Vendim i logjikshëm

Vendim i logjikshëm




Kryeministri Jose Luis Zapatero deklaroi se është i logjikshëm vendimi i Spanjës për tërheqjen e trupave të saj nga Kosova. Pasi që, sipas tij, Spanja nuk e ka njohur pavarësinë e Kosovës.

Nga Express më 28.03.2009 në ora 21:20

Kryeministri i Spanjës Jose Luis Zapatero ka deklaruar se vendimi i Qeverisë së Madridit për t’i tërhequr trupat nga misioni paqeruajtës i KFOR-it, është logjik, pasi që Qeveria e tij nuk e ka njohur pavarësinë e Kosovës.

Zapatero ka deklaruar për mediat spanjolle, në margjina të Samitit të BE’së në Bruksel, se NATO ka qenë e informuar paraprakisht se 620 ushtarët spanjollë që shërbejnë në Kosovë do të tërhiqen deri në fund të verës.

Ndërkohë, Zëvendëskryeministrja e Spanjës Maria Teresa Fernandez de la Vega Sanz ka konfirmuar, pas takimit të Qeverisë në Madrid, se synimet e Spanjës për të tërhequr trupat e saj nga Kosova i janë prezantuar NATO-s para disa muajsh.

“Para disa muajsh ne kemi shprehur qartë qëllimin tonë që të në mënyrë të përshpejtuar të tërheqim trupat tona nga Kosova. Këtë e kanë ditur aleatët tanë dhe NATO”, ka deklaruar ajo.

Megjithëkëtë, Zëvendëskryeministrja e Spanjës ka thënë se tërheqja do të bëhet në koordinim me aleatët e Spanjës.

Përfaqësues të Aleancës Veri-Atlantike të NATO-s janë habitur me vendimin e Spanjës për tërheqjen e trupave të saj nga Kosova. Ngjashëm është shprehur edhe Departamenti Amerikan i Shtetit, i cili ia përkujtoi Madridit marrëveshjen e aleatëve se “Në Kosovë bashkë po hyjmë, e bashkë do të dalim”.