VIKTORIA XHAKO - NË PISHINË - Fragment

nga **Agim Gashi** Wed Jul 04, 2012 4:47 pm

VIKTORIA XHAKO - NË PISHINË - Fragment

Fragment nga romani në punim “MOS M’I VRIT ARINJTË E BARDHË”

………Atë ditë…

Bilbili i trainerit, që nuk i hiqej kurrë nga buzët, fërshëlleu fort. G. u lëshua në ujë. Pasi u ngjit në sipërfaqe, filloi të lëvizte drejt krahut tjetër të pishinës. Ishte prill. Ajri ishte i freskët. Uji i pishinës ishte i freskët. Grupet e çrregullta të spektatorëve shihnin vajzat në ujë dhe qeshnin. Asnjëra nuk dinte not. Në ujin e blertë spikaste trupi i gjatë e i hollë i G. Të qeshurat vinin gjer në veshët e saj, pastaj tërhiqeshin pas, sa më tepër që G. i afrohej paretit fundor. Ajo i respektonte këshillat e trainerit. Tani duhej të ngrihej mbi ujë, të bënte rrotullimin, të mbështeste këmbët tek pareti e të rrëshqiste. U ngrit mbi ujë. Pas krahëve dëgjoi heshtjen. Përballë, drita që hynte pjerrtas nga dritarja, i vrau sytë. Një hije e zuri atë dritë. Një hije, që e turbulloi vajzën, që e detyroi të fundoset në pishinë dhe të ngopet me ujë. Bilbili i trainerit fërshëlleu me ankim. G. rrëshqiti në pishinë duke lënë hijen pas. Në finish arriti me vonesë. Nuk e ngriti kokën nga traineri. Fërshëllima e bilbilit u mek. Të qeshurat e spektatorëve u mekën. Uji i pishinës u ftoh. Ajri mbi të, ngriu. Në trupin e vajzës kaluan mornica. Vuri duart buzë pishinës që të ngjitej. Dy duar të forta e zunë nga krahët, e tërhoqën lart, i hodhën supeve peshqirin e madh, e përfshinë brenda vetes dhe G. ndjeu dy buzë të nxehta, që rrëshqitën nxitimthi poshtë buzëve të saj, tek nishani i vogël, pothuaj i padukshëm, në anën e majtë. E frikësuar gjer në palcë, ajo hodhi sytë rreth e rrotull, mori frymë e lehtësuar, shtrëngoi fort peshqirin pas trupit dhe drejtoi shikimin nga kurrizi që po largohej. Tek kthesa në të majtë, befas ai u kthye. Sytë e tij blu të thellë, dy shigjeta flakëruese, u ngulën në zemrën e G. Buzëqeshja e tij rrëzëllitëse, teksa u kthye të ikte, mbeti pezull mbi kokën e saj. Një zë i ashpër pas veshit, e ktheu në realitetin e pishinës. Pa spektatorët, dëgjoi të qeshurat e tyre, shtrëngoi më fort peshqirin, pa ditur ç’të bënte dhe u fut në dhomën e zhveshjes. Andia e përqafoi dhe ia fshiu pikën e lotit. Edhe Andia ishte një vajzë e vogël.

VIKTORIA XHAKO
(ZHORZH SAND)

VIKTORIA XHAKO - NË PISHINË - Fragment 313958_476600219034162_942603805_n

VIKTORIA XHAKO - NË PISHINË - Fragment 313958_476600219034162_942603805_n

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30