Kosova angazhon një firmë të Uashingtonit për lobing

nga **Agim Gashi** Fri Nov 04, 2011 9:29 pm

Kosova angazhon një firmë të Uashingtonit për lobing

Qeveria e Kosovës ka angazhuar në mënyrë diskrete një firmë të njohur të Uashingtonit për shërbime lobingu me një pagesë prej 50 mijë dollarësh në muaj, pasi më parë kishte shkëputur një marrëveshje identike vitin e kaluar me një firmë tjetër.

"Balkan insight" pohon se ka siguruar një kopje të një dokumenti zyrtar amerikan, i cili tregon se Kosova ka angazhuar firmën e lobingut "Patton Boggs" më 31 gusht.

Në dokumentin që mban logon e Departamentit të Drejtësisë, thuhet se "Patton Boggs" do t'i ofrojë Kosovës "shërbime këshilluese për çështjet ligjore dhe avokimi në fushën e zgjerimit të marrëdhënieve bilaterale dhe multilaterale".

Kompania gjithashtu do të "nxisë investimet dhe mundësitë tregtare për Kosovën si dhe do të mbledhë fonde nga programet e jashtme të ndihmave".

Sipas "Balkan insight", Frenk Uizner, këshilltar për çështje të jashtme të firmës "Patton Boggs" është takuar në SHBA me Hashim Thaçin korrikun e kaluar. Sipas një komunikate të zyrës së Kryeministrit të Kosovës, ata kanë diskutuar për "zhvillimet aktuale politike në Kosovë dhe për arritjet e gjertanishme të institucioneve të Kosovës".

Frenk Uizner, një mik i hershëm i Kosovës, në vitin 2005 ishte emëruar përfaqësues special i SHBA-ve në bisedimet për statusin e Kosovës.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30