Ekspozojnë tre piktorë nga Kosova

Ekspozojnë tre piktorë nga Kosova

Ramadan Reshitaj
Në Växjö të Suedisë


Pamje nga ceremonia e hapjes së ekspozitës
Ekspozita e përbashkët e Zake Prelvukajt, Ismet Jonuzajt dhe e Rudina Xhaferit është fryt i bashkëpunimit dhe këmbimeve kulturore mes krijuesve suedezë dhe atyre shqiptarë.
Në kuadër të thellimit të bashkëpunimit kulturor në mes të artistëve figurativë suedezë dhe atyre nga Kosova, në Växjö të Suedisë është hapur një ekspozitë e përbashkët e piktorëve akademikë të Kosovës, Zake Prelvukaj, Ismet Jonuzi dhe Rudina Xhaferi. Hapja e kësaj ekspozite u bë të merkurën, më 2 shtator në ambientet e Qendrës Kulturore ”Italienska Palaset” të qytetit universitar të Växjös, në praninë e dashamirëve kulturor suedezë e shqiptarë. Hapjen e ekspozitës, e cila do të mund të vizitohet deri më 25 shtator, e bëri profesori i Universitetit të këtushëm, Harald Nikcklasson.

Rose Mari Bëck, e cila është përgjegjëse për këmbime kulturore në kuadër të Italienska Palatset, e ndien vetën shumë të gëzuar se kanë arritur të realizojnë këmbimin e planifikuar kulturor me krijuesit nga Kosova.
- Vitin e kaluar në kuadër të këtij bashkëpunimi, që është inicuar nga piktori Shyqri Gjurkaj, i cili jeton dhe krjon këtu në qytetin tonë, 13 artistë figurativ nga Vëxjö kemi pasur nderin që të vizitojmë Kosovën dhe të ekspozojmë punimet tona në Galerinë e Arteve të Kosovës. Gjatë qëndrimit tonë në Kosovë unë dhe kolegët kemi përjetuar plagët dhe dhimbjet në të cilat ka kaluar Kosova gjatë dhe para luftës së fundit. Kjo ekspozitë e përbashkët e piktorëve Zake Prelvukaj, Ismet Jonuzi dhe Rudina Xhaferi, në të vërtet është kthim i vizitës dhe thellim i bashkëpunimit tonë të ndërsjell. – thotë Rose Mari Bëck.
Një pjesë e krijimeve të ekspozuara nga këta piktorë reflekton përjetimet e vështira të shqiptarëve nga Kosova, por kjo është bërë në mënyrë mjeshtërore dhe nuk ka ngjyrime të drejtpërdrejta politike.
Së bashku me kolegun Shyqri Gjurkaj, Rose Mari Bäck shpreson se këto këmbime kulturore do të vazhdojnë edhe në të ardhmen.