtë
Mori Sose e artë.

SHIKIMI

Kur të shikoj
Flaka ndizet
Në bebëzat e mia
Në pasqyrë vërejta
Shkrumbin buzëve
Në shkrumnajë
Jam shndërrue
Dridhjet e zemrës
Nuk ndalen
E di edhe ti....

DASHURIA NË TREG

Më fal sytë
Të të fal këngën
Më fal puthjen
Të të fal zemrën
Mos më dhuro heshtjen
Se bëhem zjarr
Në hi shndërrohem
Mes nesh
Humbës nuk ka.

ÇAPKENE MOJ

Përndezjet i hedh flakadan
Zjarri ndizet në epshe
Dyluftim nxit bukuria

Pse hedh trupin në lëndinë?
Shkëndi zjarri puthjet tua
Vuajtje në shpirt
Çapkëne

Pse syrin e rrudh në pasqyrë
E verbëri më krijon në jetë
Mallë e kam kënaqësinë
Çapkene moj !.....

DASHUROJ PËR TË VUAJTUR

Dashuria është vuajtje
Vuajtja është dashuri
Sa shumë e dua vuajtjen

Hija ime pas dashurisë
Mister shpirtit
Statujë e ngrirë....

******

Tahir Bezhani lindur me 17 Maj 1947 në fshatin Smolicë të Gjakovës, nga nëna Razë e baba Avdulla. Shkollën fillore e kam kryer në fshatin Smolicë e Ponoshec, të mesmen në Gjakovë, kurse studimet e larta në SHLP “Bajram Curri” Gjakovë, në degën e Gjuhë-Letërsi Shqipe.

Gjatë karrierës, për aktivitet të treguar në angazhimin e Sindikatës së Pavarur të Policisë së Kosovës, në vitin 1995,
Gjykata e Qarkut në Prishtinë, në kohën regjimit të Serbisë, e dënon me dy vite burgim.

Tahir Bezhani, që kur ishte nxënës e student nis të shkruaj dhe të botojë poezi e prozë në faqet e gazetave dhe revistave letrare të kohës. Një kohë bashkëpunoj me “Rilindjen” dhe me periodikët tjerë.

Është anëtar i Lidhjës së Shkrimtarëve të Kosovës, i Klubit Letrar “Gjon Nikollë Kazazi” të Gjakovës.

Në nëntor të vitit 2008 është pranuar anëtar i Lidhjes së Poetëve Bashkëkohorë të Globit (W.P.S). është gjithashtu anëtar LIDHJES NDËRKOMBËTARE TË POETËVE, SHKRIMTARËVE DHE ARTISTËVE ”PEGASI” ALBANIA. Në prill të vitit 2009 mori pjesë Simpoziumin e Dytë Ndërkombëtar”MUZA POETIKE PEGASI2009” ME OBJEKT “POEZIA BASHKËKOHORE”, ku u nderua me çmim letrar dhe me çertifikatë nga kjo LIDHJE dhe “Klubi Kafeja e Ideve”, Athinë, që drejtohet nga shkrimtari i njohur grek Dino Kubatis.

Deri më tash ka botuar këto vepra:

1. “Koha lind vigaj, monografi,2001, SHB ” Vatra” Prishtinë
2. “Përplasje kohe”, poezi, 2002, SHB ”Vatra” Prishtinë
3. “Pëlcitje e vonuar”,poezi,2004, SHB ”Vatra” Prishtinë
4. “Rapsodët e Rekës së Keqe”, 2005, monografi, SHB ”Pjeter Bogdani” Has.
5. “Shkollat shqipe në Rekë të Keqe” monografi, 2006, botoi “Klubi Letrar “Gjon Nikollë Kazazi” Gjakovë.
6. “Smolica bastion i lirisë”, monografi, 2007 SHB ”Vatra” Prishtinë
7. “Frymëzim në errësirë”, poezi, 2008, botoi Klubi letrar”Gjon Nikollë Kazazi” Gjakovë
8. “Jetë në Furtunë”, kujtime, 2009, SHB ”Vatra” Prishtinë
9. “Piskamë e heshtur”2010, poezi, SHB ”Nacional” Tiranë.
10. “Urtësi nga Rekë e Keqe”, 2011, botoi KL”Gjon Nikollë Kazazi” Gjakovë.

Tahir Bezhani jeton e punon në Gjakovë.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30