Zvicra kthen kosovarët

Zvicra kthen kosovarët


Kosova do të nënshkruajë marrëveshje me Zvicrën për riatdhesim të kosovarëve pa leje qëndrimi në shtetin helvetik. Marrëveshja pritet të nënshkruhet në shtator, kurse kthimi pritet të nisë në fillim të vitit tjetër. Bisedime për këtë çështje janë duke u bërë edhe me Norvegjinë.

Nga Jeton Musliu

Pas Gjermanisë, në radhë është Zvicra ajo që do të fillojë së riatdhesuari kosovarët që jetojnë atje pa leje të rregullt qëndrimi.

Në të njëjtën kohë, diskutime janë duke u bërë edhe me Norvegjinë e cila dëshiron të kthejë kosovarët që nuk kanë dokumente të rregullta qëndrimi.

Sa i përket kthimit të kosovarëve nga shteti helvetik, ka shumë mundësi që Zenun Pajaziti, ministër i Punëve të Brendshme të Kosovës, të udhëtojë në shtator drejt Bernës.

Atje me homologen e tij pritet të nënshkruajë marrëveshjen për riatdhesim të kosovarëve, të cilët sipas ministrit të Kosovës, nuk numërohen me mijëra.

“Nuk kemi shifër të saktë, por ata nuk janë me mijëra, por me dhjetëra”, thotë ministri Zenun Pajaziti për Express.

Ministri siguron kosovarët që jetojnë në Zvicër se edhe kjo marrëveshje bëhet në kuadër të përmbushjes së kritereve të Komisionit Evropian për liberalizim të vizave.

Në të njëjtën kohë, ai sqaron se do të jenë edhe shumë projekte të cilat qeveria e këtij vendi do të zbatojë në Kosovë.

“Kjo bëhet për të ndaluar imigrimin ilegal në mënyrë që shkuarja në Zvicër të bëhet në mënyrë legale”, shpjegon ministri Pajaziti.

Sipas tij, nuk do të ketë kthim të menjëhershëm të kosovarëve nga Zvicra, kurse projektet që do të pasojnë më pas do të jenë me shumë benefite.

Nënshkrimin e një marrëveshjeje të tillë për riatdhesim të Kosovës me Zvicrën e kanë konfirmuar për mediet e shtetit helvetike dhe zyrtarët e latë të këtij shteti.

Sipas agjencisë zvicerane të lajmeve ATS, kjo marrëveshje pritet të nënshkruhet në muajin shtator gjatë vizitës zyrtare që do të bëjë në Zvicër ministri i Punëve të Brendshme të Kosovës, Zenun Pajaziti.

Në marrëveshjen për riatdhesim veç tjerash parashihet se nuk do të ketë pasoja për ata që kanë leje të përhershme qëndrimi në Zvicër, ndërsa të tjerët që kanë leje të përkohshme apo nuk kanë fare leje qëndrimi do të kthehen në Kosovë.

Ndërkohë, për në muajin shtator pritet nënshkrimi edhe i një marrëveshjeje të tillë me Gjermaninë dhe lajmi për këtë është dhënë njësoj menjëherë pas vizitës së para disa javëve të ministrit të Punëve të Brendshme të Gjermanisë në Prishtinë.

Zbatimi i këtyre marrëveshjeve pritet të nisë nga fillimi i vitit të ardhshëm