Suzana Zisi: PËRFYTYRIM NEBULOZE - MIHALLAQ QILLERI

Suzana Zisi: PËRFYTYRIM NEBULOZE - MIHALLAQ QILLERI


Sot, kam nderin dhe kenaqesine te sjell ketu, poezine "PËRFYTYRIM NEBULOZE", te mikut tim te dashur, shkrimtarit dhe poetit tone te nderuar MIHALLAQ QILLERI.
Uroj tju shijoje ashtu si me shijoi mua mbreme kur me trokiti ne formen e nje mesazhi te ngrohte dhe te ndjere.



PËRFYTYRIM NEBULOZE



Vija të pjerrta ndajnë botën e përkohëshme,
Në pjesë mikroplanetesh që ndizen e shuhen.
Qafë gruaje prej fildishi ku tri ngjyra pikëzohen,
E zeza pjesë sipër, bezha në mes dhe e rozë poshtë..
Një krah karrigeje dhe drojta e llërës që cik..
E gjithë galaktika rrethuar me errësirën e vet,
I gjithë truri i ngarkuar prej resh gati pëlcet.
Zemërngrirë po të pres, të pres…,
Ja,..të preka, pa frymë kam mbetur, për besë !

E zeza prej flokësh, a magji drithëruese në terr,
Tipare bezhë, një buzë, një sy, një luginë pikasone,
I etur, a i ngopur aty vërtitem i përndjekur
Jetërroj dhe vdes.
Një ngërç që nga ameba - qelizë trashëguar më fundos
Në origjinën time- një hiç,- një pluhur,- një vesë..
Trambudanë rozë depërton dhunshëm në krah,
Flakë pa dritë që ngjyra nga zjarri i vjen,
Simbol i dhimbjes, trazirës rrebesh,
Ja,.. të preka, pa frymë kam mbetur, për besë !


Fotografi e fundit nga stacioni kozmik dërguar,
Amorfe sundon kujtesën e çoroditur.
Kështu bota nisi të formësohej përtej ;
Nebulozë je, vorbull ku vërtiten brutalisht qiejt,
Rrezikun ndjej të përpihem krejt nga yll i vetmuar.
Rozë, bezhë, e zezë krijuar nga piktor’ i çmendur
Që vija heq në telajon-tru rrudharrafshuar.
Bota e turbullt hesht nën mikrodramat banale, perversë
Ndërsa unë frymëngrirë akullnajash përhumbur...
Ja,.. të preka, pa frymë kam mbetur për besë !


MIHALLAQ QILLERI