Pasaporta kot

Pasaporta kot




Asnjë qytetari të Kosovës, pavarësisht nacionalitetit të tij, nuk do t’i vlejë pasaporta biometrike serbe. Komisioni Europian ka vendosur që liberalizimi i vizave të vlejë vetëm për ata që adresën e banimit e kanë në territorin e Serbisë. Deri më tash, 1. 500 kosovarë kanë marrë pasaporta të tilla, ndërsa 7. 647 kanë aplikuar.

Nga Besiana Xharra më 06.07.2009 në ora 8:02


pasaportë biometrike serbe

Lidhur me mundësinë që Serbisë t’i hiqet regjimi i vizave për në BE në fund të këtij viti, kosovarë të shumtë kanë shfrytëzuar rastin që të marrin pasaporta biometrike të këtij shteti.

Mirëpo, pas shumë debatesh të Komisionit Evropian lidhur me këtë çështje, tani është marrë vendimi që asnjë qytetar i Kosovës, pavarësisht nacionalitetit të tij shqiptar, serb apo rom, nuk do t’i vlejë pasaporta biometrike serbe për të udhëtuar pa viza në BE.

Sipas gazetës serbe, Dnevnik, nëse në pasaportën e tyre, adresa e banimit nuk i përket territorit të Serbisë, atëherë ata nuk do të përfitojnë nga liberalizimi i vizave.

“Propozimi ka të bëjë me liberalizimin e vizave për shtetasit me vendbanim në territorin e Serbisë, por jo edhe për qytetarët që jetojnë në territorin e Kosovës”, thuhet në propozimin e këtij komisioni, në të cilin gazeta Dnevnik thotë se ka pasur qasje.

Sipas këtij mediumi, Komisioni Evropian do të fusë Serbinë në listën e bardhë “Schengen”, vetëm pasi të miratohet vendimi që liberalizimi i vizave të mos aplikohet për qytetarët e Kosovës.

Arsyet sipas këtij komisioni, janë pasi Kosovën nuk e kanë njohur të gjitha shtetet e BE-së dhe se arsyet e tjera për këtë vendim kanë të bëjnë me siguri – teknike dhe ato me faktin që autoritetet në Beograd nuk e kontrollojnë territorin e Kosovës.

Pra duhesh të kesh adresë vendbanimi brenda territorit të Serbisë, që të vlejë pasaporta biometrike e Serbisë.

Kështu Komisioni Evropian merr këtë vendim, i vetëdijshëm se kosovarët, pavarësisht nacionalitetit, duke përfshirë edhe serbët që jetojnë këtu, do ta kenë të vështirë për të marrë një pasaportë ku iu shkruhet adresa e banimit jashtë territorit të Serbisë.

Mirëpo, kosovarët e nacionalitetit shqiptar, duke u nisur nga mundësia për të udhëtuar nëpër BE, deri tani kanë marrë rreth 1 mijë e 500 pasaporta biometrike serbe, ndërsa kanë aplikuar rreth 7 mijë e 647 të tjerë. Këto të dhëna i ka bërë të ditur ministri i Punëve të Brendshme i Serbisë, për të përditshmen Danas.

Kosovarët kanë mundur t’i marrin këto pasaporta, pasi Serbia ende e konsideron Kosovën pjesë të shtetit të saj.

Vuk Jeremiq, ministër i Jashtëm i Serbisë, pati deklaruar se pasaportat biometrike do t’iu jepen edhe qytetarëve të Kosovës, dhe se kjo, sipas tij, nuk është çështje politike, por teknike. Ai pati thënë se, “do të zbatohen kontrolle të veçanta sigurie për qytetarët e Kosovës, të cilët do të kërkojnë pasaporta, për shkak të rrethanave të veçanta të sigurisë".

Ndërsa, sipas ekspertit për çështje të sigurisë, profesorit Zoran Dragishiç, shqiptarët e Kosovës kanë të drejtë për pasaportë serbe, sepse "Kosova është një pjesë integrale e Serbisë".

“Sipas Kushtetutës, shqiptarët janë qytetarë të Serbisë dhe nuk ka arsye që administrata jonë mos t’iu lëshojë atyre pasaporta. Ndërsa, shqiptarët që kanë ardhur nga Shqipëria në Kosovë pas vitit 1999, nuk janë të ligjshëm për pasaporta serbe", pati deklaruar Dragishiç për gazetën Danas.

Lëshimi i pasaportave biometrike të shqiptarëve të Kosovës është një nga temat e vazhdueshme të diskutimit gjatë takimeve për liberalizimin e regjimit të vizave ndërmjet ekipit negociator serb dhe ekipit të ekspertëve të Komisionit Evropian dhe e tëra për shkak të mundësisë së emigrimeve.

Derisa së fundmi, ky komision ka marrë vendimin që kosovarët të mos mund ta shfrytëzojnë këtë mundësi, pa qenë banorë të Serbisë.

Nga mediet serbe po ashtu bëhet e ditur se me datën 14 të këtij muaji, në Strasburg do të miratohet ky propozim, i cili do të jetë pozitiv për të futur Serbinë në listën e Schengenit.

Sipas Komisionit Evropian, qëllimi i punës do të përfundohet deri më 30 nëntor dhe liberalizimi i vizave për Serbinë do të fillojë më 1 janar 2010.

Në procesin e liberalizimit të vizave janë e futur edhe Mali i Zi e Maqedonia. Ndërsa Shqipëria e Bosnja janë në të njëjtën rrugë, kështu që Kosova mbetet e vetmja jashtë këtij procesi.