Tri poezi nga poeti Adem Zaplluzha

nga **Agim Gashi** Thu Apr 25, 2013 8:50 pm

NGA ZËRI I KAMBANËS

Në një shishe të qelqtë
Me një tapë prej dylli
E mbylla ditën
Qante peshku në rërë
Qanin dallgët te moli i vetmuar

Një fanar i vjetër
Nëpër sirtarët e kujtesës
I kërkonte kohërat e humbura
Në ditarin
E një peshkatari të moshuar
Ishte ndalur ora e një kohe

Dallgët shkonin e vinin
Si tërbimet e uturimave
Nga thinjat e një anijeje
Të përmbytur
Kishin dalë sirenat
Dhe këndonin me mallëngjim

Qante edhe deti me ngashërim
Nga zëri e kambanës
Doli një dritë inkandeshente
Dhe hipur
Mbi një kërrabë prej ashti
Kalëronte tok me yjet

NE TË GJITHË

Ne të gjithë shkonim pas saj
Ajo ikte
Prej shirave të mëdha
Nën sandalet e kuqe
Fshihej sekreti i heshtjes

Ne të gjithë huazonim lule
Nga kopshtet më të mira të qytetit
Ajo i adhuronte ngjyrat
E tejdukshme të ylberit

Ajo qeshte me ne
Kur ne qanim pas saj
Ne të gjithë çunat e lagjes
Nën sandalet e saja të kuqe
I kërkonim sekretet e një bukurie
Që nuk i përngjante bukurisë

Ne të gjithë në lagjen e kojrrilave
Kishim një përrallë
Me dy ëndrra
Herë shihnim ditën
E herë netëve të vona
Kur na tradhtonte gjumi

JEPU NJË SHANS DUARVE TUA

Mos pyet askënd
Jepu edhe një shans duarve të tua
Nëse për asgjë tjetër jo
Atëherë jepu një shans

Ne të gjithë i duam shirat
Por jo ato që reshin nëpër ëndrrat tona
Jepu një shans duarve
Të bisedojnë me vetveten

Kur ndryshojnë stinët
Do ndryshojmë edhe ne
Andaj të mos e pyesim askënd
Për prejardhjen e fjalës

Të ecim kokë lartë
Deri te bigëzimet e të gjitha lumenjve
Dhe te delta e ëndrrave
Ta kërkojmë etjen e fëmijërisë

Jepi edhe një shans
Shansit tënd të fundit
Deri sa kalon prej një ane
Në anën tjetër të ëndrrave

Tri poezi nga poeti Adem Zaplluzha 84338019

Tri poezi nga poeti Adem Zaplluzha 84338019

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30