Përmbytjet dhe ndasitë politike...

Përmbytjet dhe ndasitë politike...




Nga ARTUR NURA

Viti 2010 erdhi për shqiptarët me përmbytje dhe dialog të munguar politik! Përmbytjet tashmë turbulluan jo vetëm Shkodrën dhe Lezhën, por edhe mendjet e çoroditura të qytetarëve shqiptarë.
Ndërsa për qytetarët në nevojë dhe sigurisht të traumatizuar u demostrua solidaritet nga të gjithë anët, Kosova, Maqedonia, Nato dhe BE, midis dy liderve kryesorë politik, kryeministrit Sali Berisha dhe kreut opozitar Edi Rama, sigurisht edhe forcave politike që ato përfaqësojnë u ridemostrua mosbesim i ndërsjelltë! Qytetarëve të Shkodrës, por nëpërmjet ekraneve të gjithë shqiptarët u përballën me furinë e ujit të pabesë, ju desh gjithashtu të ballafaqohen edhe me menyrat e ndasisë politike të Tiranës, ndasi që për gjithësecilin që ndjehet i qyteteruar, është vetëm negativitet! Kjo ndasi, padyshim që transmetohet edhe tek qytetarët, të cilët kur i dëgjon në të njëjtat ekrane, ndërsa janë me Ministrat shprehen vetëm të kënaqur dhe ndërsa kur janë pranë opozitarëve shprehen krejtësisht të indinjuar!
Për fat të keq kjo ndasi nuk vihet re vetëm në interpretimin e këtyre palëve për shkaqet e situatës së përmbytjeve dhe sigurisht perceptimit të vetë qytetarëve, por me sa duket dhe sipas të gjitha gjasava këta dy individë përballë njëri-tjetrit nuk shikohen në sy! Thënë më thjeshtë Berisha dhe Rama nuk e përballojnë dot njëri tjetrin nga pikëpamja psikologjike dhe njerëzore! Në pozicione të ngjashme, vite më parë, ishin Sali Berisha dhe Fatos Nano! Në fakt, këtu kujtoj me respekt se opinionisti i njohur Mustafa Nano në një shkrim të botuar tek “Shekulli”, gjykonte se një veprim të tillë e bëjnë vetëm padrinot e Mafias, domethënë, ata që pas tyre kanë interesa kundërshtare kontrolli tregjesh dhe parash!
Duke ju referuar retrospektivës, gjithashtu më duhet të kujtoj se Edi Rama, kur vendosi të jetë funksionar në politikë, pati deklaruar se ai nuk hynte në politikë për të marrë prej saj si shumica, por për ti dhënë asaj nga vetja!
Sot, ndërsa Sali Berisha dhe Fatos Nano mund të dalin në publik edhe bashkë, vihet re sigurisht jo pa keqardhje, se në të njëjtat pozita ndodhen dy individët politikisht më të fuqishëm të vendit tonë të varfër!
Nuk kemi mundur të lexojmë Mustafa Nanon të thotë gjë në shkrimet e tij për këtë fenomen! Por, sipas një etike profesionale dhe kryesisht qytetare, padyshim duhej pyetur nëse opinionisti mendon se do kishte midis këtyre politikanëve interesa të ngjashme?!
Personalisht gjykoj se në këtë fotografi krejt tradicionale dhe historike për politikën shqiptare të viteve të gjata dhe të vështira të shtetit shqiptar, nuk ka asnjë dimension serioz të një politike të re e cila mund të ngrohë cilindo që njeh mirë historinë politike shqiptare! Nga kjo pikë vështrimi na duhet të themi se parimisht pas tejkalimit të përmbytjeve të ujrave në veri me të cilin u solidarizuan të gjithë, shqiptarët duhen të përgatiten për një vit të vështirë politik, permbytjet e të cilit shpresojmë të mos i paguajë me një faturë negative edhe integrimi i Shqipërisë në familjen Europiane, rrugë në cilën fqinjët tanë po na lënë pas...