’Pazaret politike’- vendimtare për udhëheqjen e Prizrenit!

’Pazaret politike’- vendimtare për udhëheqjen e Prizrenit!

Myrfet Shasivari
Kush do ta fitojë betejën për Prizrenin
Kush do ta fitojë betejën për Prizrenin Epilogu i zgjedhjeve lokale të 15 nëntorit, në komunën e Prizrenit, bazuar në rezultatet preliminare, të publikuara mbrëmë nga ana e KQZ-së, ka shpërfaqë gjendjen, mbase jo edhe aq befasuese, pasi që në bazë të votave të fituara, edhe në këtë komunë do të ketë rivotim për kandidatin e LDK-së, z. Hanefi Muharremi në njërën anë dhe në anën tjetër, për kandidatin e PDK-së, z. Ramadan Muja. Me këtë rast, vlen të theksohet e dhëna, se, tanimë, tradicionalisht, pjesa e dytë e procesit zgjedhor, apo balotazhi, në Prizren, duket të jetë faza që zgjon kërshërinë më të madhe të opinionit, pasi që me këtë rast, sajohen edhe koalicionet më të papritura, apo siç thuhet në opinion “pazare politike”, të cilat gjithsesi do të ndikojnë në rezultatet përfundimtare. Aktualisht, pjesa dërmuese e subjekteve politike të Prizrenit, nuk publikojnë ndonjë segment për format e koalicionit, me motivin “deri në publikimin e rezultateve përfundimtare nga ana e KQZ-së”, përderisa në anën tjetër, përflitet për animin e disa subjekteve politike për kandidatin e caktuar, për kryetar të kësaj komune më të madhe në jugun e vendit. Në këtë kontekst, vlen të theksohet edhe fakti se rreth krijimit të koalicioneve për mbështetjen e kandidatit të LDK-së apo të PDK-së nga subjektet e tjera, të cilat me votat e pamjaftueshme e humbën kandidatin e tyre për kreun komunal, gjithsesi se varet edhe nga sjellja e PDK-së respektivisht LDK-së ndaj atyre subjekteve para dhe përgjatë fushatës zgjedhore. Kështu, vlen të theksohet akti i kalimit të disa anëtarëve të AKR-së në PDK, kur kjo e fundit, me pompozitet e deklamonte këtë gjendje, por në anën tjetër, dega e këtushme e AKR-së, pati marrë vendim për prishjen e koalicionit me PDK-në, për t’iu bashkëngjitë LDD-së në procesin zgjedhor. Në anën tjetër, përgjatë fushatës zgjedhore, nuk mungoi as “gafi” i LDK-së, kur kandidati i LDD-së për kreun komunal, u pat penguar nga oponentë të kësaj partie për të bërë fushatë në tregun “Fatoni”. Megjithatë, mbase këto veprime, për shkak të interesave partiake, edhe mundë të “hidhen pas shpine”, ndërsa “beteja” më e madhe në mes të LDK-së dhe PDK-së në Prizren, do të jetë ajo e përfitimit të “Koalicionit për Prizrenin”, i cili në këto zgjedhje u radhitë i treti, duke e lënë pas edhe AAK-në dhe shumë subjekte të tjera që morën pjesë në garën për Prizrenin. Me këtë rast, do rikujtuar të dhënat e KQZ-së, sipas të cilave, kandidati i LDK-së z. Hanefi Muharremi ka fituar 30. 3 për qind të votave, ai i PDK-së, z. Ramadan Muja 31. 2 për qind, i “Koalicionit për Prizrenin”, z. Ruzhi Rexha 14. 1 përqind, kandidati i AAK-së, z. Bislim Zyrapi fitoi 6. 1 përqind e kështu me radhë. Sidoqoftë, perudha e ardhshme dyjavore deri në ditën e balotazhit, jeta politike në Prizren, do të jetë tejet e ngjeshur me aktivitete në kuadër të të cilave, nga LDK-ja, respektivisht PDK-ja do të bëhen përpjekje të ethshme drejtë përfitimit të aleancave partiake me synimin e sigurimit të bollshëm të votave për kandidatët e tyre, për ta fituar mandatin e ardhshëm për qeverisjen e kësaj komune.