Tirana ndihmon arsimin shqip në Kosovën Lindore

Tirana ndihmon arsimin shqip në Kosovën Lindore

Përshëndetet vendimi i MA të Shqipërisë për pranimin e 345 studentëve nga Lugina e Preshevës.




Subjektet politike shqiptare dhe institucionet e pushteteve lokale të komunave të Luginës së Preshevës kanë përshëndetur vendimin e Ministrisë së Arsimit të Republikës së Shqipërisë me rastin e caktimit të kuotave për pranimin e 345 studentëve nga Lugina e Preshevës në universitetet e Republikës së Shqipërisë. Prefekti i komunës së Preshevës, z.Ragmi Mustafa ka deklaruar se 345 maturantë do të mund të vijojnë studimet në universitetet e Republikës së Shqipërisë me rastin e publikimit zyrtarë të kuotave për regjistrimin e studentëve nga komunat Preshevës, Bujanocit dhe Medvegjës. Sipas tij, janë plotësuar të gjitha kërkesat që janë drejtuar në bazë të listës nga administratat e komunave nga Presheva dhe Bujanoci drejtuar Ministrisë së Arsimit. Gjithashtu janë dhënë edhe kuota shtesë prej 165 studentëve nga kërkesat e viteve të mëparshme. Në këtë vit akademik studentët nga Presheva dhe Bujanoci janë më të privilegjuar edhe në drejtimet e mjekësisë në Universitetin e Shqipërisë. 13 studentë do të mund të regjistrohen në mjekësi të përgjithshme, 10 në stomatologji, 6 në farmaci, 6 në infermieri dhe drejtime të tjera. Zoti Mustafa, tha se kjo është mundësi mjaft e mirë për të gjithë studentët që kanë mbetur pa u regjistruar në ndonjë fakultet adekuat. Duhet theksuar se së shpejti priten të caktohen edhe kuotat për vendet tjera të lira për studime në universitete tjera të Kosovës dhe atij të Tetovës.
Kushtrim MALIQI