SKËNDER ZOGAJ: KOSOVA ËSHTË NË DUART E HALABAKËVE INSTITUCIONALË

nga **Agim Gashi** Tue Jun 24, 2014 3:28 pm

SKËNDER ZOGAJ: KOSOVA ËSHTË NË DUART E HALABAKËVE INSTITUCIONALË

“Interpretimi në Gjykatën Kushtetuese mund ta ngacmojë edhe më tepër situatën dhe të nxjerrë telashe të reja që pamundësojnë formimin e qeverisë së re”, vlerëson Skënder Zogaj për Bota press.

Po bëhen gati dy muaj që shteti i Kosovës, përjashto këtu institucionin e Presidencës, po udhëhiqet nga një kryeministër në largim dhe nga një kryeparlametar i shkarkuar. Vonesat në shpalljen e rezultateve përfundimtare dhe paqartësitë e krijuara së fundmi se kush ka të drejtë dhe kush jo të formojë qeverinë, po e rrezikojnë edhe më tej funksionimin normal të shtetit. Pritjet që Gjykata Kushtetuese të qartësojë dilemat rreth asaj se kujt i takon e drejta për të formuar qeverinë, jo vetëm se i ka lënë në pritje partitë politike, por po prodhon edhe efekte të tjera negative.
Nënkryetarja e LDK-së Teuta Sahatçiu mendon se Gjykata Kushtetuese duhet të veprojë në funksion të mbarëvajtjes së shtetit. “Nuk mendoj se dikujt i konvenon që Kosova të hyjë në një periudhë ku institucionet nuk mund të funksionojnë. Andaj mendoj se duhet të jenë në nivel të detyrës dhe ta kryejnë sa më shpejt atë përgjegjësi që e kanë marrë”, tha ajo për “Botapress”.
Edhe nënkryetari i AAK-së, Ahmet Isufi, nuk sheh ndonjë rrezik të funksionimit të shtetit, ndërsa beson se Kushtetuesja me kohë do ta thotë mendimin e saj, i cili po ashtu do të shërbejë në krijimin e institucioneve të reja. “Besojmë që vendimi i Gjykatës Kushtetuese do të ndodhë me kohë dhe po ashtu do të ndodhë në raport të krijimit të institucioneve kredibile në nivel të Kosovës. Presim që në afatin sa më të shpejtë Gjykata Kushtetuese ta ofrojë mendimin e saj dhe të funksionalizohet Qeveria e Kosovës”, tha Isufi për gazetën “Botapress”.
Publicisti dhe politikani Skënder Zogaj konsideron se funksionimi i shtetit të Kosovës është i rrezikuar tej mase dhe një situatë alarmante është krijuar sidomos pas zgjedhjeve të 8 qershorit, që e kanë dramatizuar në shkallë ekstreme mosfunksionim e shtetit, i cili po kalon ditët më të këqija, duke qenë as i lirë dhe as i pavarur. “Nuk është i lirë, sepse një pjesë e territorit të vendit është duke u mbajtur peng nga serbët e yshtur nga Beogradi, të cilët po provokojnë si urithët me "parkun e paqes" që e kanë vendosur mu në urën e Ibrit. Njëkohësisht, shteti i Kosovës nuk është as i pavarur, sepse po cenohet sovraniteti dhe po shkelet rendi dhe qetësia para hundëve të Policisë së Kosovës, që po qëndrojnë si spektatorë duke bërë seri me sy, ndërkohë që sharlatanë të ndryshëm në krye me Edita Tahirin po deklarojnë se "nëse Brukseli nuk merr ndonjë vendim për këtë çështje, atëherë Qeveria e vendit do të ndërhyjë me autoritetin e saj ligjor (!)"”, tha Zogaj për “Botapress”. Sipas tij kjo situatë fatkeqe është rezultat i faktorit vendor, i cili nuk është në nivelin e duhur të realizimit të përgjegjësive të duhura shtetërore dhe as nuk di të krijojë raporte dhe relacione bashkëpunuese dhe bashkërenduese me faktorin ndërkombëtar. “Kosova vazhdon të jetë në duart dhe në vullnetin e halabakëve institucionalë, që kalkulojnë me halucinacione sipas kërkesave dhe diktateve të manovruesve të ndryshëm shtetërorë. Pikërisht kjo ka të bëjë edhe me kërkesën e presidentes Jahjaga, në drejtim të Gjykatës Kushtetuese, për interpretimin e problemeve të krijuara nga rezultati i zgjedhjeve të 8 qershorit, rreth mandatimit të kryeministrit të ardhshëm. Vetë fakti se kërkesa është bërë para certifikimit të zgjedhjeve, mjafton për ta konstatuar futjen në hell të ‘mishit të dhisë’ ”, vlerëson Zogaj për Bota press.

Mon	Tue	Wed	Thu	Fri	Sat	Sun
		1	2	3	4	5
6	7	8	9	10	11	12
13	14	15	16	17	18	19
20	21	22	23	24	25	26
27	28	29	30	31