Thaçi:Vajzat dhe djemtë tanë po e kontrollojnë kufirin me Serbinë

nga **Agim Gashi** Thu Aug 18, 2011 11:32 pm

Thaçi:Vajzat dhe djemtë tanë po e kontrollojnë kufirin me Serbinë

Pikat kufitare në veri të Kosovës janë nën kontroll dhe atje nuk ka kontrabandë, ka thënë kryeministri Hashim Thaçi duke theksuar se për herë të parë në historinë e Kosovës, vija kufitare me Serbinë e kontrollohet nga vajzat dhe djemtë e Kosovës, të cilët garantojnë integritetin territorial të Kosovës.

Këto komente kryeministri i bëri të enjten gjatë një vizite që u ka bërë bizneseve në komunën e Gjilanit, përkatësisht fabrikës për prodhimin e lëngjeve dhe produkteve të ndryshme “Ask Foods”.

Në këtë rast, Thaçi tha se marrëveshja mes Qeverisë së Kosovës dhe KFOR-it do të respektohet me përpikëri dhe se reciprociteti po vazhdon të respektohet dhe nuk ka asnjë dilemë se kjo çështje do të vazhdohet.

“Këto dy pika kufitare tanimë janë zona të kufizuara ushtarake dhe tanimë atje vlejnë rregullat ushtarake. Do të vazhdohet me implementimin e plotë të agjendës së planifikuar të respektimit të masave të reciprocitetit dhe në atë çështje nuk do të ketë asnjë dilemë, asnjë pikëpyetje se a do të respektohet apo jo. Në anën tjetër dëshiroj të theksoj se përpos kuptimin e angazhimit të kontrollit në pikat kufitare 1 dhe 31, më lejoni të theksoj se vendimi i 25 korrikut për marrjen në kontroll nga forcat e Kosovës të vijës kufitare mes shtetit të Kosovës dhe Serbisë po ndodh përherë të parë pas 12 viteve”, ka thënë ai.

Sipas tij, NATO-ja ka qenë dashur të instaloj forcat e saj në këtë zonë qysh në qershor të vitit 1999, jo në vitin që 2011, që do të thotë pas 12 vitesh.

Sidoqoftë kryeministri Thaçi ka ritheksuar se pas 12 vjetësh për herë të parë veriu i vendit është vënë nën kontroll të institucioneve vendore dhe atyre ndërkombëtare. Ai tha se tashmë janë vajzat e djemtë e Kosovës që e kontrollojnë kufirin dhe garantojnë integritetin e shtetit.

“Dëshiroj të theksoj e të sqaroj se ndoshta përherë të parë në historinë e Kosovës, vajzat dhe djemtë e Kosovës e mbajnë në kontroll vijën kufitare në këtë pjesë të Kosovës që kufizohet me Serbinë, do të thotë vijën kufitare dhe e garantojnë dhe e ruajnë integritetin territorial të Republikës së Kosovës. Kështu që në këtë drejtim do të punojmë ngushtë me NATO-n, natyrisht se do të kemi angazhime shtesë vendimi i 25 korrikut ka qenë vendimi i fillimit të ndryshimit të madh që do të ndodh në veri. Ka qenë betejë për ligjshmëri dhe kjo do të realizohet”, është shprehur ai.

Ai sqaroi se Qeveria nuk është në konfrontim me qytetarët serb atje, pasi që edhe ata janë qytetarë të Kosovës dhe do të investohet atje. Sipas kryeministrit, në pjesën veriore është një betejë me strukturat kriminale që mbajnë peng rreth 40 mijë qytetarë serbë.

Shefi i ekzekutivit theksoi se strukturat kriminale që kanë pretenduar për të sfiduar Qeverinë e Republikës së Kosovës, KFOR-in, EULEX-in dhe gjitha institucionet ndërkombëtare, do të ballafaqohen me drejtësi.

Mon	Tue	Wed	Thu	Fri	Sat	Sun
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30