Shtyrja e zgjedhjeve presidenciale, antikushtetuese

nga **Agim Gashi** Tue Nov 15, 2011 7:42 pm

Shtyrja e zgjedhjeve presidenciale, antikushtetuese

Aleanca Kosova e Re duket se është acaruar nga partneri më i madh i koalicionit qeverisës, Partia Demokratike e Kosovës, zyrtarët e së cilës kanë shprehur hapur preferencat që zgjedhjet presidenciale të parapara për mesin e vitit 2012, të shtyhen për vitin 2013 dhe të mbahen përnjëherësh me zgjedhjet parlamentare. Sekretari i përgjithshëm i AKR-së, Ibrahim Makolli ka thënë të martën se do të ishte jodemokratike dhe antikushtetuese nëse do të kishte shtyrje të zgjedhjeve.

Në një konferencë për media, Makolli ka thënë se duhet të respektohen plotësisht vendimet që ka marrë Kuvendi i Kosovës, përkatësisht rezoluta që ka dalë nga marrëveshja e arritur mes kreut të PDK-së, LDK-së dhe AKR-së për zgjedhjen e presidentes konsensuale dhe për fillimin e ndryshimeve kushtetuese dhe të ligjit zgjedhor.

Rezoluta e miratuar në Kuvendin e Kosovës obligim që gjashtë muaj pas amandamentimit të Kushtetutës të bëhet zgjedhja e presidentit në mënyrë të drejtpërdrejtë dhe është përcaktuar një afat se deri kur duhet t’i përfundojë detyrat e veta komisioni parlamentar për amandamentimin e Kushtetutës.

“Nëse ne nuk i respektojmë vendimet e Kuvendit të Republikës, atëherë nuk kemi çka flasim as për demokraci dhe zgjedhjet sipas kësaj logjike mund të mbahen në bazë të asaj që ne dëshirojmë dhe njerëzit nëse nuk janë këto rregulla ligjore që respektohen atëherë njerëzit 1 herë në 50 vjet do të mbanin zgjedhje”, ka thënë Makolli.

Ai nuk ka dashur të flas për atë se cili do të mund të ishte reagimi i AKR-së në rast se do të merrej një vendim për shtyrjen e zgjedhjeve deri në vitin 2013, por ka shprehur besimin e plotë që partitë politike do t’i respektojnë vendimet e Kuvendit.

“Unë nuk dua të prejudikoj, por besoj shumë që partitë politike do të respektojnë dhe do të zbatojnë vendimet e Kuvendit të Republikës…Do të ishte jodemokratike dhe antiligjore dhe antikushtetuese që të mos respektohen vendimet e Kuvendit”, është shprehur Makolli.

Ai ka paraqitur qëndrimet e AKR-së përkitazi me çështje të ndryshme që lidhen me ndryshimet kushtetuese dhe me ndryshimet në ligjin zgjedhor, duke thënë se pret që edhe partitë tjera t’i kenë parasysh rekomandimet e AKR-së.

“Sa i përket nënshtetësisë së kandidatit, por edhe presidentit të zgjedhur, qëndrimi i AKR-së është që kandidati për president të vendit të ketë të drejtën e kandidimit edhe në rast se ka më tepër se një nënshtetësi dhe kjo e drejtë mos t’i mohohet as pas zgjedhjes së tij në postin e presidentit”, ka thënë Makolli.

Makolli ka mohuar se kjo ka të bëjë vetëm me kandidatin e AKR-së për president, Behgjet Pacollin, por ka thënë se nuk mund t’i mohohet e drejta e kandidimit rreth 30 për qind të popullsisë së Kosovës që jeton në diasporë.

Sa i përket çështjes së zëvendëspresidentit, Makolli ka thënë se duhet të ketë, ngase ushtrimi i detyrës së presidentit nga ana e kryeparlamentarit është shkelje e kushtetutës dhe përzierje e pushteteve.

Duke folur për Ligjin për zgjedhjet, Makolli ka thënë se AKR-ja është për atë që në Kosovë të ketë shtatë zona zgjedhore, të jenë listat e hapura, të jenë 125 deputetë, 5 prej të cilëve të jenë të rezervuar për diasporën si dhe të ketë zgjedhje fizike edhe në diasporë dhe KQZ-ja të të gjejë format e realizimit teknik të kësaj mundësie.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30