Më në fund merr qëndrim edhe Akademia: Përkrah fuqishëm Rektorin Zejnullahu

nga **Agim Gashi** Thu Oct 22, 2015 5:06 pm

Më në fund merr qëndrim edhe Akademia: Përkrah fuqishëm Rektorin Zejnullahu

Në përkrahje të rektorit Ramadan Zejnullahu, që u shkarkuar nga këshilli drejtues, ka dal edhe Akademia e Shkencave dhe Arteve të Kosovës, përmes një njoftimi. Në këtë letër të ASHAK-ut cmohet puna e rektorit për gjatë kohës sa ka ushtruar postin e rektorit, ndërsa vendimin e Këshillit Drejtues e quajnë arrogant.
Kjo është ketra e plotë e ASHAK-ut:
Të zmbrapset arroganca e Këshillit Drejtues dhe e klaneve në UP
Kryesia dhe të gjithë anëtarët e Akademisë së Shkencave dhe të Arteve të Kosovës po i ndjekin me shqetësim zhvillimet në UP. Zgjedhja e Rektorit Zejnullahu, profesor me përvojë dhe dije për çështjet universitare na kishte dhënë një shpresë se, pas një periudhe jo të shkurtë veprimesh të pafrytshme për mbarëvajtjen e punëve në këtë vatër të arsimit dhe të shkencës, të dijes dhe të emancipimit të përgjithshëm të Kosovës dhe të shqiptarëve, gjërat po ktheheshin në drejtimin e duhur të lëvizjes së vendosur drejt avancimit të cilësisë dhe respektimit të ligjshmërisë.
Praktikat e shkeljes së ligjshmërisë dhe të injorimit të kritereve profesionale-shkencore, si pasojë e ndërhyrjeve nga grupet politike apo parapolitike, nga vetë instancat politike, apo të grupeve të interesit dhe të profiterëve të ndryshëm, e kanë lënduar rëndë këtë themelatë. Në vend që të kishim mbështetje thelbësore për ndërmarrjet pozitive të Rektorit lidhur me stabilizimin e gjendjes, ne po përballemi me shkarkimin e tij si pasojë e një veprimi teknik të një grupi menaxherial, për më tepër, për një pjesë, të caktuar nga vetë Ministria, apo nën ndikim të drejtpërdrejtë të grupeve të interesit.
Të gjithë jemi dëshmitarë që Rektori Zejnullahu bëri përpjekje ta stabilizonte gjendjen në UP duke respektuar ligjshmërinë dhe profesionalizmin. Në ndërmarrjen e shqyrtimit dhe të evitimit të parregullsive dhe të problemeve të akumuluara për vite me radhë, nuk mund të ketë garanci se nuk do të bëhen edhe hapa të ngutshëm, por para orientimit të përgjithshëm për t’u vlerësuar, eventualitetet e tilla nuk mund ta arsyetojnë masën drastike të shkarkimit, i cili, siç po duket, është përgatitur gjatë nga brenda dhe nga jashtë UP-së.
Interesi i Universitetit dhe i shoqërisë është më i madh se interesat e individëve, të klaneve dhe të grupeve. Prandaj, nga institucionet përkatëse të Republikës kërkojmë që ta zmbrapsin këtë vendim arbitrar të Këshillit Drejtues dhe t’i japin mbështetje Rektorit dhe menaxhmentit në rrugën për tejkalimin e situatës së tensionuar, të mospajtimeve të thella konceptuale midis menaxhmentit dhe grupeve të interesit dhe për reformimin e UP-së, gjithnjë në përputhje me ligjshmërinë dhe pavarësinë e institucionit, si dhe me përpjekjet për ngritjen e standardeve të cilësisë
Këto do të jenë kërkesat në protestën kundër shkarkimit të rektorit Zejnullahu
Rron Gjinovci, pjesëtar i shoqërisë civile, në profilin e tij në Facebook, ka renditur edhe kërkesat që do t’i kenë sot protestuesit:
Kthimi i rektorit në postin e tij Shkarkim i Këshillit Drejtues dhe emërimi i një organi të përkohshëm, ku gjysma janë ekspertë ndërkombëtarë
Shkarkimi i dekanëve dhe emërimi i ushtruesve të detyrës
Ndryshimi Ligjit për Arsimin e Lartë që të pamundësohet ndikimi partiak në Universitete Publike
Mbajtja e zgjedhjeve të lira dhe të pandikuara politikisht në UP deri në maj të vitit 2016.
Protestë në mbrojtje të Rektorit
Është paralajmëruar për sot në ora 11: 00 një protestë para Ministrisë së Arsimit në përkrahje të rektorit Ramadan Zejnullahu, të cilin dje e shkarkoi Këshilli Drejtues i Universitetit të Prishtinës “Hasan Prishtina”.
Protesta po organizohet përmes një grupi të krijuar dje në facebook “Protestë në mbështetje të Rektorit Zejnullahu”, të cilit i janë bashkangjitur mijëra shfrytëzues të rrjetit social.
“Sot Këshilli Drejtues i UP-së mori vendim skandaloz që të shkarkojë Rektorin Zejnullahu për shkak të përpjekjeve të tij për të vendosur rend në Universitet. Ju ftojmë të bashkangjiteni në protestë para Ministrisë së Arsimit të enjten në orën 11:00, ku do t’i bëjmë thirrje Ministrit Arsim Bajrami të shfuqizojë vendimin e sotëm dhe të shkarkojë kryesuesen e Këshillit Drejtues, Shefkije Islamaj, e cila dha hapësirë për malverzime të tilla”, thuhet në thirrjen në facebook.
Pas vendimit të Këshillit Drejtues të UP-së, mbrëmë reaguan, ndër të tjerët, presidentja Atifete Jahjaga, kryeministri Isa Mustafa dhe ministri i Arsimit Arsim Bajrami, të cilët kërkojnë rishikimin e shkarkimit të Zejnullahut.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30