Pallati 'Rilindja' i gatshëm deri në fund të vitit

Pallati 'Rilindja' i gatshëm deri në fund të vitit






Punimet për meremetimin e objekti shumë katesh Rilindja janë duke vazhduar dhe sipas marrëveshjes kulla duhet të jetë në funksion në muajin e ardhshëm, por zyrtarë të Ministrisë së Administratës Publike, thonë se objekti do të jetë në funksion të Qeverisë së Kosovës deri në fund të vitit. Punimet për renovimin gjeneral të Pallatit të Mediave, është duke i kryer kompania Mabetex, të cilës tenderi i është dhënë në shtator të vitit të kaluar dhe me një investim prej 14.694.453.67 eurove. Sipas kontratës punët duhet të kryhen për një vit. Në këtë objekt do të vendosen një pjesë e institucioneve të Kosovës ku disa janë duke punuar në shtëpi private dhe të cilat pas strehimit në këtë objekt do të kursejnë miliona të buxhetit të Kosovës. Zëdhënësja e Ministrisë së Administratës Publike, tha për gazetën “Bota sot” se ministri Arsim Bajrami disa herë ka vizituar vend punishten dhe ka përcjellë nga afër punimet që po kryhen në objekt, të cilat po mbikëqyren drejtpërdrejtë nga drejtori i Departamentit të Shërbimit të Inxhinieringut dhe Menaxhimit të Ndërtesave, Ilir Osaj dhe stafi me të cilin ai menaxhon. Në bazë të vlerësimeve, punimet në ish- Pallatin e mediave janë duke vazhduar sipas dinamikës së paraparë. Majlinda Lulaj, tha më tej se njëri nga kushtet e kontratës që MAP-ja (aso kohe Ministria e Shërbimeve Publike) ka nënshkruar me kryerësin e punës ka qenë përfundimi i punimeve me së largu një vit nga data e nënshkrimit të kontratës. -tha Majlinda Lulaj, zëdhënëse e Ministrisë së Administratës Publike.
B. Toska