LDK-ja nuk ka bërë marrëveshje parazgjedhore me PDK-në

LDK-ja nuk ka bërë marrëveshje parazgjedhore me PDK-në

Lirie Hajdari
Duke mos dashur të paragjykojë se me cilën parti LDK-ja preferon të hyjë në koalicion në balotazh, Ramë Manaj tha se partia e tij do të jetë më e afërt me ato parti me të cilat ka pikëpamje të njëjtë programore, duke mos përmendur me këtë rast PDK-në.




S’ka marrëveshje
“Asnjë marrëveshje nuk është bërë mes askujt, as ndërmjet Sejdiut e Thaçit sa u përket koalicioneve parazgjedhore. Në raundin e dytë të zgjedhjeve, varësisht nga rezultati, LDK-ja do të shikojë edhe pozicionet e veta për të shkuar më tej, por pa asnjë paragjykim mbi bazë të kritereve të mirëfillta, të afrisë programore, të kredibilitetit të kandidatëve, por edhe në interes të qytetarëve”, është shprehur Manaj.

Duke mos dashur të paragjykojë se me cilën parti LDK-ja preferon të hyjë në koalicion në balotazh, Ramë Manaj tha se partia e tij do të jetë më e afërt me ato parti me të cilat ka pikëpamje të njëjtë programore, duke mos përmendur me këtë rast PDK-në.
Lirie Hajdari
Prishtinë, 21 gusht
Sekretari i përgjithshëm i LDK-së, Ramë Manaj, i ka hedhur poshtë pohimet në media se dy udhëheqësit e partive më të mëdha, PDK-së dhe LDK-së, kryeministri Thaçi dhe presidenti Sejdiu kanë arritur marrëveshje për të ndihmuar njëra tjetrën në balotazh. Ai ka konfirmuar qëndrimin e LDK-së, se do të garojë si parti e vetme në zgjedhjet e nëntorit dhe nuk do të hyj me asnjë subjekt tjetër partiak me konkurrencë të përbashkët. “Asnjë marrëveshje nuk është bërë mes askujt, as mes Sejdiut e Thaçit sa u përket koalicioneve parazgjedhore apo më vonë. Në raundin e dytë të zgjedhjeve varësisht nga rezultati edhe LDK do të shikojë pozicionet e veta për të shkuar më tej, por pa asnjë paragjykim mbi bazë të kritereve të mirëfillta, të afrisë programore, të kredibilitetit të kandidatëve, por edhe në interes të qytetarëve”, është shprehur Manaj.
Isa Mustafa, kandidat për Prishtinën
Duke mos dashur të paragjykojë se me cilën parti LDK-ja preferon të hyjë në marrëveshje në rast të balotazhit, Manaj tha se LDK-ja do të jetë më e afërt me ato parti me të cilat ka pikëpamje të njëjtë programore, por gjithnjë duke pasuar parasysh interesin e qytetarëve. Megjithatë, ai pret që edhe zgjedhjet e sivjetme të jenë demokratike, transparente, ndërsa theksoi se LDK përkrah edhe kërkesat për transparencë në kuptim të teknologjisë dhe teknikës. Lidhja Demokratike e Kosovës është në vazhdën e punës për të identifikuar kandidat për kryetar të mundshëm të komunave, për anëtarë të asambleve komunale dhe për bartësit e listave. “Deri më 1 shtator ne do të kemi propozimet e degëve për kandidat për kryetar të komunave, për kandidat për anëtarë të asambletë komunale, përfshirë edhe bartësit e listave. Ne do të jemi në përputhje me fatin ligjore dhe më datën 15 shtator do të publikohen listat”, tha Manaj.
Por ajo që duket se shqetëson LDK-në është kandidimi i dy emrave nga radhët e kësaj partie për kryetarë të komunës së Prishtinës, ai i kryetarit aktual Isa Mustafës dhe ai i ish-ministrit të arsimit, Rexhep Osmanit. Për sekretarin Manaj në këtë periudhë mbase mund të manifestohen dhe ambicie personale, sesa kapacitete të mirëfillta, ndërsa potencon se është e drejtë e secilit të propozojë, por edhe të propozohet.
I pyetur për këto dy kandidatura, Manaj pranon se organizimi i LDK-së për komunën e Prishtinës ndryshon nga komunat e tjera, për faktin se veprojnë 5 degë dhe secila ka të drejtë të propozojë, por, sipas tij, propozimi valid dhe përfundimtar është ai i Këshillit të Përgjithshëm në pajtueshmëri me degët dhe me Kryesinë Qendrore të LDK-së. “Sa i përket kandidaturës së Isa Mustafës nuk dua ta paragjykoj, por ai ka pasur një angazhim solid me udhëheqjen e kryeqytetit në këtë periudhe, edhe pse një periudhë e shkurtër, dhe ka rezultate evidente. Por është LDK, Kryesia, dhe Këshilli i Përgjithshëm që do të përcaktoj se kush do të jetë kandidat i LDK-së për Prishtinën”, bëri të ditur Manaj.
Derisa mundësia për koalicion është mohuar nga zyrtarët e LDK-së, ka qenë njeriu i dytë i PDK-së, Hajredin Kuçi, ai i cili nuk e ka mohuar ekzistimin e marrëveshjes paraprake ndërmjet dy partnerëve të koalicionit. Ai ditë më parë pati deklaruar për mediat vendore se në rastet e tjera, kur partneri i koalicionit është konkurrent me ndonjë parti tjetër, atëherë “ne assesi nuk do t’i dëmtojmë raportet e partnerit të koalicionit, por do të jemi shumë korrektë dhe do të punojmë që kudo të fitojë PDK-ja. Por, pas PDK-së, ne do t’i japim hapësirë partnerit të koalicionit”i.
Sido që të jetë, deri në ditën e zgjedhjeve kanë mbetur më pak se tre muaj, ndërkohë që secila parti lë për të dëshiruar fitoren duke garuar me forcat e veta në zgjedhjet e 15 nëntorit.
Në këtë konferencë të rregullt për media, sekretari i përgjithshëm i LDK-së nuk ka përmendur çështjen e bashkimit të LDK-së me LDD-në, përkatësisht koalicionit eventual në mes të këtyre dy partive politike. Siç dihet, ideja e hedhur kohë më parë nga Berim Ramosaj, ish-nënkryetar i LDD-së, tash për tash ka “prodhuar” vetëm fjalë dhe i ka kushtuar më dorëheqje nga LDD-ja iniciatorit të kësaj ideje.
Zgjedhjet e 15 nëntorit të këtij viti janë të parat që mbahen në Kosovën e pavarur dhe janë zgjedhje të para që do të organizohen nga institucionet e Kosovës, siç është KQZ-ja. Rezultati i këtyre zgjedhjeve do të pasqyrojë mozaikun e skenës politike të Kosovës dhe do të jenë një test demokratik për institucionet e Republikës së Kosovës.