Gjykimi i shqiptarëve të Luginës, proces i montuar politik

Gjykimi i shqiptarëve të Luginës, proces i montuar politik



Lideri i LKSH të Luginës së Preshevës, Orhan Rexhepi, pas përfundimit të procesit të parë gjyqësorë në Beograd, kundër nëntë shqiptarëve nga Presheva e ka cilësuar atë si proces të montuar politik. Procesi gjyqësorë kundër tyre vazhdon më 5 tetor me paraqitjen e dëshmitarëve të parë.
Lideri i Lëvizjes Kombëtare Shqiptare në Luginë të Preshevës, Orhan Rexhepi, që është i angazhuar nga familjarët e të akuzuarve, ka njoftuar sot se për nëntë të arrestuarit shqiptarë që po mbahen në burgun e Beogradit me akuza për krime lufte në Kosovë, në periudhën qershor-tetor të vitit 1999, kanë përfunduar me deklaratat e tyre para Prokurorisë për Krime Lufte e Republikës së Serbisë.
Rexhepi ka thënë se para kësaj Gjykate u nxorën, Agush Memishi, Faton Hajdari, Ahmet Hasani, Nazif Hasani, të cilëve iu është përkeqësuar gjendja shëndetësore, si dhe Samet Hajdari, Ferat Hajdari, Kamber Sahiti, Selimon Sadiku dhe Burim Fazliu.
Rexhepi thotë se këta 9 djem nga Presheva hodhën poshtë çdo gjë të shkruar në aktakuzë, si fund e krye të rrejshme, të montuar dhe të improvizuar.
Ata në mbrojtjen e tyre, që në paraqitjen e parë nxorën në pah se ky është tërësisht një proces i montuar politik. Ata para trupit gjykues serb treguan për dhunën e pashembullt e çnjerëzor të njësive speciale të xhandarmërisë serbe të ushtruar ndaj tyre dhe familjeve të tyre.
Gjyqi kundër këtyre të akuzuarve tyre vazhdon të hënën, më 5 tetor 2009, me paraqitjen e dëshmitarëve të pare.