Frikësohen nga listat e zeza

Frikësohen nga listat e zeza
Memorandumin e mirëkuptimit e kanë kundërshtuar PDK-ja, LDK-ja dhe AAK-ja, ndërsa e ka pranuar LDD-ja




Nga Bardh Frangu

Organizata joqeveritare INPO nga Ferizaj, edhe për këto zgjedhje, njësoj si në ato të vitit 2007, ka paralajmëruar hulumtimin e biografive të kandidatëve për zgjedhjet lokale në regjionin e Ferizajt.

Derisa në komunën e Ferizajt do të hulumtohen biografitë e të gjithë konkurruesve për këto zgjedhje, në komunën e Shtimes dhe të Kaçanikut do të hulumtohen vetëm biografitë e kandidatëve për kryetar komune.

Të premten në zyrat e INPO-s janë ftuar përfaqësuesit e subjekteve politike nga komuna e Ferizajt për të nënshkruar një memorandum bashkëpunimi, por kjo gjë nuk ka ndodhur.

Kryetari i Degës së PDK-së, Ylber Topalli, njëherazi kandidat për këshilltarë ka thënë se një memorandum të tillë nuk do ta nënshkruajnë. Ai ka përshëndetur iniciativën e INPO-s karshi punës së dobët të gjykatave, por ka thënë se për ta është valid certifikimi nga KQZ-ja.

Ismail Nazifi, bartës i listës së kandidatëve të LDK-së për këshilltarë, pos që ka kundërshtuar memorandumin e tillë ai ka shprehur edhe dyshime të mëdha në punën e INPO-s dhe të medieve nga komuna e Ferizajt. Ngjashëm ka reaguar edhe kandidati për kryetar i AAK-së, Rrahim Sadiku. Ai ka thënë se është i painteresuar për nënshkrimin e një memorandumi të tillë, duke e vlerësuar memorandumin si kamuflim për qëllimet e dikujt.

Në favor të memorandumit është shprehur vetëm kryetari i Degës së LDD-së, Milazim Haliti, njëherazi kandidat për kryetar të Komunës së Ferizajt.

Përkundër këtyre deklarimeve përfaqësuesit e katër subjekteve më të mëdha në komunën e Ferizajt kanë mbetur që të konsultohen për këtë me strukturat udhëheqëse.

Koordinatorja e INPO-s, Albulena Sadiku ua ka bërë me dije se pavarësisht nënshkrimit dhe pavarësisht bashkëpunimit, INPO do të bëjë hulumtimin e biografive të kandidatëve për zgjedhje dhe se me raportin përfundimtar do të njoftohen subjektet politike, ndërsa votuesit do të njoftohen nëpërmjet broshurave që do t’i publikojë kjo organizatë.

Frika nga listat e zeza të INPO-s ishte pasojë e faktit se edhe në këto zgjedhje subjektet politike kanë kandiduar po ata persona që veç ishin gjendur në këto lista që në zgjedhjet e kaluara. Tetë persona nga zgjedhjet e kaluara kanë konkurruar sërish, përkundër që ishin në listat e zeza të INPO-s. Mbase listave të zezë mund t’iu shtohen edhe disa nga kandidatët për kryetar komune, ndërsa kanë padi nëpër gjykata.