Meja, shembull i gjenocidit mbi një popull

Meja, shembull i gjenocidit mbi një popull

Kastriot Shehdadi
Edhe amaneti i 377 të rënëve këtu në Meje, ishte ta bëjmë Kosovën të lirë, të pavarur, përparimtare, një Kosovë që nuk e ndal ecjen e saj nga e ardhmja”, thotë presidenti Sejdiu.




“Gjykimet e kriminelëve serbë, të cilët kanë kryer krime në Kosovë janë farsa, ndërsa ata kriminelë duhet të gjykohen nga gjykata ndërkombëtare” tha presidenti Fatmir Sejdiu

Gjakovë, 27 prill
Të hënën në Meje u përkujtua masakra më e madhe që kishte ndodhur brenda një dite ndaj popullatës civile shqiptare në Kosovë. Në këtë përvjetor u tubuan familjarë që pësuan nga kjo masakër si dhe përfaqësues të lartë të institucioneve të Kosovës duke përfshirë presidentin Fatmir Sejdiu, kryeministrin Hashim Thaçi dhe zyrtarë të tjerë të lartë shtetërorë e lokalë. Masakra e Mejes është shembulli i shfarosjes dhe realizimit të planifikuar të vrasjes totale të një populli, tha presidenti i Kosovës, dr.Famir Sejdiu, në 10-vjetorin e masakrës më të madhe në Kosovë, që serbët realizuan në Meje të Gjakovës, ku të njëjtin ditë dhe në të njëjtin vend, vranë dhe masakruan 377 civilë shqiptarë. Ndërkaq, për gjykimet e kriminelëve serbë në shtetin e krimit, presidenti Sejdiu, tha se “gjykimet e kriminelëve serbë, të cilët kanë kryer krime në Kosovë janë farsa, ndërsa ata kriminelë duhet të gjykohen nga gjykata ndërkombëtare”. Kriminelët duhet të gjenden kudo që janë fshehur, të vihen para drejtësisë dhe të marrin dënimin e merituar. Institucionet e Kosovës duhet të bëjnë edhe më shumë, sepse kemi edhe mbi 1900 të zhdukur, fati i të cilëve duhet të zbardhet. Edhe amaneti i 377 të rënëve këtu në Meje, ishte ta bëjmë Kosovën të lirë, të pavarur, përparimtare, një Kosovë që nuk e ndal ecjen e saj nga e ardhmja”, tha Sejdiu.
Ndërkaq, duke kujtuar edhe një herë një vrasje të tillë të popullatës civile, kryeministri i Kosovës, Hashim Thaçi, tha se “ky ishte një gjenocid i kryer nga Serbia”. Të pranishmit i ka përshëndetur edhe kryetar i komunës Pal Lekaj, i cili duke nderuar kujtimin për të rënët, kujtoi se “me varre e mbollëm një pjesë të mirë të tokës sonë të cilat sot janë më shumë se varre, nga ku marrim frymëzimin, mësimin dhe porosinë se sa e fortë është atdhedashuria”.
Masakra e Mejës është një prej krimeve më të mëdha që regjimi serb ka kryer mbi popullatën civile shqiptare në Kosovë. Ky krim kundër njerëzimit është gjykuar nga bashkësia ndërkombëtare, ndërkaq për këtë krim Tribunali i Hagës ka ngritur aktakuzë kundër dy prej komandantëve të policisë serbe Vlastimir Gjorgjeviq dhe Sreten Lukiq. Ndaj të parit është duke u zhvilluar procesi i gjykimit, ndërkaq i dyti është dënuar m 22 vjet burg më 26 shkurt të këtij viti.
Nga kjo masakër ka ende të zhdukur të cilëve nuk u dihen gjurmët, madje as kufoma dhe varret.