Pasqyra e zezë e trojeve shqiptare

Policia rrugore 8073 gjoba për një javë



Tiranë – Policia e Tiranës po vijon punën për parandalimin e aksidenteve në rrugë dhe krijimin e lehtësirave për lëvizjen e lirë të mjeteve.Në këtë kuadër, kontrolle të shumta po ushtrohen në drejtim të vendosjes së rripave të sigurimit, kaskës mbrojtëse, kontrollit të shpejtësisë, përdorimit të alkolit nga drejtuesit e mjeteve, parkimet e gabuara etj.
Vetëm gjatë ditës së djeshme (11 shtator) janë vënë 2769 gjoba, me vlerë 2. 855 000 lekë. Në tetë raste janë pezulluar lejet e drejtimit të automjeteve. Ndërkohë, për një periudhë një javore nga data 06 shtator deri më 11 shtator 2009 nga shërbimet e Komisariatit të Policisë Rrugore Tiranë, janë vënë 8073 gjoba me vlerë 4. 777. 690 lekë. Gjithashtu, janë pezulluar edhe 36 leje drejtimi. “Policia e Tiranës, sheh si domosdoshmëri mirëkuptimin dhe mbështetjen e opinionit publik duke ftuar të gjithë përdoruesit e rrugës, në ndërgjegjësimin për të zbatuar me korrektësi normat e sjelljes gjatë drejtimit të mjetit dhe rregullat e legjislacionit rrugor, të përcaktuar në Kodin Rrugor”, thuhet në një deklaratë nga kjo polici.

Merret peng një biznesmen shqiptar






Një biznesmen shqiptar merret peng në Itali nga bashkatdhetari i tij në bashkëpunim me një shtetas tjetër italian, por pas dy orësh lihet i lirë, ndërsa dy pengmarrësit përfundojnë në prangat e policisë. Sipas njoftimeve të policisë italiane, shqiptari 45- vjeçar emri i të cilit nuk është bërë i ditur është marrë peng që të enjten në mbrëmje, nga dy persona, ku njëri prej tyre është shqiptar me banim në qytetin e Ravenas. Gjatë operacionit të Antimafias së Bolonjës, të premten në mbrëmje kanë përfunduar në pranga 29- vjeçari nga Shqipëria Egert Kanaj dhe Leonardo D'Aliamo, 47 vjeç, të akuzuar për rrëmbim dhe armëmbajtje pa leje. Dy pengmarrësit e shqiptarit i kishin kërkuar familjarëve të shqiptarit një shumë prej 90 mijë eurosh në këmbim të lirimit të tij, ndërsa kjo shumë ishte ulur deri në 50 mijë euro. Shqiptari ishte marrë peng te enjten në mbrëmje, ndërsa aventura e pengmarrësve të tij nuk ka zgjatur më shumë se 24 ore, ku përforcimet e policisë nga ajri dhe toka kanë bërë që të lokalizojnë vendin ku mbahej peng shqiptari, afër Portit të Fuoris në hyrje të lokalitetit të Ravenas. Pas kësaj ngjarjeje, policia lokale ka nisur hetimet nëse ka persona të tjerë të përfshirë në pengmarrjen e 45- vjeçarit nga Shqipëria. Sipas të dhënave nga media italiane mësohet se dy autorët e pengmarrjes njiheshin nga policia si persona me precedentë penale. Ndërkohë, nga deklarimet që ka dhënë në polici, shqiptari i marrë peng, ka rrëfyer se dy personat e kishin kërcënuar se do ta vrisnin nëse nuk dorëzohej nga familjarët e tij shuma e eurove që kishin kërkuar dy pengmarrësit.

Vihen në kontroll zjarret në Lezhë






Zjarret e shfaqura që prej mbrëmjes së të enjtes në rrethin e Lezhës janë vënë nën kontroll nga forcat e ushtrisë, policisë dhe ato të emergjencave civile. Prej tre ditësh zjarret janë shfaqur në fshatrat e Kaçinarit dhe Veles, ndërkohë që vetëm në orët e para të mëngjesit të sotëm është bërë e mundur fikja e tyre. Nga të dhënat paraprake mendohet të jenë djegur plotësisht 150 hektarë pyje dhe kullota, ndërkohë që janë djegur edhe katër shtëpi të pabanuara. Drejtoria e pyjeve në Lezhë deklaron se nuk ka asnjë rrezik të ringjalljes së ndonjë vatre zjarri, për shkak se kanë filluar shirat e fortë të cilët nuk lejojnë riaktivizimin e tyre.

Një i vdekur, disa të plagosur në Tiranë-Durrës






Ky është bilanci i një aksidenti të ndodhur rreth orës 08:00 të ditës së sotme në autostradën Tiranë-Durrës, ku janë përfshirë 6 automjete. Burime nga policia rrugore bëjnë të ditur se si pasojë e aksidentit ka mbetur i vdekur një person. Viktima është goditur disa herë rresht nga makinat e përfshira në aksident.
Emri i viktimës ende nuk dihet, ndërohë që policia thotë se nga përplasja kanë mbetur të plagosur disa persona të tjerë. Sipas disa burimeve mësohet se në vendngjarje, pranë një qendre tregtare kanë mbërritur menjëherë forcat e policisë, të cilët janë duke punuar për të zbardhur skenën e aksidentit.

Suharekë, zbulohet sasi e madhe e armatimit





Në një aksion të përbashkët të KFOR-it dhe Policisë së Kosovës, në Javorë të Suharekës janë gjetur dhe konfiskuar 273 mina të llojit MK-8 dhe të një lloji tjetër ende i panjohur. Kjo zonë pas lufte është kontrolluar nga KFOR-i, ndërsa ka qenë një nga pikat kryesore të policisë serbe gjate luftës.
Në orët e hershme të mëngjesit të sotëm, Njësitit i krimeve rajonale të policisë së Prizrenit ka ndërmarrë një operacion në fshatin Javorë të komunës së Suharekës dhe ka rënë në gjurmët e një arsenali të tërë të minave MK-8 dhe të një lloji tjetër ende i panjohur.
Sipas drejtorit të policisë rajonale Nexhmedin Krasniqi ky armatim i rëndë, tepër i rrezikshëm për atë zonë, është vërejtur së pari nga një banor i kësaj anë, i cili në orët e mesnatës ka lajmëruar stacionin policorë të Prizrenit.
Pas inspektimit të terrenit nga Njësiti i krimeve rajonale është njoftuar njësiti i KROR-it për deminim, i cili ka dalë menjëherë në vendngjarje dha ka bërë bartjen e armatimit për asgjësim.
Sipas drejtorit të policisë, mendohet se një sasi kaq e madhe e këtij armatimi nuk mund të jetë futur nga pikat kufitare, por mund të ketë qenë brenda rajonit të Prizrenit. Rasti është nën hetim, derisa të mësohet origjina e dhe futja e këtij armatimi në fshatin Javorë të Suharekës

Gjysma e qoshqeve u shkatërruan pa u vënë në funksion





Njëri prej qoshqeve të shkatërruara


Ka një kohë të gjatë që në kryeqytet janë vendosur 50 qoshqe të reja me një pamje atraktive dhe të njëjta. Një pjesë e tyre (17 qoshqe) kanë mbetur të pashfrytëzuara tash e një vit, të cilat në ndërkohë janë shkatërruar e dëmtuar nga dora e njeriut. Këto qoshqe kanë mbetur në këtë gjendje për shkak të mos efikasitetit të komunës. Tash pas një viti zyrtarët komunal të kryeqytetit janë zgjuar nga gjumi, pasi e pashfrytëzuara janë shkatërruar dhe tash kanë dhënë 17 shoshë në shfrytëzim për familjet me raste sociale. Ndue Kalaj, kryetar i Komisionit për ndarjen e qoshqeve, tha se në vitin 2008 Kuvendi Komunal i Prishtinës pati vendos që të ndajë qoshqet e reja në kryeqytet. Tashmë gjatë këtij viti komuna mori vendim që 17 qoshqe t’i jepen në shfrytëzim rasteve sociale. Komuna formoi komisionin përkatës dhe kjo e fundit shpalli konkursin për përzgjedhjen e përfituesve. Komisioni ka bërë përzgjedhjen e 34 përfituesve dhe nga 160 aplikantë, ka pas vetëm tre ankesa. Lista i ka shkuar kryetarit të kuvendit dhe bordit të drejtorëve, të cilët e kanë aprovuar. Ai më tej shtoi tash anë duke bërë përgatitjet intensive në biseda me përfituesit për zgjedhjen e ortakëve dhe lokacionet. Për rastet sociale janë ndarë 17 qoshqe me 34 përfitues. Këto janë pronë e komunës dhe e kemi obligim të rinovoj ato dhe brenda muajit të vihen në funksion. “Këtë muaj pritet të lëshohen në funksion qoshqet, të cilat do të shfrytëzohen nga familjarët e rasteve sociale”,tha Ndue Kalaj.
B. Toska

Racistët e ‘Lega Nord’ rrahën një shqiptar



Dy kamerierë të huaj (një shqiptar dhe një nordafrikan) të restorantit "La briciola", në Piazza San Marco të Veneziasë, janë sulmuar sot nga një grup prej 8 personash të veshur me një uniforma jeshile. Lajmi është njoftuar nga disa agjenci italiane lajmesh online. Grupi i është afruar lokalit pasdite dhe ka nisur të qëllojë me grushta mbi një prej kamarierëve. Kamarieri i dytë është afruar për ti bërë të arsyetonin, por është qëlluar me grushte dhe shkelma në fytyrë. Ngjarja është konfirmuar nga Kuestura e Venezias, dhe është bërë me dije nga një këshilltar i Partisë Ekologjike në këshillin e qytetit, Beppe Caccia, për të cilin episodi është një sulm "me sfond të qartë racist, i kryer nga patrullat e militantëve të Legës".

Tërmet në Kavajë dhe Durrës, s'ka dëme



DURRËS- Një termet 5 ballë ka goditur sot vendin tonë me epiqendër në Kavajë, por që u ndje edhe në Durrës e rrethinat e tij. Instituti Sizmologjik informon se epiqendra është shënuar 2 km ne juglindje të Kavajës.
Lëkundja ishte me intesitet 5 ballë dhe magnitudë 4.3 ballë.Lëkundja sizmike është ndjerë edhe në qytetin e Durrësit dhe rrethinat e tij.
Deri tani bëhet e ditur se lëkundjet e tërmetit nuk kanë shkaktuar dëme. Lëkundja e tërmetit është shënuar rreth orën 10:37 të ditës së sotme.

Prishtinë: Grabitje në 'Raiffeisen Bank'




Kohëve të fundit është rritur numri i grabitjeve të parave nga bankat, prej nga janë marrë sasi të konsiderueshme parash, por policia nuk ia ka dalë që të arrestojë ende asnjë person.

Të mërkurën në orën 13.00 tre persona të maskuar në Kodrën e Diellit kanë grabitur një shumë parash në filialën e kësaj banke
Tre persona të maskuar dhe të armatosur kanë hyrë në degën e "Raiffeisen Bank" në lagjen "Kodra e Diellit" në Prishtinë, ku nën kërcënimin e armëve kanë grabitur një shumë parash, por fatmirësisht nuk ka të lënduar nga ana e punonjësve të bankës.
Menaxherja për Marrëdhënie me Publikun, Iliriana Tahiraj, ka thënë se rasti ka ndodhur rreth orës 13:00 të ditës së sotme, por nuk ka dashur të bëjë të ditur shumën e parave të grabitura, pasi ndërkohë pritet të kryhen hetimet nga ana e policisë.
"Ajo çka ne si bankë tani për tani mund të konfirmojmë është se në ora 13:00 tre persona të armatosur dhe me maskë kanë hyrë, domethënë në degën tonë dhe kanë marrë një shumë të caktuar parash. Shumë shpejt do ta bëjmë edhe publike shumën, mirëpo duhet patjetër të presim hetimin, të cilin është duke e bërë Policia e Kosovës për momentin", ka thënë Tahiraj.
Me këtë rast, zyrtarë të "Raiffeisen Bank" dëshirojnë t'i njoftojnë klientët e tyre se paratë në këtë bankë janë të siguruara dhe ky rast nuk ka ndonjë ndikim te paratë e tyre.
"Kisha dashur ta shfrytëzoj këtë rast dhe t'i njoftojë të gjithë klientët e bankës që kjo nuk i afekton ata aspak, domethënë paratë janë të siguruara" ka thënë Tahiraj.
Kohëve të fundit është rritur numri i grabitjeve të parave nga bankat, prej nga janë marrë sasi të konsiderueshme parash, por policia nuk ia ka dalë që të arrestojë ende asnjë person.

Policia zbulon kanabis në Podujevë





Kanabisi


Policia e Kosovës ka zbuluar në rajonin e Podujevës një hapësirë prej 70 ari në të cilën kultivohej bima narkotike kanabis.
Policia ka konfiskuar fijet e bimëve narkotike ndërsa lidhur me këtë rast është arrestuar një person i dyshuar.
Njësitet e hetimeve të narkotikëve të policisë së Kosovës kanë arritur të zbulojnë 3 parcela të mbjella me bimë narkotike të llojit kanabis në një hapsirë prej 70 ari. Bimët narkotike janë zbuluar në fshatin Llogë të komunës së Podujevës.
Baki Kelani, Shef i Zyrës për Marrëdhinie me Publikun në PK na tha: "Bima narkotike ka qenë e kultivuar në një hapësirë të përfshirë me misër kur tani është koha e kultivimit të tyre. Ne si zyrtarë policor e kemi një plan të përbashkët operacional i cili është vënë në ndjekje të këtyre dukurive."
Ldhur me këtë rast policia deri më tani ka arrestuar vetëm një të dyshuar.
"I dyshuari me urdhër të prokurotit është dërguar në mbajtje ku filimisht është basitis edhe shtepia e të dyshuarit ku kanë gjetë 3 gëzhoja të armës se gjuetisë dhe 3 të armës së tetesë”, shtoi Kelani.
Aksionet e njësiteve të hetimeve të narkotikëve janë shpeshtuar kohëve të fundit duke rezultuar me zbulimin e bimëve narkotike në lokacione të ndryshme të Kosovës.

Fier, dy vetëvrasje brenda ditës



Policia e Fierit


Një 36-vjeçar ka gjetur vdekjen vetëm pak minuta pas mbërritjes në spital,kurse një vajzë e re është ende në rrezik për jetën.
Mikail Josifi, 36 vjeç nga Frashëri, prej pesë vitesh vuante nga depresioni. Kurse maturantja Elona Alliaj, 18 vjeçe, nga fshati Levan, e ka marrë vendimin e vetëvrasjes pas një konflikti me shoqërinë.
Burimet zyrtare të repartit të reanimacionit në spitalin rajonal të Fierit pohojnë se Mikail Josifi ka gjetur vdekjen në spital të hënën, ne orën 14:30.
36-vjeçari, lindur dhe banues në fshatin Frashër, komuna Zharrëz, është çuar në spital nga familjarët. Ndonëse ai u transportua menjëherë në repartin e reanimacionit, mjekët nuk kanë mundur ta shpëtojnë.
“Ndërhyrja ka rezultuar e kotë, pasi sasia e lëndës toksike që Mikail Josifi kishte përdorur ishte e lartë. Një pjesë e madhe e organeve të aparatit tretës të 36-vjeçarit kanë pësuar dëmtime të pakthyeshme, çka e bëri të pamundur përmirësimin e tij,”- ka thënë mjeku në shërbim gjatë së hënës

Aksident në Durrës, një i vdekur dhe tre të plagosur






Një aksident me pasojë vdekjen e një personi dhe plagosjen e tre të tjerëve ka ndodhur sot në Durrës. Ngjarja e rëndë ku humbi jetën 68-vjeçarja Nasoje Laçi, ndodhi në Shkozet. Ndërsa të plagosur kanë mbetur shtetasit, Fiqiri Laci, Namir Gjoci dhe Sheqere Edibati. Sipas policisë, shkak i aksidenti është bërë shpejtësia e automjetit. Në momentin e ngjarjes, makina me të cilën udhëtonin tre personat, është përpjekur të shmangë kalimtaren Sheqere Edibati, ndërsa është përplasur, duke shkaktuar një të vdekur dhe tre të plagosur

Arrestohen dy të dyshuar, shtetas bullgarë

Ata dyshohet se kanë kryer veprën penale “Ndërhyrje në sistemet kompjuterike”, që sanksionohet sipas nenit 264 të Kodit Penal të Kosovës.

Afër bankës “Raiffaisen” në Dardani, të shtunën në mbrëmje Policia e Kosovës ka arrestuar dy shtetas bullgarë, të dyshuar për veprën penale “Ndërhyrje në sisteme kompjuterike”, që sanksionohet sipas nenit 264 të KPK-së, njofton Policia e Kosovës. Të dyshuarit janë kapur nga policia me pajisjet e nevojshme kompjuterike, të cilat pajisje i përdornin për vjedhjen e kodeve të kartelave bankare si dhe disa kamera të vogla, të cilat po ashtu i përdornin për vjedhjen e pinit bankar. Në vendin e ngjarjes është gjetur një çantë me pajisjet e nevojshme kompjuterike si mikro-kamera për vendosje në bankomat, shirit magnetik për vendosje në bankomat, si dhe një vlerë e të hollave që dyshohet të jenë nxjerrë nga bankomatet e bankave të ndryshme. Pas arrestimit të dyshuarve me urdhër të gjyqtarit të procedurës paraprake u është bastisur edhe dhoma e hotelit ku të dyshuarit banonin. Edhe aty u gjetën gjetur mikro-kamera për vendosje në bankomat, disa lloje të shiritave magnetik, një kompjuter llap-top dhe dokumente tjera të ndryshme, po ashtu është kontrolluar dhe konfiskuar edhe vetura e tyre. Të dyshuarit, me urdhër të prokurorit, janë dërguar në Qendrën e ndalimit, për 48 orë, thuhet në njoftimin e Policisë së Kosovës.

Gjenden armë dhe municion shpërthyes



Në orët e mbrëmjes së të shtunës, kalimtarë të rastit, kanë gjetur një arsenal granatash dhe municione kalibrash të ndryshëm, përskaj rrugës Rahovec - Drenoc. Policia në vendin e ngjarjes ka konstatuar se ishin nëntë granata dore, të llojit A- 6 dhe mbi 200 fishekë kalibrash dhe llojesh të ndryshme. Në vendin e ngjarjes kanë dalë edhe ekipet e KFOR-it, të cilët lanë bërë asgjësimin e kontrolluar të bombave, ndërsa ka bërë edhe tërheqjen e municioneve, në ndërkohë që policia e Kosovës ka filluar hetimin rreth këtij rasti. /M. Shasivari

Katër shqiptarë nën pranga nga policia greke





Policia greke


Policia greke njoftoi sot se shkatërroi një rrjet të trafikut të drogës duke arrestuar katër shtetas nga Shqipëria.
Sipas policisë greke, tre anëtarë të një familje shqiptare me banim në Athinë dhe një shtetas tjetër po nga Shqiperia janë vënë në pranga për transportim dhe shpërndarje të drogës. Në banesat e tyre, sipas policisë greke, u sekuestrua një sasi prej disa kilogramësh heroinë dhe disa kilogramë bimë narkotike mariuanë.
Policia greke tha se rrjeti greko -shqiptar po hetohej prej kohësh për trafik droge në një nga lagjet më të pasura të Athinës. Burimet zyrtare të policisë greke pohojnë se nga hetimet e para lënda narkotike futej nga kufri shqiptar përmes Pikës së Kapshticës në Juglindje të Shqipërisë. Trafiku i lëndëve narkotike në kufirin shqiptaro - grek është nga format më të përhapura kriminale.
Policia e Gjirokastrës njoftoi sot se zbuloi një sasi prej dhjetë kilogramësh lëndë narkotike në afërsi të brezit kufitar me Greqinë. Sipas policisë lënda synohej të trafikohej drejt Greqisë nga rrjetet shqiptare të narkotikëve.

Itali, arrestohet shqiptari me 19 kg kokainë

Sipas mediave italiane, vlera e kokainës, kapte shifrën e 7.6 milion eurove, ndërsa ishte e destinuar në tregun italian.




Policia italiane

Romë – Një shqiptar me plot 19 kilogramë drogë e llojit kokainë është arrestuar sot nga policia në shtetin fqinj.
Policia italiane i vendosi prangat shqiptarit, Ervis Petros, pasi në makinën me të cilën ai udhëtonte u gjet sasia e drogës, e cila ishte e ndarë në 18 paketa.
Sipas mediave italiane, vlera e kokainës, kapte shifrën e 7.6 milion eurove, ndërsa ishte e destinuar në tregun italian. Policia tha se 35-vjeçari shqiptar, po udhëtonte nga Spanja në drejtim të Italisë, udhëtim i cili ka përfunduar në “duart” e drejtësisë.

Në magjistralen Prishtinë-Ferizaj humb jetën një 22 vjeçare

Policia e Kosovës ka njoftuar se sot orës 14:40, në rrugën në një aksident rrugor në rrugën Prishtinë-Ferizaj, ka humbur jetën një person (femër, 22 vjeç).Vdekjen e viktimës e ka konstatuar ekipi mjekësor në vendin e ngjarjes. ...

Në këtë aksident fatal është përfshirë një veturë e tipit Audi A-4 , ngjyrë hiri, me targa Kosove dhe këmbësorja B. Maloku.
Aktualisht hetuesit rajonal të trafikut po punojnë me intensitet të shtuar për sqarimin e të gjitha rrethanave që kanë shpënë deri te ky aksident tragjik.
Ndryshe, në tetë mujorin e parë të vitit 2009 në rajonin e Prishtinës kanë ndodhur 23 aksidente fatale, ku kanë humbur jetë 28 persona.
Andaj duke parë si shqetësues këtë numër të madh të viktimave nga ngjarjet aksidentale, kërkojmë nga të gjithë pjesëmarrësit në trafik që të respektojnë me përpikëri të gjitha rregullat e trafikut dhe veçmas kufizimet e shpejtësisë, në mënyrë që bashkërisht të ndikojmë në uljen e këtyre ngjarjeve, thuhet në njoftimin e Policisë së Kosovës.

Zbulohet një sasi municioni në Mitrovicë



Policia rajonale e Mitrovicës ka bërë të ditur se gjatë punimeve me ekskavator në lagjen "Kroi i Vitakut" është gjetur një arkë metalike e mbushur me 81 fishekë të kalibrit 12.7 mm.
Në një komunikatë për media, thuhet se arka ishte identifikuar nga punë kryesit në terren, në oborrin e një shtëpie ku po kryheshin gërmimet për fillimin e ndërtimit të shtëpisë së shkatërruar.
Njësitë e para intervenuese të Policisë së Kosovës, të stacionit veri në Mitrovicë, pasi kanë identifikuar vendin ku ndodhej municioni, kanë shënuar vendin e ngjarjes dhe më pas kanë njoftuar hetuesit policor të stacionit Zveçan, pasi ai lokacion i përket zonës së përgjegjësisë të stacionit policor Zveçan", thuhet në komunikatë.
Nuk është raportuar për incidente të tjera gjatë procedimit të këtij rasti, ndërsa hetuesit e Policisë së Kosovës, të stacionit Zveçan, kanë iniciuar hetimet e tyre lidhur me rastin.

SHBA: Shqiptari akuzohet për terrorizëm



Një shqiptar nga Nju Jorku është akuzuar për terrorizëm, pasi dyshohet se ka kërkuar të trajnohet nga militantët islamikë për të luftuar trupat amerikane në Irak dhe Afganistan, kanë bërëtë ditur autoritetet.
FBI ka thënë se Betim Kaziu, qytetar amerikan dhe banor i Nju Jorkut ka kërkuar, që të sigurojë armë dhe të luftojë trupat amerikane jashtë vendit.
Kaziu ka udhëtuar në Kajro në muajin shkurt, ka thënë FBI dhe më vonë në Kosovë, ku është arrestuar nga autoritetet kosovare në muajin gusht.
“Ky rast është një shembull i përpjekjeve të suksesshme ndërkombëtare për të hetuar dhe zënë ata, që do të angazhoheshin në akte terroriste dhe për të penguar komplotet e tyre”, ka thënë prokurori amerikan Benton Kampbell.
Autoritetet nuk kanë bërë të ditur se prej nga e ka prejardhjen Betim Kaziu.

Arrestohen dy bullgarë me pajisje për vjedhje bankash



Policia e Kosovës ka arrestuar dy bullgarë, të cilëve u është gjetur një sasi e madhe e pajisjeve të teknologjisë Informative që kanë shërbyer për të vjedhur nga bankat paratë e qytetarëve.
Zijadin Isaku, hetues financiar në Policinë e Kosovës ka bërë të ditur se dy të arrestuarit kanë lidhje me rrjetin e gjerë, me qendër në Bullgari. Ai ka thënë se janë duke punuar me policinë bullgare për të ndriçuar në tërësi rastin.
Isaku ka thënë se nga viti 2006 deri më tani viktima të vjedhjes kanë qenë qytetarët amerikan dhe ata evropian, përderisa tani viktima janë kosovarët.

Policia: Dukuri që nuk e kishim – vjedhja e bankave

Viktimat e vjedhjes nëpër banka janë qytettarët e Kosovës.- Deri më tani rreth këtyre veprave penale janë arrestuar 11 persona



Policia e Kosovës

Në tre vjetët e fundit Policia e Kosovës ka arrestuar gjithsej 11 persona për vjedhje në llogaritë bankare përmes ndërhyrjes kompjuterike e njohur ndryshe si sajb-krime dhe ka konfiskuar një sërë pajisjesh kompjuterike, kanë thënë zyrtarë të Policisë së Kosovës.
Në një konferencë për media, Zijadin Isaku, hetues në drejtorinë kundër krimeve ekonomike dhe korrupsionit, ka thënë se viteve të fundit Policia e Kosovës ka pranuar disa ankesa nga qytetarët lidhur me vjedhjet që po u bëhen ne xhirollogaritë e tyre bankare, por nuk ka dhënë ndonjë shifër të këtyre të hollave që janë plaçkitur.
"Praktikisht këto kanë filluar të paraqiten në Kosovë për herë të parë kah mesi i vitit 2006, veprat penale në ndërhyrje të sistemit kompjuterike, apo në gjuhë më të njohur, është e njohur tek ne "sajb-krime", ku gjatë vitit 2006 d.m.th. janë arrestuar fillimisht 11 persona dhe praktikisht fillimisht janë konfiskuar shumë mjete, pajisje elektronike dhe material prova tjera, të cilat kanë dëshmuar se ky grup ka qenë si grup i organizuar në atë kohë është cilësuar dhe është praktikisht në procedurë penale", ka thënë Isaku.
Ndërkohë, ka shtuar se rastet tjera që janë identifikuar, kanë qenë grupi prej katër personash, të cilët janë arrestuar vitin e kaluar, derisa rasti i fundit ka qenë i datës 18 shtator 2009, me ç'rast janë arrestuar dy shtetas bullgarë.
Sipas informatave që ka Policia e Kosovës, këta persona kanë rrjetin e tyre në Bullgari.
"Kemi bashkëpunim të mirë me policinë bullgare, kjo bëhet përmes një zyre që është në Hungari dhe shpresojmë se do të vazhdojë ky bashkëpunim", ka thënë Isaku, duke shtuar se nga viti 2006, viktimat kanë qenë kryesisht qytetarë amerikanë dhe evropianë, ndërsa sivjet viktima janë qytetarët e Kosovës.
"Nga viti 2006 kryesisht kanë qenë viktima qytetarë amerikanë dhe evropianë, një karakteristikë e këtyre veprave vitin e fundit që është kah paraqitet në vendin tonë është se viktimat po paraqiten të Kosovës d.m.th., këto pajisjet e fundit që është janë marrë d.m.th. janë mbi marrjen e identitetit, pinave dhe të gjitha të dhënëve të kartelës. Na dyshojmë se tani ka kaluar në një fazë tjetër këto vepra penale praktikisht që merren të dhëna d.m.th. që merren mjete prej qytetarëve tanë dhe tërhiqen në vende tjera", ka thënë Isaku.
Zyrtarët e policisë thanë se kanë disa raporte bankare për plaçkitjet e bëra, por nuk kanë bërë të ditur shumën e parave të vjedhura.

Mashtroi disa biznesmenë, prangoset korçari




Gjykata e Tiranës

Tiranë - Specialistët e sekisonit Kundër Krimit Ekonomik bazuar në urdhërin e ndalimit të Prokurorisë së Rrethit Gjyqësor Tiranë, kryen ndalimi e shtetasit Ardian Demir Vila, 27 – vjeç, lindur në fshatin Zboq, Korçë dhe banues në Tiranë.
Ndalimi i tij u krye pasi ky shtetas dyshohet se nga muaji Janar deri në Maj të vitit 2009, ka mashtruar duke ju marrë shumën e 650 000 lekë dhe nuk ia ka kthyer 4 shtetasve të cilët merren me biznese të ndryshme në Tiranë. Materialet do t’i kalojnë Prokurorisë së Rrethit Gjyqësor Tiranë, për veprën penale të vjedhjes me anë të “mashtrimit”.

Vdes i dënuari në burgun e Rrogozhinës





Rrogozhinë – Një i dënuar në burgun e Rrogozhinës ka vdekur në rrethana ende të pa njohura për autoritetet.
Drini Hajdaraj, i dënuar për trafik dhe përdorim droge, vdiq në qeli. 50-vjeçari nga Patosi, sipas drejtorisë së Burgjeve ka vdekur për shkaqe natyrale.
Megjithatë, burime nga burgu në fjalë theksojnë se i dënuari ka humbur jetën nga konsumimi i një sasie të madhe droge, që i ka dhënë goditjen përfundimtare. Gjithçka do të mësohet pas bërjes së autopsisë nga ana e mjekëve mbi trupin e të ndjerit, i cili është transportuar në Tiranë

EULEX mohon akuzat për dhunë policore



Zëdhënësja e EULEX-it Karin Limdal i ka mohuar pretendimet e serbëve nga komuna e Novobërdës se policia ka përdorur dhunë gjatë arrestimit të pesë serbëve.
“Nuk ka të vërtetë në këto akuza”, ka thënë Limdal.
Të mërkurën në mëngjes, policia e EULEX-it arrestoi pesë serbë të Kosovës të dyshuar për krime lufte, ndërsa një grua tjetër u arrestua për shkak se ka penguar aksionin e policisë.

Policia shpëton nga rrëmbimi 17-vjeçaren



Një 17-vjeçare ka Durrësit i ka shpëtuar rrëmbimit nga dy adoleshentë, falë ndërhyrjes në kohë të forcave të policisë. Ngjarja ndodhi mesditën e së shtunës, në lagjen 6 të qytetit bregdetar. Policia ka vënë në pranga Benard Lleshi, 18 vjeç, lindur në Dibër dhe Pashk Buca, 19 vjeç, lindur në Mirditë, të dy banues në rrethinat e Durrësit. Këta të rinj kanë tentuar të fusin me forcë në makinë gjimnazisten, banore në të njëjtën lagje. Të dy të rinjtë janë arrestuar në flagrancë, ndërsa policia ka sekuestruar edhe automjetin e tyre.